حكايتى ومشكلتى..ارجو ابداء ارائكم

[eye-love-you]

الموضوع طويل شويه ..عايز وقت ..بس ياريت تقرأوه للنهايه

انا طالب جامعى فى سنه تالته

باختصار انا بحب بنت زميلتى

الحكايه ابتدت معايا كالآتى:

من أول ما دخلت الجامعه وانا كنت لما بشوفها كنت بحس ناحيتها بجاذبيه خاصه جدا معرفش ليه

بس لسه ماكانش فيه حب
المهم
مرت سنه أولى وتانيه ولما جت سنه تالته ..ومن حظى انها بقت معايا فى السكشن فبقيت اشوفها دايما

تطور الاحساس جوايا وزاد الاعجاب جدا بيها وتطور الى حب ..بس مكنتش بظهر الحب ده ..بس كنت احيانا ببص عليها وهى مكنتش واخده بالها..وبعد مرور ايم قليله ..فى يوم وانا خارج من السكشن مع واحد صاحبى وببص ورايا عشان اشوفها وهى خارجه لقيتها بتبص عليا بنظره قويه جدا وكأنها حست باهتمامى بيها..وانا فضلت ابصلها شويه وكنت مبتسم

وبعديها مشيت ..وتانى يوم لما كنت خارج من المحاضره ..كانت خرجت قبلى ..ولما خرجت لقيتها واقفه مع اصحابها ويتدور عليا وانا خارج

وانا كنت بدور عليها ..وجت عينيا فى عنيها تانى

المهم..فضلت النظرات مابينا دايما فى كل يوم اشوفها فيه

وبعدين انا فكرت وقولت لازم اكون ايجابى اكتر من كده عشان احافظ على حبها..وعشان انا للأسف خجول وهادى جدا بطبعى وهى كمان تعتبر زيى..فمحاولتش انى اكلمها..انما فكرت بطريقه تانيه خالص..فكرت بطريقه جديه شويه

حاولت اعرف اسمها بالكامل عن طريق السكشن وابتديت رحلة البحث عنها ..وحاولت اعرف هيا منين او ساكنه فين او اى معلومات عنها
فكرت انى امشى ورايا زى ماكل الناس بتعمل ..بس مجتليش الجراءه وخفت لا تشوفنى وتفتكر انى انسان مش مؤدب

جاتلى فكره انى اكتب اسم ابوها فى دليل التليفونات اللى على النت ..وفعلا لقيت رقم التليفون لنفس الاسم بس مكنتش متأكد قوى ومعرفتش اعمل ايه بعد كده
لحسن حظى وانا بكتب رقم التليفون على البحث فى جوجل لقيت من ضمن نتائج البحث ان الرقم ده مكتوب جوا الموقع الرسمى للجامعه بتاعتنا وجنبه اسم ابوها ولقيت انه شغال استاذ مساعد فى احدى الكليات..بصراحه فى الأول مصدقتش انه ممكن يكون ابوها بس لما شفت صورته لقيته فيه شبه كبير منها..فتوقعت انه يكون ابوها فعلا

فكرت بعد كده قولت انا لغاية دلوقتى ماستفدتش حاجه ففكرت وقررت انى اصارح والدتى بالموضوع ده عشان اختصر اللطريق

ومعرفش ازاى جاتلى الجراءه انى اخد القرار ده..المهم بعد عناء طويل من الاقناع قدرت انى اقنعها بالموضوع وانى اخليها تكلم ابويا كمان

وطبعا كنت خايف جدا..بس لما قالت لأبويا بصراحه لقيته على عكس ماتوقعت ولقيته اخد الموضوع بصدر رحب وقالى لو هيا انسانه كويسه ومحترمه واهلها ناس كويسين انا معنديش مانع انى اخطبك ليها.المهم اهلها يوافقوا بيك..وبالنسبه للحاله الماديه احنا الحمد لله حالتنا الماديه كويسه وعندناش مشكله من الناحيه دى.واتفقنا ان الكلام ده يحصل فى الاجازه

فرحت جدا ..وحسيت انى لازم اكون اكتر ايجابيه..وقررت انى اكلمها بس من غير مااصارحها
المهم فى يوم وانا خارج من السكشن خرجت قبلها واستنيتها ولما خرجت
وقفتها وقولتلها ..لو سمحتى ..فوقفت ولما جت عينى فى عينيها مقدرتش اتمالك نفسى ومقدرتش انطق بكلمه..بس بعد شويه كلمتها وعرفتها انى اعرف ابوها وان هو شغال فى كليه كذا وقولتها المعلومات اللى انا قريتها عنه على النت (وطبعا انا كان قصدى من الكلام ده انى اعرفها انى دورت وسألت عنها عشان تتأكد من حبى ليها) وبعدين قولتها ابقى سلميلى عليه ..قالتلى اسمك ايه؟ قولتلها اسمى ..بس قولتلها هو ميعرفنيش .انا اللى اعرفه بس(لحسن تروح تقوله ولا حاجه واروح فى داهيه)

المهم ..مشينا وانا كنت طاير من الفرحه انى شفت الانسانه اللى بحبها من قريب وعينيا جت فى عينيها ولسانى خاطب لسانى ..وبصراحه شفت فى عينيها الحب وانا بكلمها
وتانى يوم حسيت انها اتأثرت جدا بكلامى وانها بقت مشغوله بيا اكتر

وده كان اللقاء الوحيد حتى الآن مابينى ومابينها..وبعد كده رجعنا تانى نبص لبعض ..وكنت بحاول دايما ان مايفوتش يوم اشوفها فيه الا وانى اخلى عينيا تيجى فى عينيها

ومرت الأيام على الحال ده واحنا بنبص لبعض ..بس فى بعض الأحيان بحس انها بتقسى عليا شويه ..بس يترجع وتحن تانى على طول

والحكايه دى بقالها لغاية دلوقتى 5 شهور اهو والحال زى ماهو
ومش عارف هل استمر على الحال ده ..ولا اروح اكلمها..بس انا بصراحه خايف اكلمها عشان الفتره اللى جايه دى فترة امتحانات..ومش عايز اشغلها

انتو ايه رأيكو فى الحكايه دي؟
وايه المفروض انى اعمله؟

اسف انى طولت عليكم

[عاشقة الرومانسية]

الاول اهلا بيك معانا فى المنتدى نورتنا واحنا سعداء جدا بإنضمامك معانا ويارب نشوفك معانا على طول
بالنسبة لموضوعك انا مش شايفه منه غير ان الموضوع ماشى كده كويس اوى يعنى من كلامك انها تقريبا بتبادلك نفس الشعور حتى لما بتقول انها بتقسى عليك خلينا نقول انه تقل منها ودى طبيعه للبنات فعادى يعنى انها تتقل عليك شويه
انا شايفه ان المرحلة اللى جايه دى دورك انت خصوصا انك كلمتها وانها تقبلت منك الكلام ووقفت سمعتك للأخر وده معناه انها مستنيه منك اى كلام انا شايفه انك لازم تتكلم معاها وتصارحها بحبك وتثبت ليها انك انسان محترم وجاد وانك هاتدخل البيت من بابه بس انت مش عايز تتم خطوة عشان الامتحانات وطبعا الموضوع ده فى صالحها ولمصلحتها كلمها وفهمها انت عايز ايه منها وقولها على شعورك واحساسك ناحيتها
لازم بجد تواجهها المواجهه اهم شئ واسرع فى المواجهه عشان مش تندم بعد كده لما تضيع منك وبعدين اللى عايز حاجة بيسعى وراها
كلمها وصارحها وانا حاسه بجد انها هتفهمك وهاتكون من نصيبك خصوصا انها بتبادلك نفس الشعور
وربنا معاك
اختك ســــنــــــدس

[m.chezoo]

شوف ياصديقى ... البنت بطبعها بتحب الهدوء والخجل بس مش بالزيادة دى .. يعنى انت فتحت معاها حوار بتقفله ليه ليه مش بتصارحها بمشاعرك وتعرفها نيتك
وان انت داخل البيت من بابه وانك عرفت اهلك والحمد لله انهم موافقين
انا من راى انك تعرفها وتتكلم معاها وتخليك شجاع مش هيحصلك حاجة وخصوصا انك ناوى على ارتباط رسمى ...
كلمها قبل مالبت تزهق منك ومن سكوتك وترجع تفتكر انك مش معجب بيها اصلا وبكده هتضيعها

[eye-love-you]

شكرا يا اخت سندس على ردك ورأيك ..وان شاء الله ححاول هاصارحها واطمنك

[eye-love-you]

شكرا يا m.chezoo ..على ردك ..وكلامك سليم واتمنى انى اقدر اصارحها..بس على فكره انا ببينلها اهتمام غير عادى سواء بالنظرات او الحركات لدرجة ان اصحابى واصحابها حسو بالموضوع..وده اللى مخوفنى اكتر ..انى لما اكلمها تانى انى الفت النظر لينا

[m.chezoo]

شكرا يا m.chezoo ..على ردك ..وكلامك سليم واتمنى انى اقدر اصارحها..بس على فكره انا ببينلها اهتمام غير عادى سواء بالنظرات او الحركات لدرجة ان اصحابى واصحابها حسو بالموضوع..وده اللى مخوفنى اكتر ..انى لما اكلمها تانى انى الفت النظر لينا

طالما انت مبتعملش حاجة غلط يبقى متخافش من حد وبعدين انت عايزها فى النور يبقى متقلقش من حاجة
انما بسكوتك ده ممكن الناس فعلا تتكلم

[eye-love-you]

طالما انت مبتعملش حاجة غلط يبقى متخافش من حد وبعدين انت عايزها فى النور يبقى متقلقش من حاجة
انما بسكوتك ده ممكن الناس فعلا تتكلم

المشكله انى اتأخرت شويه واحنا دلوقتى فى فتره فيها ضغط عشان الامتحانات فى اول 5 واحنا فى كليه عمليه ومحتاجه مذاكره
وانا مش عايز اشغلها واشغل نفسى فى الفتره دى

لان اكيد كلامى معها حتى لوتقبلته هيأثر فيها وممكن متركزش فى دراستها.. وانا مش عايز اضرها

[سارة المصرية]

اولا اهلا بيك فى المنتدى
ثانيا انا شايفة الموضوع اسهل من كدا بكتير دى مشاعر بريئة وراقية جدا يعنى من عيب انك تصارحها وكمان هى مستنية منك انك تصارحها بعد اللى قولتو دا انا شايفة انها مستنية انك تبدا
ههههههههه بس درجة الاهتمام انك تبحث على النت عن اسم ابوها دى لفة من بعيد اوى التعارف بين الطلبة فى الجامعة والزمالة شئ عادى مادام فى حدود واحترام متبادل طيب انت كلمتها مرة ترجع تسكت تانى وتبصلها من بعيد كنت روح تانى مررة اسالها سلمتيلى على بابا ولا لا ههههههه
وكمان روحت كلمت والددتك ووالدك قبل ما تتكلم معاها هو الكلام دا دليل على انك جاد ومش عايز تلعب بيها او بمشاعرها يعنى دا سبب يقويك ويخليك تكلمها وانت قلبك جامد
المهم عدى فترة الامتحانات دى وصارحها فى اقرب وقت بمشاعرك الجميلة دى لانها زى ما قلتلك مستنية انك تصارحها
وربنا يسعدك يارب
اختك سارة

[eye-love-you]

اولا اهلا بيك فى المنتدى
ثانيا انا شايفة الموضوع اسهل من كدا بكتير دى مشاعر بريئة وراقية جدا يعنى من عيب انك تصارحها وكمان هى مستنية منك انك تصارحها بعد اللى قولتو دا انا شايفة انها مستنية انك تبدا
ههههههههه بس درجة الاهتمام انك تبحث على النت عن اسم ابوها دى لفة من بعيد اوى التعارف بين الطلبة فى الجامعة والزمالة شئ عادى مادام فى حدود واحترام متبادل طيب انت كلمتها مرة ترجع تسكت تانى وتبصلها من بعيد كنت روح تانى مررة اسالها سلمتيلى على بابا ولا لا ههههههه
وكمان روحت كلمت والددتك ووالدك قبل ما تتكلم معاها هو الكلام دا دليل على انك جاد ومش عايز تلعب بيها او بمشاعرها يعنى دا سبب يقويك ويخليك تكلمها وانت قلبك جامد
المهم عدى فترة الامتحانات دى وصارحها فى اقرب وقت بمشاعرك الجميلة دى لانها زى ما قلتلك مستنية انك تصارحها
وربنا يسعدك يارب
اختك سارة

ههههههههههه..فعلا انا لفيت من بعيد قوى..بس ده لانى لقيتها مش من نوع البنات اللى بتتكلم بسهوله لانها هاديه جدا
اتمنى انى اتجرىء واقدر اصارحها
على فكره انا لسه شايفها النهارده قدام الكليه كانت واقفه لواحدها وماسكه التليفون وكانت فرصه انى اكلمها لانى دايما بلاقيها بتمشى مع اصحابها نادرا مابتبقى لواحدها..بس انا برضه بصيتلها من بعيد وجت عينى فى عينيها وبعدين مشيت ..فشل بقى
شكرا جدا على ردك واهتمامك

[mozo]

بص يا مان لازم تروح وتكلمها وتقولها انك واخد الموضوع جد لان احنا البنات مبنحبش الولد المكسوف لازم تتجرأ شوية وتكلمها