اولى حلقات سوبر هلالى

[الهلالى كريم]

أعزائى اعضاء مصراوى كافيه يسعدنى ان انضم اليكم عضوا جديدا فى هذا المنتدى ويشرفنى ان انقل لكم سلسلة حلقات من تأليفى متمثلة فى برنامج الهلالى ع المصطبه وبرنامج انا والنجوم وقفاك وحلقات سوبر هلالى التى سأبدأ بها واتمنى ان تنال رضاكم

اولى حلقات سوبر هلالى
سوبر هلالى ماسك ربابه , والكل فاكره عاشق صبابه , أو شىء وخارق , وبتاع مغامره , داه بسيط ويمكن , أقل منكم , بس الحكايه انه هيرفض , يكون منافق , أو صف فاسق , أو حتى لعبه فى ايد ديابه .


سوبر هلالى انسان بسيط , هيحكى قصه , مش هيجيب جديد , ساعات كتيره هيعيد ويزيد , فى حاجه بينا وغلط أكيد , بس المصيبه مفيش حد عايز يبص زيه لمكان بعيد


فمع اولى حلقات سوبر هلالى


كالعادة ومن زمان , بيلف سوبر هلالى فى كل مكان , بيتفرج ع الدنيا وأحوالها , عاوز يعرف الناس ايه اللى جرالها , وايه شقلب كيانها وغير أحوالها .


وفجأة شاف من بعيد سواق توك توك بيجرى بسرعه , قال لنفسه اكيد فيه شىء غريب أكيد , يلا بينا طير بسرعه وحصله , قبل ما تيجى طوبه تحت عجلة التوك توك وتقلبه وكمان تكسره .


وبسرعه زى الريح لحق سواق التوك توك ووقفه , بعد مغامره مثيره , فى شوارع منيا القمح الكتيره .


ولقاه عم امام سواق التوك توك الهمام , يلا بينا نشوف ايه اللى دار بين سوبر هلالى وعم امام .


عم امام : سيبنى ياسوبر هلالى الله يخليك , انا واقع فى عرضك وبتحامى فيك , لو ماسيبتنيش هيتخرب بيتى وعيالى هيدعوا عليك , يلا بقه ياسوبر هلالى انا مش هتحايل عليك .


سوبر هلالى : ياحرام ايه الحكايه ياعم امام .


عم امام : الحكايه زى كل يوم , ظابط مرور واقف مغرور , ونافخلى كرشه , وقدامه طابور .


سوبر هلالى : وعايز منك ايه ياعم امام , اكيد انت غلطت ومش ماشى تمام .


عم امام : وداه بردو اسمه كلام , انت مش عايش فى البلد دى ولا مسافر من زمان , سعادته عاوز منى فلوس , عشان يروح اخر النهار وجيبه متروس , يجيب لبيته ما لذ وطاب ,وانا سايب بيتى حالته هباب ,واولادى بياكلهم الناموس , مش لاقى حتى ثمن الدروس , للبت عزة والواد محروس , عاوزهم يبقوا دكاتره , مش زى ابوهم المنحوس .


سوبر هلالى : وبعدين ياربى , والعمل ايه دلوقتى , اسيب عم امام يهرب أوام , من الظابط المقدام , اللى علموه فى الكلية , ازاى يتفنن فى الأذية , وازاى ينصب خليه , يوقع فيها السواقين الغلابه , ويسيبه من رجال الاعمال الديابه , عشان بتليفون هيودوك تعد النجوم .


طب اعمل ايه ياربى , والزنب داه مش زنبى , داه زنب دوله بحالها , العدل غاب عن بالها .


يلا بسرعه ياعم امام , روح بيتك وارجع أوام , أكيد ام محروس , منتظره منك الفلوس , عشان تجيب الغموس , وتدى حق الدروس للبت عزه والواد محروس .


" يارب مانحتاج ظباط ينظموا المرور , عشان جيوبنا ماتستحملش اكتر من حق العيش والفول "


مع تحيات كريم هلال
كلية الهندسة - جامعة الزقازيق

[الهلالى كريم]

هبدأ أولى حلقاتى بموضوع يهم كل الشباب مين منكم ياشباب ماخدشى بالقلم على قفاه مين منكم ماحبش بنت وطلعت ولا مؤاخذه مين منكم ماسهرش الليل يفكر فى واحده وآخر السنه جاله جواب شكر من المدرسة أو الكلية مين ومين ومين على رأى الأستاذه سهير البابلى والكابتن أحمد بدير وينج ليفت مركز شباب زينهم طبعا نسبة 99 % مننا حصلتله التجربه الجميله دى وخد على قفاه

وانا الحمد لله كنت من السباقين فى هزا المجال وخدت وسام الاستحقاق من الطبقه الأولى سلمهولى اتنين صايعين واحنا قاعدين ع القهوة بنلعب طاوله



المهم ان كلكم لازم تسمعوا نصيحتى فى الموضوع داه وعلى رأى المثل اسأل



مجرب ولا تسألش غفير



في الأول أنا معجب باسمه ايه داه أسامه منير عشان كده هسمى سلسلة حلقاتى




أنا والنجوم وقفاك




أحيانا يخطىء القلب ولكن أبدا لا يخطىء العقل حين يختار أن يذهب القلب لمن



يستحق فهل يستطيع أن يفعل العقل هذا ؟ هل يستطيع أن يروض القلب ؟هل

يستطيع أن ينسيه جراحه؟



ومعاكم برعى أمشير وبرنامج أنا والنجوم وقفاك وبنقول ألوووووو



طبعا ماحدش هيتصل عشان احنا مش ع الهوا احنا ع النت يعنى ياريت تبعتولى



ايميلات بس ياريت تكون من بنات بس عشان بصراحة ريحة الايميل بتبقى حلوه



ونبدأ حلقتنا ونقول ,,, أسئلة كثيرة حائرة تحتاج منا الإجابة



يعنى مثلا ممكن ولد يحب بنت وهو عارف انها ماتستحقش الحب داه ؟



ممكن ان الولد يضحى بكل حاجه فحياته وبمستقبله عشان يعجب الست هانم



ممكن يتنازل عن كرامته عشان يفرح لحظة بقربها



يعنى باختصار ممكن تحب حيوان وانت عارف من البدايه انه حيوان
هنتظر اجابتكم على قفاك آت نايل راديو برودكشن دوت نص كوم




أنا شامم ريحة ايميل حلوه جالى من ......... بتقول هاي برعى اذيك عامل ايه انا



بموت فيك وبحب البرنامج بتاعك جدا

ميرسى خالص يا ........ ورقم تليفونى هتلقيه فى الكنترول روم هستنا منك



مكالمه أول ما أخلص البرنامج ولا أقولك بلاش نكمل البرنامج وهستنا منك



تليفون دلوقتى



وداه ايميل تانى وصلنى من واحده بتقول هاى برعى طبعا أنا ماعتقدش ان فيه



حد يحب شخص تاني سواء ولد أو بنت وهو عارف انه مايستاهلش الحب داه



وانه شخصيه مش كويسه



وبرد عليها وبقولها أسف لأنك مش فاهمه معنى الحب ,,ومش هنكذب على



بعض الحب داه حاجه روحانيه والروح من الأشياء اللى لا يمكن التحكم فيها



أو تخضيعها لقوانين المادة يعنى أبسطهالك ماحدش يقدر يقول لقلبه هتحب داه
ومش هتحب داه ,,,,المهم ان السؤال هنا صاحبنا بالله وقع فغرام وحش مش بنى




آدم عشان مش قادر يسيطر على قلبه اللى حبها طب يعمل ايه بعد الفاس ماوقعت



فى الراس هنا ييجى دورى ,,, ومن خلال تجاربى اقولكم ع الحل

أعتقد أنه يوجد كبسولة مسكنة لآلام الحب ..آسف أخطأت التعبير بل يوجد



صيدلية كاملة لتسكين آلام الحب وسأبدأ بشرحها لكن فى الحلقه القادمه
منتظر تفاعلكم وردودكم لاكمال باقى الحلقات والنقاش فيها