صبــــــاح الخيـــر يا مصــــر

[انتهينا]

صباح الخير يا مصر

صباح الخير يا مصر .. صباح الخير على الناس المرهقين من عناء الحياة والدايرين في الساقية اللي منصوبة لهم من سبعة الاف سنة .. الناس اللي عايشة اليوم بيومه ..كل أملها يعدي من غير اي خساير .. مابتفكرش في بكره عشان ماتتقهرش... مابتفكرش في النهارده علشان ماتتنقطش ..

صباح الخير على ضحكة عالية في قهوة شايها مايتشربش .. على شاب بيقوم لست كبيرة في الاتوبيس.. على كوباية شاي باللبن وحتة بقسماط بعد صلاة الفجر جنب السيدة نفيسة .. على قهوة في الحسين مبيعديش عليها حسن بشندي .. على سينما زحمة والضحك طالع من القلب للركب .. على سور الأزبكية وكتبه المعتقة ..

على عشاق فقرا مش لاقيين شقة محافظة فبيخطفوا الفرحة متداريين في صخور الكورنيش ورا شجر النيل .. على صوت الشيخ السيد متولي وهو بيقرا سورة يوسف وبيخلينا نعيط على سيدنا يعقوب اللي ابيضت عيناه من الحزن .. صباح الخير على كل الناس اللي بتشقى عشان تجيب اللقمة من بق الاسد ومراته .. على عربيات الكبده والسجق لحمة الفقير وعربيات الدوم تفاح الفقير وعربيات السوبيا خمرة الفقير.. على طبق الكشري خالي العدس ورد زياده وغرقان في الدقة .. على فطاطري الحسين اللي سمى نفسه بيتزا الحسين فباظ من ساعتها..

على العدوي بتاع ميدان الجيش يعني احلى رصة فول وطعمية بمستلزماتها وبرخص التراب .. على أفران العيش في اسكندرية .. على البلكونات اللي مافيهاش كراكيب ولا بصل ولا توم .. فيها كرسيين وكوبايتين شاي وبصة رضا وآهة شوق .. على كل صالة بتلم الناس اللي مش عارفة تتلم على نفسها .. على كل نكته قبيحة تتقال بصوت عالي .. صباح الخير على الطاهرة رئيسة الديوان ودراويشها وسجاد جامعها .. على روح سيدنا الحسين اللي مش مدفون هنا اساسا ..

صباح الخير على كل سطر كتبه نجيب محفوظ وكل شجرة سقاها علاء الديب وكل فيلم كان هيعمله احمد زكي وكل كرسي ماتضايقش لما صلاح جاهين قعد عليه .. صباح الخير على الناس اللي واقفة في طابور حكومة رخم بتتخانق عشان تسلي بعضها .. على مدرجات الدرجه التالتة وناسها اللي مش هنا اساسا ..

على الاهلي لما يسكع الزمالك ستة وساعات اربعة وساعات اتنين .. صباح الخير على كل ايدين بتسلم عليك باهتمام بعد الصلاة.. وعلى كل امام ما بيطولش في الوقوف ويطول في السجود .. صباح الخير على سينمات الدرجه التالتة والفاكهة اللي مش مرشوشة مبيدات وسعاد حسني وهي بتغني انا ضاع مني حاجه كبيرة اكبر من اني اجيب لها سيرة .. صباح الخير بالليل على فرشات جرايد الطبعة الاولى وحفلات الميدنايت والقهاوي المناوبة .....

على العيال وهي بتهز اكياس الكشري الصبح وهي رايحة المدرسة .... على بتوع الزلابية اللي واقفين قدام المدارس خايفين من البلدية ... صباح الخير على اكشاك السمك في ابو قير والترام الاصفر وسيدي البوصيري وبردته والمراجيح اللي ورا ضريحه .. وعم نفنف بتاع الكبدة في المنشية وطعمية ابو احمد الاكتع في شارع عمر بن الخطاب .. صباح الخير على وقفة النواصي والقمم والخناقات " البوق " اللي الناس بتفش فيها غلها وبتوفر مادة فرجه للواقفات في البلكونات ... صباح الخير على كل جميلة تغري باثم النظرة الثانية والتاسعة ..

صباح الخير على الناس اللي بتكوي قمصانها وتبص على المراية قبل ماتنزل .. على شوارع الزمالك وجاردن سيتي والمعادي اللي تشرف وتفتح النفس للحياة وعلى كل اللي بيمشوا فيها وبيفرحوا للي ساكنين فيها .... صباح الخير على حب الجامعة ومظاهرات الجامعة وكل افيه اتقال على اي معيد غتت في اي سكشن ...

صباح الخير على الاوض اللي فوق السطوح والشقق المفروشة والايجار اللي مابيتكسرش .. على صينية الاكل اللي بتيجي لك من الجيران قبل ما يتفقوا معاك تدي ابنهم درس... على قران الفجر وصوت النقشبندي وهو بيقول مولاي اني ببابك قد بسطت يدي ... صباح الخير على الجمعيات اللي ساتره الشعب المصري .. على تمييلة الصاحب على صاحبه في ساعة الزنقة ..

صباح الخير على الخير على ام حمدي عبد الرحيم اللي بتحب جمال عبد الناصر وام ايمن عبد الهادي اللي بتعمل رز مسكر وملوخية تضيع مستقبلك , وام على رجب اللي ماشفتش البحر الا في عربية الاسعاف اللي خدتها على المستشفى ...صباح الخير على كل نجع وكفر مايكفرش من العيشة .. صباح الخير على الكنايس اللي شكلها حلو ,, على الاتوبيس النهري لما يكون نضيف..

على عم فاروق ونصبة الشاي بتاعة كوبري عباس .. على كل زوجه مابتنكدش على جوزها , وكل راجل مابيستقواش على ولية وعلى كل ندهة لبابا وكل لعبة لبنوته ومسدس ميه لحماده ... صباح الخير على كراتين الجهاز المتعانة فوق الدواليب .. واحلام الجواز المتحاشة تحت البطاطبن .. صباح الخير على عامود السواري والفاتحة اللي بقراها وانا ببص من تحته على تربة ستي اللي قالتلي وانا رايح الجامعة اول مرة "يابني البلد بلدهم يعملوا فيها ما بدالهم !" صباح الخير على لمة صحابي في القهوة وشتايمهم فيها علشان بطلت اجي .. صباح الخير على دعوة ربنا يكفيك شر طريقك ..

صباح الخير على عبد الناصر قبل مايبقى فرعون وعلى الشعراوي وهو بيقول اذا كنت قدرنا فليعنا الله عليك , وعلى عبد الحليم وهو بيعيد كوبليه حبيبي والله لسه حبيبي والله , وعلى أم كلثوم وهي بتقول تهون عليا الروح لو فارقت جنبي , وعلى محمد فوزي وهو بيقول اي حاجه يعوزها .. صباح الخير على مرجلة ابراهيم عيسى الذي اخرجني من الظلمات الى النور.. على مسلسل ارابيسك وفيلم حب في الزنزانة وفينالة الكيت كات ونجيب الريحاني وهو بيغني حتى الفيران اشتكت من قلة فرافيتي ... على عم حجازي اللي سابهالنا مخضرة وراح طنطا .. على محمود عوض اللي قاعد في البيت .... على بهاء طاهر اللي بيصلب طوله علشان يروح المظاهرة ... على فاروق عبد القادر وصحبته .. على حمدي عبد الرحيم واكرم القصاص وقهوة المنظر الجميل والايام اللي كنا مش لاقيين ناكل فيها بس كان عندنا شاي وسكر كتير.. صباح الخير على اصحابي ولاد الاصول اللي مبيخفوش من اي حاجه بكتبها ..
صباح الخير على بنتي في المستقبل اللي لو ماشفتهاش بتكبر .. قولولها ان ابوكي كان راجل جدع . . .

سلام ....

وعاوز دعوات حلوه للي بعتلي التوبك ده

[ابو الحارث]

الله

قمة الروعة
تجسيد لحياة المصرى المكافح كامله حتى تخيلت اننى اشم رائحة العرق الزكية الطاهرة تنهمر من جبينة الشامخ

مصر هى ام الدنيا وستظل كزالك والحياة فيها بكل قسوتها وراحتها هى نعمة وفضل ومنة من الله

اللهم احفظ مصر واجعلها بلدا امن الى يوم الدين وارزق اهلها من الثمرات

صحيح انك راجل جدع بس انشاء الله حتقولها بنفسك لها

تقبل اعجبابى ومرورى

[طيف عابر]

عنجد بتجنن طريقة الوصف بالموضوع ذكرتني فعلا باجواء القاهرة في الصبح خاصة بعد الفجر
وفي الليل كمان روعه

موضوع رائع جدااااااا

على قران الفجر وصوت النقشبندي وهو بيقول مولاي اني ببابك قد بسطت يدي

يجسد احلى ما في مصر
يسلموووووووووو الايادي
كتير حلو

صباااااااااااح الخيرات للجميع

[انتهينا]

الله

قمة الروعة
تجسيد لحياة المصرى المكافح كامله حتى تخيلت اننى اشم رائحة العرق الزكية الطاهرة تنهمر من جبينة الشامخ

مصر هى ام الدنيا وستظل كزالك والحياة فيها بكل قسوتها وراحتها هى نعمة وفضل ومنة من الله

اللهم احفظ مصر واجعلها بلدا امن الى يوم الدين وارزق اهلها من الثمرات

صحيح انك راجل جدع بس انشاء الله حتقولها بنفسك لها

تقبل اعجبابى ومرورى

والله والله مش عارف اقولك ايه يا استاذ ابوالحارث على كلامك الجميل ده

وبجد والله دايما منورني بمرورك العطر

وتسلم على كلماتك الجميله دي

[انتهينا]

عنجد بتجنن طريقة الوصف بالموضوع ذكرتني فعلا باجواء القاهرة في الصبح خاصة بعد الفجر
وفي الليل كمان روعه

موضوع رائع جدااااااا


يجسد احلى ما في مصر
يسلموووووووووو الايادي
كتير حلو

صباااااااااااح الخيرات للجميع

انتي الي ردك اروع بكتيير اختي سما

وصباح الخير يا جميل

بجد مش عارف اقولك ايه على ردك المتألق ده

غير اني اقولك منوره واللهي

[ابو الحارث]

والله والله مش عارف اقولك ايه يا استاذ ابوالحارث على كلامك الجميل ده


وبجد والله دايما منورني بمرورك العطر

وتسلم على كلماتك الجميله دي

ياحبيبى يااصيل انتا
شكرا على الكلام الجميل دة و انا اصلا مصرى بالوجدان وسودانى بالجنسية
انا بحب مصر اكثر من شعبها اساسا مصر حب متدفق بيجرى بدمى منذ الصغر واتمنى ازورهااااااا قريب

تقبل تحياتى

[انتهينا]

ياحبيبى يااصيل انتا

شكرا على الكلام الجميل دة و انا اصلا مصرى بالوجدان وسودانى بالجنسية

انا بحب مصر اكثر من شعبها اساسا مصر حب متدفق بيجرى بدمى منذ الصغر واتمنى ازورهااااااا قريب

تقبل تحياتى

ربنا يخليك يا استاذ ابو الحارث

وان شاء الله تزورها واكيد هتشرفها وهتشرف اهلها واللهي

وعاوزين نشوفك بقى مش تروح على شرم وتنسانا هههههههههههههههههههههه

لأ بجد انا بحترمك جدا يا استاذ ابو الحارث

وبحترم اهل السودان كلهم عشان فيها ناس زي حضرتك

[m.chezoo]

موضوع جامد وتجسيد واقعى فعلا لحياه المصريين
تسلم على التوبك الجامد ده

[عمر]

بجد موضوع جميييييييييييييييييييل جدا على فكره انا لما خلصت قرائة الموضوع استغربت وقلت انا فين مش انا كنت دلوقت فى وسط القاهره
بجد الموضوع اكثر من رائع والاروع ان اللى كتبه هو انتهينا

[No TiMe]

يبقي انت اكيد في مصر

تسلم يا حبييب البي علي التوبك الجميل بجد والي خلانني الف مصر وانا قاعد متحركتش تسلم انت والي باعتلك التوبك

اخوك وحبييبك
اسلام