يا عم سيبك

**m.chezoo** · 25 - 2 - 2009, 06:49 AM

يا عم سيبك...انت اللى هتغير الكون......... دع الخلق للخالق....... طنش...
كان غيرك اشطر...وانا مالى خلينى فى حالى.... الحيطان ليها ودان... الباب اللى يجيلك منه الريح سده واستريح........ هو العمر بعزقه....... الجرى نص المجدعه....اجرى يا ابن ادم جرى الوحوش غير رزقك لن تحوش.....مايقدر على القدره الا الخالق..... وهو الكلام كان بيعمل ايه...
يا عم كلام جرايد.... وهو صوتى الا هينجح ويسقط فلان ماهو ناجح ناجح... ان فاتك الميرى اتمرغ فى ترابه...معاك قرش تسوى قرش..................... الخ
السلبيه فى حياتنا انتشرت بصوره ملحوظه... فى كل المجالات...فى الاتوبيس كنت تشوف راجل كبير او ست حامل او انسان مريض تلاقى كام واحد قام من مكانه علشان يقعده.. دلوقتى بقينا نعمل نفسنا مش واخدين بالنا او نتوه لغاية ما حد يقوم... ولو مفيش حد عبره يبقى خلاص انا بعيد ماهى الناس كتيره اشمعنى انا...
فى الشغل.. لو زميلك غاب يوم مش مهم الناس تتعطل وفيه مليون حجه.. ده قافل على الدولاب بتاعه...روح للمدير مش مسؤليتى.. ولو المدير كلفه بشغل زميله.. شوف بيعامل الناس ازاى ولا عبيد عنده ووشه مقلوب...
فى الشارع.. شوفت خناقه تاخد بعضك وتهرب من المكان.. ولو انت فضولى شويه هتتفرج من بعيد ولا تفكر تحل المشكله ولا تخلصهم من بعد...
ولو شوفت واحده بنت بتتعاكس يا تعاكسها اهوانت اولى واد روش طحن وانضف من اللى بيعاكسها الف مره.. يا تطنش وتسب وتلعن فيها .. ماهى لو ماشيه عدل او لابسه كويس ولا كان حد قالها كلمه....
مع الجيران... لو ابنك ضرب عيل ابن جارك.. تهدى ابوه وتقوله يا عم شوية عيال هنعمل عقلنا بعقلهم.. ولو ابنك جالك بيعيط ويقولك حماده ابن عمو حسين جارنا ضربنى.. يا ويله وويل ابوه. يقولك شوية عيال.. تقوله ابنك عيل ده شنبه فى وشه قد كده.. وتحصل خناقه لرب السما..
فى المسجد.. يا دوب تييجى والمؤذن بيقيم الصلاه.. وتخطف الركعتين زى ما بنسمع وتقوم رهوان علشان تلحق الماتش...
فى رمضان.. يا عينى على التقوى والورع.. ايه الحلاوه دى.. بتصلى الوقت بوقته.. والسبحه فى ايدك على طول.. وانت فى الشغل هتموت على نفسك وبوزك شبرين.. ولو حد فتح بقه معاك بكلمه مش على مزاجك نهاره اسود ...
وفى العيد... صلاة العيد.. ده لو صلتها..وقلب فى الدش وانفخ سجاير ولعها ولعها...وهى لفتين على كام واحد من العيله وانسى..
كفايه كده... انا طولت عليكم يعنى كلامى هيجيب فايده ما احنا من زمن الزمن بنقول الكلام ده..
يا عم سيبك

**zezo1** · 25 - 2 - 2009, 07:47 PM

موضوع جامد
بس مش كل الناس كدة
وعمر الكلام مكان من غيرفايدة
لوكل واحد غير من نفسة هنكون أعظم الأمم

**عاشقة الرومانسية** · 25 - 2 - 2009, 08:19 PM

مش معاك يا زيزو عشان فعلا الناس كلها بقيت كده ودى حاجة ملحوظة جدا فعلا انتشر اوى موضوع الطناااش بشكل مباشر وعينى عينك ياترى العيب من مين المشكلة بقى انهم بيعيبوا على الدنيا ويقولولك الدنيا بقت وحشة مهى الدنيا دى اللى هى انا وانتى وانت وهو وهى يعنى الناس يعنى البشر عارف والله لو الناس دى كلها شالت من قلبها الشر وحطت الخير والامان فى قلوبها هاتتعامل كويس كان الراجل قام للست الحامل وكان الشاب حافظ على اخته اللى بتتعاكس وكان الموظفين راعوا ربنا فى شغلهم وصحوا ضميرهم عارف مالهاش غير حل واحد بس
نتصالح مع ربنا ثم نفسنا وعمليه بسيطة اوى كده نشيل الشر والظلم ونحط الخير والامان والتفائل ويعم السلام
امين يارب العالمين ربنا يصلح الحال يارب

شيزو سورى يا قمرى طولت عليك بس بجد تسلم ايدك موضوع جدير للنفاش ربنا يجازيك خير

**zezo1** · 25 - 2 - 2009, 08:36 PM

برضة مش كل الناس بس للأسف الأغلبية يمكن عشان مجتمعى مختلف شوية أناشايف كدة إنما لو الكلام على العاصمة فحدث ولا حرج معكم كل الحق
الحمدلله إنى صعيدى

**No TiMe** · 25 - 2 - 2009, 08:54 PM

فعلا يا عم سيبك خدنا ايه من الكلام دا كلو بيتقال وبيتعاد محدش بيسمع كلو مقضيها دش وحشيش وسجاير والناس بتتدبح بجد موضوع جميل مصطفي وكلام كلو صحيح وجميل تقبل مرروري المتواضع دا

**esra2** · 26 - 2 - 2009, 05:08 PM

انا معرفش مين حماده ابن عمو حسين بس ما علينا
بأمانه مشفتش حد بيتكلم بصراحه كده

**شمس** · 28 - 2 - 2009, 07:45 PM

أديك قلتها مصطفى
يا عم سيبك
الكل عامل أف لاين
مشكووووووور شيزو

**mona roshdi** · 28 - 2 - 2009, 08:11 PM

للأسف دة اللى بنشوفة شيزو كلة يقولها ...سيبك
واللى بقى اكتر من كدة ....والمصيبة الكبيرة انك تشوف ناس ياسلالالالام بتنصح وورع وعاملة انها لا تخطئ ولكن للاٍسف عاملين ذى النعامة اللى بتدفن رأسها ومش شايفة ان الناس شيفاها
بجد بقينا عايشين فى مجتمع فعلا فية اختلاف فظيع
ياتلاقى اللى بيعرف ربنا ويتقية فى كل تصرفاتة ...وربنا بيقف بجانبة ولكن

البشر دائما فى انتقاد لة على طول الخط مش ممكن بيسبوة فى حالة

او المرأة الملتزمة ولكن اخى محدش بيسيبها فى حالها

فى النهاية عاوزة اقولك ان فية ناس موجودة فى الدنيا بس علشان تقعد تنتقد تصرفات الغير
ودول ربنا يرحمنا منهم

ياريت ياريت نقرب كلنا من ربنا ونحب بعض شوية
اتمنى ان كل الناس ذى مابيعمرو ويبنو بيوت يبنو انفسهم ويعمروها بلحب حب الله ورسولة اللى حيخليهم يحبو بعض ويخافو على بعض

موضوع جدير بلنقاش من انسان فعلا دكتوراة فى الحوار

شكرا لك يامصطفى

الموضوع: يا عم سيبك

أدوات الموضوع

يا عم سيبك

معلومات الموضوع

الأعضاء الذين يشاهدون هذا الموضوع

المواضيع المتشابهه

سيارة التعليم : سق بنفسك السيارة وتعلم مباشرة قيادة السيارة

الكلمات الدلالية لهذا الموضوع

ضوابط المشاركة