أروح لمين ..!! ( مع الإعتذار للست أم كلثوم )

[Hooba]

أروح لمين؟



إحنا في البلد دي مالناش كبير..

أنا أقصد يعني في أوقات الحوادث الفردية ..تحس إن الواحد كده لوحده وعامل زي اليتيم اللي ما رحش معاهم رحلة دريم لاند بتاع كل سنة ..
أتحدث عن ثقافة الشكاوى..
في بلدنا الحبيب إذا كنت مواطن من المواطنين الخايبين اللي بيؤمنوا بالحل السلمي لجميع المشكلات
( و الكلام ده مابيبقاش أخلاق و تربية ده بيبقى بعيد عنك قصر ديل وأنيميا و سوء تغذية)

..إذا كنت واحد من دول فاطمئن عمرك ما هتلاقي حد يغيتك و لا يجيبلك حقك الضايع حتى لوماكنتش من المؤمنين بالحكمة الخالدة اللي بتقول
(إبعد عن القضايا لتتبهدل يا ضنايا)

و نفسك و منى عينك تعمل شكوى في حد ..برضه مش هتعرف


مش مصدقني ..طب فكر كده ..لو كنت في ميكروباص و قرر السواق أن يشترك في الحملة القومية الشعبية (4 ورا) و ظلما و بهتانا حبيت تعترض ..تروح لمين؟..

لو سواق التاكسي فجأة قرر يرميك في وسط الشارع عشان سولت لك نفسك الدنيئة إنك تديله جنيه فضة وسط أجرته المضروبة غالبا في 3 ..عايز تستعيد كرمتك المتكعورة على الأسفلت ..تروح لمين؟..

أكلت في يوم قشر بطيخ مقلي على إنه سبيط و قطع من الكانتلوب مسمينها أناناس والغشاشين الظلمة اللي مش هيوردوا على جنة و لاعلى نار إدوك جوينت ملوخية خضرا على إنها بانجو مفتخر..تروح لمين؟..

سمعت سارينة عربية إسعاف و من قلبك الرهيف إنحرفت توسعلها الطريق و خبطت في عامود و بعدها إكتشفت إن العربية فاضية و كل الحكاية إن السواق كان عايز يركن عشان ينزل يجيب سندوتش حواوشي ..عايز تشتكيه ..تروح لمين؟..

لقيت موس حلاقة في رغيف عيش و ضميرك صمم إنك لازم ترجعه لصاحبه (أمال دي أمانه) ..تروح لمين؟..

بدأت تلاحظ إن ودانك مش بتطول بالمعدل الطبيعي و كذا مرة مراتك تقولك إن صوت نهيقك و انت نايم ما بقاش زي الأول ..شاكك في صاحب المخبز اللي جنبكوا ليكون بيغش في الدقيق و بطل يضيف نسبة علف الحيوانات اللي مقرراها الوزارة ..تروح لمين؟..

جيرانك بدأوا يلاحظوا إختفاء جماعي للحمير في المنطقة المحيطة بمحل الكفتة اللي على أول الشارع و انت عايز تمنعهم يبلغوا و يحرموك من سندوتش الكباب و الكفتة أبو 75 قرش ..تروح لمين؟ ..

جالك إنهيار عصبي و تصاب بكوابيس مستمرة بعد مشاهدتك لإعلان (ممدوح فرج) للتخسيس و خايف تفتح التليفزيون من يوميها ليمد إيده يجيبك من قفاك..تروح منه فين و لمين؟..

جارك عامل فرح بنته و معلي صوت الميكروفون عشان يسمع حبايبه في زحل و حبايب العريس في المريخ ..نفسك ترفع سماعة التليفون و تطلب النجدة ..لكن على مين؟..مش أنا مرة عملتها؟..الظابط قاللي إقفلي الشبابيك ..لما قلتله الدنيا حر و هنتخنق ..قاللي إعملي جمعية و إشتري تكييف ..آه و النعمة زي ماباقولك كده ..


غني معايا بقى و بصوت عالي و من غير ما حد ما يرد علينا إحنا الإتنين..أروح لمين و أقول يامين ..ينصفني منك ..ينصفني منك.

[Serag Magdy]

يا ابني يا حبيبي
يا حبيبي يا ابني
محدش قالك ان الشكوي لغير الله مذلة؟
المشكلة ان احنا خلاص اخدنا ع كدة
تسلم يا معلم الثيرد الجامد ده

[Hooba]

ماشي يا عم .... نمشي جنب الحيط .... لأ .. جوه الحيط عشان خاطرك يا قمر

[عاصم مهدلي]

ونسيت اذا ما سولت لك نفسك وتعدي شارع حتلاقي سواق توك توك خبطك وقلت لنفسك اطلع على الرصيف ولا وانت ماشي على الرصيف وطلعلك عسكري المرور وعملك مخالفة السير بدون رخصة ولا دفعت فاتورة تليفون مبالغ فيها جدا وانت الحقيقة اضطررت للدفع والا الحبس في انتظارك وبتوع تنفيذ الاحكام جايين عشان ينفذوا الحكم وتحلف لهم انك معندكش تليفون ... ومفيش فايدة .. ولازم تدفع احسن يشيلوا لك العدة .وعشان تروح القسم يا معلم لازم تعمل تمرينات استطالة لعضلة القفا والا حيجيلك شد عضلي في قفاك
ياعم الله يرحمه سعد باشا