الحلاقة غداً مجاناً

[BA7IBAK YA BOY!]

الموضوع دة نازل بمناسبة الاعياد و السنة الجديدة احسن تفهموا الدنيا غلط و الا حاجة

كان فيه مرة واحد حلاق لقا ان الناس قليلة جدا عليه و محدش معبره و محدش بيحب يتعامل معاه من اساسة

و كل الناس بتهرب و تروح للحلاق اللي جنبة
ففكر كدة يعمل ايه عشان يجر رجل الزباين لمحلة
راح حاطط يافطة كبـــــــــــــــــــــــ ـــــــــــــيرة على باب المحل و راح كاتب عليها

الحــــــــــــــــــــلا قة غداً مجاناً

الناس شافت اليافطة كلهم قالوا خلاص نحلق بكرة عند الراجل دة مدام مجاناً

و كل يوم الناس تروحلوا عشان يحلقوا مجاناً يقولهم اليافطة بتقول الحلاقة غداً مجاناً و فضل الناس في انتظار غداً لحد ما شعرهم لمس الارض
و بما منظرهم نيلة ادام العالم

وعد الحلاق دة بيفكرنا بحاجات كتير اوي في حياتنا اظاهر الحلاق دة من حدانا

من حوالي سنة كدة قام واحد من الكٌبارات قال ايه
ان الدولة عينت الآلاف من الخريجين و لسة بتعين كمان و فيه خطة تعيين ملتزمة بيها ( غدا مجاناً ) و قال كدة بالرغم من ان فيه شبة منشور عام بعدم التعيين ( الكلام دة حصل في مجلس الشعب ) ادام الناس و نسيوا اننا شغاليين في مشروع البطالة للجميع بقالنا سنين

عندنا طبعا وعد بالحلاقة مجاناً قصدي بخفض الأسعار مع تثبيتها
لكن بالرغم من الوعد و انخفاض سعر الدولار اليومين دول الا ان الاسعار بتزيد بطريقة جنونية و لما تسأل حد ليه يا ناس ؟ ما الدولار حجتكم القديمة رخص يرد و يقولك اصل بقينا نستورد ياليورو
تقوم انت بحسن نية و سذاجة تسأل طب و ليه غليتوا الاسعار لما الدولار غلي
يرد يقولك اصل كنا ساعتها بنستورد بالدولار
و نفضل بقا البيضة و الا الفرخة لحد ما يجيلك الهسهس و تمشي

اتوعدنا بحلاقة غداً غريبة كدة اسمها شفــــــــــــافية مكوناش فاهمين معناها لكن دلوقتي بعد ما الناس مبقتش لاقية الهدمة عرفنا معنى الشفافية و بطلنا غباوة

اتوعد المدرسين بحلاقة غداً اسمها الكادر و فضل المدرسين يحلموا و يتمنوا في امنيات و ابتدت الناس تحقد على المدرسين و تقول شعارات زي لو لم اكن مدرساً لوودت ان اكون لاعب كورة اهي أي سبوبة تجيب فلوس
لكن مع قر المصريين الدكر و عنيهم الوحشة مات الكادر بالسكتة القرية
من القر مش من القرية بتاعت الريف

الوحيد اللي ما بيحلقش هو وزير الصحة بصراحة راجل فٌلة و بشرنا البشرة الكبيرة اللي احتمال تكون حلاقة بردو اللي هي ان تحسن الرعاية الصحية مش حيكون قبل سنة 2009- 2010
يعني حتحلقوا تبع وزارة الصحة على سنة 2010 كدة

كان في وعد بالحلاقة المجانية غريب كدة قال ايه حيوزعوا العيش في ورق سلوفان على البيوت
و هوبااااااااااااااااااا
حصلت المعجزة
بقا الطابور اولة في السيدة زينب و اخرة في مدينة العبور

وعد بالحلاقة غدأ اسمه حنحارب السحابة السودا و حرق قش الرز و الحمد لله بقالنا بنحارب سنين
بس فيه احتمال قريب تنزل سحابة فوشيا و تركواز ميتاليك على الموضة

على فكرة سمعت ان فيه ابحاث ناجحة جدا للزراعة على قش الرز في أي تربة مهما كان نوعها
لكن طبعا الابحاث دي مكانها البدروم و المخازن عشان شركات المبيدات تسترزق و بعدين خلاص احنا خدنا على الاكل المسرطن
اعتقد لو كلنا اكل نضيف حنعيا

وعد بالحلاقة اسمه حنحارب الاحتكار و قبضنا على شركات الاسمنت الوحشين اللي اتفقت على رفع السعر قال يعني السعر كان قليل قبل الصحوة دي

و لحد دلوقتي بيحلقولنا و مشوفناش نتيجة دة حتى متر الشقة مش متشطب وصل ل 3000 جنية في بعض الاماكن
منك لله ياللي في بالي اللهي ما تكسب و لا تربح

و اللي بيفكر في جواز ينسى بقا لان احتمال اول جوازة تبقى من الحور العين

بالمناسبة في بردو وعد بالحلاقة اسمه مساكن الشباب و يا سلام بقا عليها تجنن
تحف فنية
كانوا جايبين مشروع مساكن الشباب في الجرنال أمبارح و الله العظيم كنت بحسبها صورة تُرب جديدة للميتين

لا و ايه الشاب من دول لازم يجيب قسيمة جواز يعني يتجوز الاول من غير شقة و يقنع أبو البنت ان عيشتهم على الرصيف عيشة مؤقته 20-30 سنة على ما يستلموا الشقة و بعدين يقدم بقا القسيمة عشان ياخد الشقة
دة على افتراض ان مفيش محسوبيات و مجاملات

المصيبة بقا ان الشاب البالغ السبعين اول ما يستلم الشقة يروح يشوفها مايعرفش هما بيفرجوه على الشقة و الا الماكيت بتاع الشقة

وعد تاني بحلاقة اسمها البنية التحتية
و محدش عارف ايه البنية التحتية دي
غير لما عرف ان الحاجة الوحيدة اللي بتتبني لتحت اما مقابر و ترب اما اوض البدروم

و بقت الحلاقة المجانية هي الجزرة اللي الحمد لله كلنا ماشيين وراها
لكن الحمد لله انا فوقت
و عرفت ان كلنا اتحلقلنا و آن الأوان إني أقولكم
نعيــــــــــــــــــــــ ـــــــــــــــــــــــما ً

[MoOoRa]

هههههههههههههههه

والله العنوان هو اللي شدني

ممكن عنوان الحلاق ده

[dr_manoon]

اه ياريم فكرتينا باللى بلدنا بتعملهولنا يارب ربنا يخللى

مصر واللى ماسكين مصر

[العوامى]

أقول إيه
الله ينعم عليكى
المشكلة إن مصيبتى مصيبتين
شعر ودقن
تسلمى ياجمر

[BA7IBAK YA BOY!]

هههههههههههههههه

والله العنوان هو اللي شدني

ممكن عنوان الحلاق ده

هههههههههه
ليه حتروح له انت كمان
منور يا كميل بمرور المميز
اسعدني تواجدك

[BA7IBAK YA BOY!]

اه ياريم فكرتينا باللى بلدنا بتعملهولنا يارب ربنا يخللى

مصر واللى ماسكين مصر

يارب يا حبيبتي يارب ههههههههه
تسلمي يا جمر علي المرور المميز
ونورتي المووضوع بتواجدك

[BA7IBAK YA BOY!]

أقول إيه

الله ينعم عليكى
المشكلة إن مصيبتى مصيبتين
شعر ودقن

تسلمى ياجمر

هههههههههههههه
شعر ودقن مره واحده ههههههه
تسلم يا كميل علي مرورك المميز
وردك اللطيف
نورت الموضوع بتواجدك