بالهيـروغليـفــي

[Ahmad Misk]

بالهيـروغليـفــي

الجــزء الأوّل

</SPAN>

عمرك اتكلمت مع واحد لفترة قليلة، وحسيت إنك استمتعت جدا بالكلام معاه؟
هل فيه ناس معينين بتحب تتكلم معاهم وناس تانيه لأ؟
فيه ناس كتير اتكلموا عن: أساليب الاتصال.. وازاي إنك ممكن تجذب اللي قدامك وتنال احترامه باتباع قواعد معينة للحوار.. واتكتب في الموضوع ده حاجات كتيرة هنتناولها في الباب ده..

لكن النهاردة هانسمع من بعض الفراعنة قالوا لنا إيه ونصحونا بإيه؟
***********
الفضيلة الأولى
الصمت

لما تقعد مع مجموعة من الناس بيتكلموا، هتلاحظ حاجة غريبة قوي.. هتلاحظ إن كل واحد بيميل إنه يتكلم عن نفسه وتجاربه الشخصية أكتر من أي حاجة تانية
الأول: اكتشفت محل سمك هايل جدا.. عجبني أكله قوي
الثاني: أنا برضه باحب السمك جدا.. لما رحت إسكندرية ماكلتش غير سمك
الثالث: تصدقوا بقى إن أنا ماباحبش السمك؟ بيجيبلي حساسية

الأول: شفت حلقة امبارح من المسلسل العربي؟ عجبتني قوي
الثاني: أنا ليّ واحد صاحبي يشبه بطل المسلسل
الثالث: أيوه فعلا.. أنا عارفه

لاحظت الموضوع ده؟؟
راقب أصدقاءك وهم بيتكلموا أو أي مجموعة ناس في أي حتة.. هتكتشف فعلا إن أكتر حاجة الناس بتحب تتكلم عنها هي: نفسهم وتجاربهم

وعشان تنال حب اللي قدامك وتقديره لازم ماتقعش في مصيدة الكلام عن نفسك، واكسب ود اللي قدامك وخليه يتكلم عن نفسه براحته

أكتر حاجة الناس بتحبها إنها تلاقي حد يستمع لهم باهتمام وهم بيتكلموا.. وبيحبوا ويقدروا الشخص ده جدا، حتى لو ماتكلمش أساسا
فخليك إنت الشخص ده


حكمة
إذا كنت بين جماعة من الناس، فاجعل حب الناس هدفك.... فيحسن ذكرك، دون أن تتكلم
- من حكم كامجني وبتاح حتب -
***********
يعني المقياس في التواصل مش هو الكلام الكتير ومقاطعة اللي قدامك والكلام عمال على بطال عن إنجازاتك وعظمتك وتجاربك.. بكده التواصل ممكن يكون سلبي

لا تكثر في الكلام فالصمت خير لك فلا تتحدث ولا تكن ثرثارا
***********
الصمت والاستماع مهم جدا في عملك لو كنت بتتعامل بشكل مباشر مع مشاكل الناس

هاقول لك مثال
:
المريض: يا دكتور لما باصحى الصبح بالاقي عندي صداع وباحس كده إني
الطبيب: خد الدوا ده 3 مرات في اليوم
المريض: لكن يا دكتور أنا باحس كمان إن عندي غممان نفس وكمان
الطبيب: أيوه خد الدوا ده... اللي بعده يا عويس

العميل: ألو... لو سمحت الخط عندي فيه مشاكل، منها إن
موظف خدمة العملاء: أيوه يا افندم هنحل المشكلة دي حالا
العميل: أيوه بس فيه مشكلة كمان هي إن
موظف خدمة العملاء: ماتقلقش يا افندم هاحل كل المشاكل، شكرا لاتصالك

تلاحظ إيه هنا؟
هل المريض حاسس إنه تلقى علاج كويس؟
هيطلع من العيادة يذم في الدكتور ده طبعا ومش هيروح له تاني
وهل العميل مبسوط؟
لا طبعا.. حتى لو اتحلت المشكلة هيفضل عنده إحساس سلبي ناحية الشركة دي

مع إن ممكن قوي إن الدكتور عرف المشكلة بتفاصيلها من التحاليل والأشعات مثلا، وموظف خدمة العملاء عرف المشكلة من البيانات اللي عنده.. وحلوا المشكلة بصورة ممتازة
لكن حل المشكلة مش هو كل حاجة زي ما شفنا.. المهم هو الاستماع الفعال
***********
الفراعنة رأيهم إيه بقى؟

في نصائح "كامجني" و"بتاح حتب" للقضاة هنلاقي
:
اجعله يسترسل في كلامه على سجيته حتى تقضي حاجته التي أتى من أجلها إليك. فإنه إن تردد في أن يفضي لك بما في قلبه قيل: إن القاضي يظلم من لا يستطيع رد الظلم عن نفسه.. لكن القلب الحاني العطوف، يستمع ويصغي عن رغبة
***********



طيب.. لو إنت بقى في حوار سلبي مع واحد... يعني قاعد يغلط ويلخبط في الكلام وقاعد بيخبط فيك.. يبقى إيه الحل؟
فيه تجارب أثبتت إن
:
لو حد كلمك بصوت منخفض.. هترد عليه بصوت منخفض
لو حد كلمك بصوت عالي.. هترد عليه بصوت عالي
ليه بقى؟
الاتصال بين اتنين بيبقى زي سلكين متوصلين بينك وبينه.. سلك بيرسل بيه رسايله ليك، وسلك بترسل إنت بيه رسايلك ليه
لو حصل والفولت بقى عالي في السلك بتاعه وابتدا يوصل لك طاقة سلبية..زعيق وشتيمة مثلاً.. بطريقة أوتوماتيكية هتلاقي إن الفولت بقى عالي في السلك بتاعك إنت كمان، وهترد بنفس الطريقة
ويفضل يعلّي في الفولت، وإنت تعلّي في الفولت..... لحد ما يحصل ماس كهربائي وتنفجروا في بعض، وممكن تخسروا بعض
يبقى الحل إيه في الحالة دي؟
هل الحل هنا إنك تعلي الفولت بتاعك؟
لأ طبعا.. ليه؟
لأنه هيعلي الفولت بتاعه هو كمان زي ما عرفنا

يبقى لو علا الفولت بتاعه.. الحل إيه؟
الحل ببساطة:
اسحب السلك بتاعك وماترسلش ليه أي رسائل خالص
بكده الفولت هينخفض ويخلص الموضوع
***********


حكمة
اصمت تماما وماتستمعش لأي رسائل سلبية بيرسلها الطرف التاني.. لأن الفولت لما بيعلا في ساعة الغضب بيبقى الكلام مش مقصود خالص، فما تردش عشان ماتعليش الفولت وتغلط إنت كمان
لا تردد كلاما قيل في ساعة غضب ولا تصغ إليه، لأنه خرج من بدن أحمته ثورة الغضب. وإذا أعيد هذا الكلام عليك فلا تستمع إليه، بل انظر في الأرض ولا تتكلم في شأنه، فيخجل من هو أمامك ويعرف الحكمة
شفت لما تسكت يحصل إيه؟ هيتكسف ويسكت هو كمان
ممكن واحد حمقي شوية يطلع يقول لي: يعني أسكت له؟؟ لازم أأدبه
نرد على أخينا الحمقي ده ونقول ببساطة: الحل برضه إنك تسكت وماتردش عليه.. يعني لو بصيت له بثقة ولغة جسمك كان فيها ثقة.. هنتكلم بالتفصيل الممل عن لغة الجسد.. وفضلت ساكت وسبته ومشيت، هيقلق منك ألف مرة أكتر من لو رديت عليه وقعدت تجعجع.. وممكن ييجي يعتذر لك بعدها
إن التمساح الصامت يحدث الفزع في النفوس
- من تعاليم أمنوبي -

***********
حاجة كمان من فضائل الصمت أثناء أي حوار.. وهي إنك تفهم اللي قدامك بيفكر ازاي وتقدر تتعامل معاه على هذا الأساس، وتتواصل معاه بصورة أفضل.. وعلى هذا الأساس هتتصرف معاه لأنك عرفت طريقة تفكيره وهو ماعرفش لسه إنت بتفكر ازاي
المدير بتاعك: شفت ماتش الأهلي والزمالك امبارح؟؟ كان ماتش غريب
انت: فعلا يا افندم .. الزمالك يستاهل اللي جراله
المدير: يستاهل اللي جراله؟؟ أنا زملكاوي يا ولد.. روح إنت مرفود

طيب لو سكت وسمعت شوية إيه اللي هيحصل؟؟
المدير بتاعك: شفت ماتش الأهلي والزمالك امبارح؟؟ كان ماتش غريب
إنت..ابتسامة وهزة رأس
المدير: الزمالك اتغلب رغم إنه لعب كويس.. أنا زعلت قوي
إنت (بعد ما فهمت): يلاّ معلش يا افندم .. هي الكورة كده

عرفت بقى الاستماع الفعال عمل فيك إيه قبل ما تتسرع وتصدر أحكام؟
***********
لا تتآمر ضد زميلك في المحاورة
بل انظر ماذا يفعل
ومن جوابه سوف تفهم
وكن هادئا، وعندئذ تأتي معرفتك
ودعه حتى يفرغ ما في قرارة نفسه
إنك لا تعرف تدابير الله ولا ما يأتي به الغد
فاجلس بين يدي الله
- من تعاليم أمنوبي -
***********



عرفت بقى؟ كمان يا عزيزي لو سكت وفضلت تسمعه هتعرف النظام التمثيلي بتاعه بالتفصيل
وطبعا ده هيفيدك جدا
هل معنى كده إننا نفضل ساكتين على طول الخط ومانتكلمش؟؟
لا طبعا... الكلام ده موضوع تاني خالص...
هنقوله الحلقة الجاية.. فابقوا معنا
***********
بقلـم: د.شـريف عـرفة

[أحمد عمر]

أكتر حاجة الناس بتحبها إنها تلاقي حد يستمع لهم باهتمام وهم بيتكلموا.. وبيحبوا ويقدروا الشخص ده جدا، حتى لو ماتكلمش أساسا
فخليك إنت الشخص ده

حكمة
إذا كنت بين جماعة من الناس، فاجعل حب الناس هدفك.... فيحسن ذكرك، دون أن تتكلم

لكن حل المشكلة مش هو كل حاجة زي ما شفنا.. المهم هو الاستماع الفعال

إن التمساح الصامت يحدث الفزع في النفوس

روعه بجد
يانى كنت فين من زمان
وفين دكتور شريف
افضل انك تشاركنا به ف منتدى تطوير الذات
دمتم بعافيه

[Ahmad Misk]

روعه بجد
يانى كنت فين من زمان
وفين دكتور شريف
افضل انك تشاركنا به ف منتدى تطوير الذات

دمتم بعافيه

هههههههههههههههههه
شكرا يا احمد على الرد
انقله زي ماانت عايز
نورت الموضوع

[طيف عابر]

فعلا الموضوع روعه ومهم جدا ومفيد كمان يعنى انا قرأته للنهايه ووجدت ان كل ما فيه صحيح وواقعي ان تستمع للنهاية سيجعلك تفهم اكثر ويجعل محدثك يرتاح لك اكثر وبالتالي تستطيع ان تتواصل بطريقه صحيحة وتكسب الاصدقاء والاحترام شكرا لك بانتظار الباقي

[Serag Magdy]

والله يا ابني مفيش كلمة اتقالت وهي غلط
كلامك كله صح والف الالف
تسلم يا جميل

[Ahmad Misk]

فعلا الموضوع روعه ومهم جدا ومفيد كمان يعنى انا قرأته للنهايه ووجدت ان كل ما فيه صحيح وواقعي ان تستمع للنهاية سيجعلك تفهم اكثر ويجعل محدثك يرتاح لك اكثر وبالتالي تستطيع ان تتواصل بطريقه صحيحة وتكسب الاصدقاء والاحترام شكرا لك بانتظار الباقي

لا شكر على واجب يا طيف
شكرا على الرد
نورتي

[Ahmad Misk]

والله يا ابني مفيش كلمة اتقالت وهي غلط

كلامك كله صح والف الالف

تسلم يا جميل

شكرا على الرد يا سيراج
نورت الموضوع

[BA7IBAK YA BOY!]

يا ماشاء الله يا ماشاء الله
ايه كل ده
بجد موضوع جامد جدا
تسلم يا جميل علي الموضوع

[Ahmad Misk]

يا ماشاء الله يا ماشاء الله

ايه كل ده
بجد موضوع جامد جدا

تسلم يا جميل علي الموضوع

تسلم ايدك على الرد
نورتي الموضوع
شكرا على الرد