اولى حلقات الهلالى ع المصطبة

[الهلالى كريم]

عزيزي القارىء عزيزتى القارئة يسعدنى أن أقدم لكم سلسلة حلقات الهلالى ع المصطبة وهي

عبارة عن متابعة لآخر الاحداث المحلية والعالمية ولكن بطريقة

ساخره حيث عادة من يجلس ع المصطبة أن يأتى بأخبار من اليمين

تارة ومن الشمال تارة أخرى

وأبطال حلقاتنا هم شخصيات وهمية تتجدد حسب الخبر الموجود

حيث يقوموا برواية الحدث كما رأوه ويقوموا بتحليله حسب وجهة

نظرهم ونأسف للمتضررين فسنتناول بكتاباتنا جميع الأوساط سواء

فنيه أو أدبيه أو رياضية أو سياسيه فالجميع يعرف أن الحديث ع

المصطبه ليس له حدود وعفوا أيها القانون
هذه الحلقات من تأليفى وسبق لى تقديمها فى منتديات اخرى ونالت اعجاب الكثير ولكنى آثرت ان انقلها الى منتداكم هذا واتابعكم بالجديد نظرا لأنى احببت هذا المنتدى

فالى أولى حلقاتنا

كعادة أهل القرية يجتمعون ع المصطبة في وقت العصارى للحديث عن أسرار بيوتهم ونشر غسيلهم الى الملأ اجتمعت مجموعه من نساء أهل القرية للجلوس ع المصطبة والحديث عن أخر الأخبار
بدأت الحديث الست ام زينهم وكلنا عارفين طبعا زينهم ولد مثقف وبيقعد ع النت كتير وقالت
أم زينهم : ياختى الواد زينهم انبارح بيقولى ان مصر باعته تتحايل على ألمانيا عشان يجيبوا راس نفرتيتي اللي سرقوها مننا


أم عتريس : ياختى والنبي أولاد حلال هما مسكوا الحرامي اللي كان بيسرق انبارح في أخر الشارع واسمه ألمانيا كمان

أم زينهم : يا ام عتريس بقولك ألمانيا دي بلد مش واحد

أم عتريس : وماله ياختي ألمانيا القمح مانا عارفاها هو انا جاهله طب والنبي انبارح أبو عتريس كان هناك وجابلنا حاجات حلوه وهو جاي

أم زينهم :لأ يا أم عتريس ألمانيا دي بلد كبيرة والله أعلم دي بلد خواجاتى من اللي فيها النسوان بيلبسوا حاجات حلوه ,,

أم عتريس : مش النسوان دول اللي عينهم زايغه وبيسرقوا رجالتنا هما سرقوا كمان راس نفرتيتي طب الحمد لله ان راس أبو عتريس
ماتسرقتش منه هو كمان

أم زينهم : يا ختي وهما هيعملوا ايه براس ابو عتريس بتاعك دي هتيجي ايه جنب راس نفرتيتي


أم عتريس : أيوة منا عارفه ان راس نفرتيتي جنب راس محمد وراس ابو عتريس بعيده عنهم خالص

أم زينهم : يابت بيقولولك راس نفرتيتي دي كلها دهب وألماظ وحاجات حلوة من اللي السياح بييجوا يتفرجوا عليها ويدفعوا فلوس

أم عتريس : طب والنبي راس أبو عتريس من بعد ماجابلها البتاع اللي اسمه شامبوا دي تتفرجي عليها زي العسل ونضيفه
بس قوليلي مصر بتتحايل عليهم ازاي وهما سارقينها هي الحكومه بيتسرق منها حاجه الا لما تجيبها

أم زينهم : لا طبعا مش كل حاجه الكلام داه لو دكرين بط أبو عتريس سرقهم وهو بيتمشا ع السطوح بتاع الست أم شوشو لكن ألمانيا دي حاجه تانيه

أم عتريس : طب وألمانيا عملت ايه؟
أم زينهم : ألمانيا خايفه والنبي من شغل العيال وانتى عارفه الخواجات طول عمرهم جد ومايحبوش الهزار ,,,خايفين يجيبوهالنا مصر نتفرج عليها نطلع عيال ومانرجعهاش تاني

أم عتريس : هي مش بتاعتنا يعني المفروض ناخدها


أم زينهم : بس ألمانيا بتقول احنا اشتريناها منكم مش سارقينها

أم عتريس : والنبي جدعان اللي باعوها دول بس هما مين اللي باعوها

أم زينهم : يعني مش عارفه مين اللي باعوها يا أم عتريس أكيد اللي مايتسموش ربنا يجعل كلامنا خفيف عليهم

أم عتريس : يعني هما يبيعوها ويرجعوا يعيطوا ويقولوا عاوزينها تانى والنبي شغل عيال وانا ماحبهوش

أم زينهم : ياستي عقبال الهرم وابو الهول

أم عتريس : والنبي أحسن هما مش عمالين يغنوا ويقولوا عاوزينها تبقي خضرا أهوا الاجانب هيشيلوا كل الحجاره اللي فمصر ويسيبولنا
الارض فاضيه واحنا وشطارتنا نزرعها ولا مانزرعهاش هما مالهم

أم زينهم : والنبي عندك حق ع الأقل اولادنا اللي مش لاقيين شغل ولا سكن يلقوا


أم عتريس : والنبي يا ام زينهم انتي فاضيه واحنا مالنا يسرقوا راس نفرتيتي ولا يسيبوها هو احنا نعرف حاجه عنهم ولا بنشوف من وراهم حاجه انا هقوم اشوف شغلي ياختي انا حاطه الباميه اللي ابو عتريس بيحبها ع النار زمانها اتحرقت افوتك بعافيه ياختي

أم زينهم : والنبي عندك حق بس انا قلت اقولك وادينا بنتسلا علي ما
ابو عتريس ييجي هو وابوا زينهم ونقوم نحطلهم الأكل يطفحوا

عفوا أيها القانون
سلبوا منكم الرأس بسهوله لأنهم سبقوها وسلبوكم العقل


الى اللقاء في حلقات قادمه

[شاعر]

توبيك جميل ورائع

اشكرك