من حسنى مبارك إلى شعب مصر (بقلم احمد فؤاد نجم )

[saso164]

من حسني مبارك .. إلى شعب مصر

بقلم : أحمد فؤاد نجم



ياشعبي حبيبي ياروحي يابيبي ياحاطك في جيبي يابن الحلال



ياشعبي ياشاطر ياجابر خواطر ياساكن مقابر وصابر وعال



ياواكل سمومك يابايع هدومك ياحامل همومك وشايل جبال



ياشعبي اللي نايم وسارح وهايم وفي الفقر عايم وحاله ده حال



احبك محشش مفرفش مطنش ودايخ مدروخ واخر انسطال



احبك مكبر دماغك مخدر ممشي امورك كده باتكال



واحب اللي ينصب واحب اللي يكدب واحب اللي ينهب ويسرق تلال



واحب اللي شايف وعارف وخايف وبالع لسانه وكاتم ماقال



واحب اللي قافل عيونه المغفل واحب البهايم واحب البغال



واحب اللي راضي واحب اللي فاضي واحب اللي عايز يربي العيال



واحب اللي يائس واحب اللي بائس واحب اللي محبط وشايف محال



واحبك تسافر وتبعد تهاجر وتبعت فلوسك دولار او ريال



واحبك تطبل تهلل تهبل عشان مطش كوره وفيلم ومقال



واحبك تأيد تعضض تمجد توافق تنافق وتلحس نعال



تحضر نشادر تجمع كوادر تلمع تقمع تظبط مجال



لكن لو تفكر تخطط تقرر تشغلي مخك وتفتح جدال



وتبدأ تشاكل وتعمل مشاكل وتنكش مسائل وتسأل سؤال



وعايز تنور وعايز تطور وتعمللي روحك مفرد رجال



ساعتها حجيبك لايمكن اسيبك وراح تبقى عبره وتصبح مثال



حبهدل جنابك وأذل اللي جابك وحيكون عذابك ده فوق الاحتمال



وامرمط سعادتك واهزأ سيادتك واخلي كرامتك في حالة هزال



وتلبس قضيه وتصبح رزيه وباقي حياتك تعيش في انعزال



حتقبل ححبك حترفض حلبك حتطلع حتنزل حجيبلك جمااااال

[ملكة القلوب]

[كابوس الحرامية]

ههههههههههههههههههههه حلوة جدا هذه هي مصر

[zezo1]

تجيب جمال تجيب غير جمال
ما حالنا مال يتغير؟ محال
مابلدك خلاص مات فيها الرجال

[saso164]

بجد ميرسى قوى لمروركم الجميل
بجد نورتونى

[~ man neO ~]

ساعتها حجيبك لايمكن اسيبك وراح تبقى عبره وتصبح مثال

يا خبر هو بيكلم واحد ميت ده رئيس جمهوريه
بس صراحه قصيده هايله عاوزه صوت مطرب
ينشدها بس مين اللى يتجرا ويعملها

[احساس]

حتقبل ححبك حترفض حلبك حتطلع حتنزل حجيبلك جمااااال

تجنن ياعم أحمد أظن انتى الوحيد اللى الريس سايبك00بس بجد مش عارفه ليه؟؟؟؟؟
شكله نويهالك
بس بجد كلمات روووعه والكل مستنى ياباشااااااااااا جمال لما نشوف هيعمل فى أمنا ايه هو كمان
مرسى حبيبه قلبى على القصيده بجد بجد ملهاش حل00وانا اصلا بعشق كتابات الراجل ده اصلا

[spider2009]

لا
تعلـــــــــــــــــــــي ق

[ايمرى شوووو]

وانا برضة


لا تعليق

[shahe]

حتقبل ححبك حترفض حلبك حتطلع حتنزل حجيبلك جمااااال


فكرتينى بفيلم اللبمى بتاع اللى بالى بالك..تبقى حبيبى وكفأة انما تغلط اعصرك انزل منك عصااير مساجين صغيرة


هههههههه...لا تعليق يليق