يا مبقبقييين هاااا

[BA7IBAK YA BOY!]

الموضوع دا لكل مبقووووق و مبقوووقة متزوج ومتزوجة
او موشكيين على الوقوع فى احمق قرار فى رايى
و اظرف قرار بردوا لا يبندجونا يابووى

و خلاص هاين عليهم كل واحد يبج بطن التانى تطلع الكيلو قدام بالدم يا سكينة لان رشا ووائل بعد قصة الحب الشنيعة المريعة الفزيعة اللى سقط ضحيتها الاب و الام و المأذون ذات نفسه شكلها انتهت و قطعت النفس و مبقاش نافع معاها لا انعاش و لا اى شيىء لانه مات موت جامد خالص

بس ايييييه سبحان الله يحيى العظام و هى رميييم و الله جاب الله خد الله عليه العوض
و العوض اوقات كتير يبقى بين ادينا بس مش حاسيين بيه
العوض يبقى قصاد عنينا من قبل الفقد حتى و بردو مبنشوفوش معلهش
اصل الحياة توهة و متاهة بعيد عنكم
بس اهو يمكن اما نفضى المتاهة ع الورق
و نوسع المسافات
و ننفض الغبار من على كل دايرة
و نسلك المتشابك
المتاهة تبقى سهلة و منبقاش عمالين نلف فيها حوالين نفسنا وبس !

معظم مشاكل الحياة الزوجية بتبقى فى الاصل حاجات صغيرة و بسيطة انما لاننا مجتمع مبيحبش المصارحة و نعانى من عدم نضج عاطفى لمراحل متأخرة فى حياتنا بنفضل ساكتين على المشكلة الصغيرة دى لحد ما تتفاقم و تفرقع فوشنا و تبقى فوق طاقة احتمالنا
دا مبيبقاش كده بس دا صبرنا عليها بياخد جزء من الجوانب الايجابية التانية اللى المفروض تبقى الحتة الحلوة فى علاقتنا ببعض فتلاقى اننا مش مضايقيين من المشكلة و بس

لاء احنا كمان خسرنا حاجة كانت بتحلى اوقاتنا و احنا فاكريين اننا متحمليين مشكلة و ناس بتضحى و شهدا بقى وكده
فى حين اننا عملنا زى اللى جه يكحل عين قام خزق الاتنين

ف فكرت انى اتعرض لبعض سمات المشاكل الاساسية فى بيوتنا وبجانبها شوية تحابيش من المشاكل الصغننة و نشوف ايه الممكن نعمله عشان نقدر نحل جزء من المشكلات دى اونتعايش برضا اذا لم نتمكن من التغيير من باب ان نص العمى و لا العمى كله

على فكرة انا بتعرض لمشكلات دايما زيى زى الناس كلها مبقولش انى فلتة عصرى و عايشة فى جنة لونها بمبى و فى فراشات بتطلع نور و السلم الموسيقى طالع يرن من حواليه
يمكن اكون اخيب م الخيبة انما بردو دا ميمنعش انى اشك انى عندى شوية عقل حلوين يمكنونى من عرض المشاكل بحيادية كل ده بالرغم من موقفى العدائى المعروف من الرجالة و الله انا طيبة فعلا !!

[BA7IBAK YA BOY!]

المشكلة الاولى و اللى بسمعها دايما من صحباتى و من خلال الاتصالات التليفونية اللى وصلت البرنامج وع الايميل و الااس ام اس

انا جوزى اخرس يا نونو
اخرس ازاى يا سوسو
اخرس مبينطقش يا نونوا ول ما بيدخل البيت يقول الغدا فيين و ياكل و يغسل وشه و ينام ع الحوض او ساعات بينام ع التواليت ذات نفسه لانه مش دايما بيغسل اديه بعد الاكل و بيمسحها فى مفرش السفرة الحرير يا نونو تخيلي اللى ماما جابتهولى بالشيىء الفلانى عشان اللى ما يتسمى يمسح فيه اديه بعد الاكل

كويس انها جات على اديه يا سوسو مش حاجة تانية

انما قوليلي يا سوسو الحالة دى ابتدت من زمان و الا مرة واحدة

و الله يا نونوا ول ما اجوزنا كان لطشيييف و عنيه بتطلع شوعاع و بتسبل 5 مرات ف الدقيقة
و بعد اول شهرين بقى يرجع ابقى عاوزة اسمع كلمة حلوة بعد ما حيلي انهد تنضيف و طبيخ و اديا اتلوت من لف الرولو 3 ساعات فشعرى الاقيه يرجع يرازيني بمشاكل الشغل و المدير و زمايله و


امممممممسك عندك

و كنتى بتسمعيه يا سوسو

هه ااه كنت بسمع بس بتبقى مراررتى هتتفقع اللى ما قال كلمة عن البامية المسبكة و لا الكريم كراميل اللى سفحه كله و لا حتى الهوت توب و الشورت ابو رجل نص و رجل كت

بس اما اتخانقنا بسبب الموضوع ده كام مرة بطل بقى يحكى خالص بصراحة عن الشغل انما مبقاش حتى يتكلم ف البيت خالص و مقضيها نووم

و انا حتى اما يكون عاوز يقضى ليلة ظريفة مبقدرش اتجاوب معاه لانى قرفانه منه عشان مبيقولش و كمان عاوز يفرفش على قفايا طب و الله لا اخلى ليللته كحلى مش بمبى مسخسخ

*************************************

و تبقى ليلة سونة افندى اسود من قرون الخروب و اطول من ليل امشير و قليل ان ما ظبط سهرة برة البيت

طيب نفصص المشكلة دى كده من الاول واحدة واحدة

سونة جوز سوسو راجل شغال من 8 صباخا لغاية 4 بعد الظهر بيتعامل مع جمهور كبير و بينزل يركب مواصلات عامة
و دماغة بتتحمص من الوقفة فى الشمس عشان يستنى الاتوبيس
و يتحمل سخافة البعض هنا و غباوة البعض هناك لانه لو وقف ع الواحدة لده و ده يبقى هيرجع اخر اليوم و ف ايده اخلاء طرف و يفضل قاعد ف البيت بوزه فى بوز سوسو المتعاص رووووووووش

سوسو بقى ست بيت و ربة منزل بتقابل مين طول يومها سوى بتاع الخضار و جارتها و احتمال نظلى مامتها تفوت عليها وهى راجعة من السوق
جمهور بسيط مش مضطرة تكون متكلفة و لا تتحامل على نفسها و هى بتكلمه لانها منتظرة منه حاجة زى مرتب اخر الشهر مثلا

بترجع بيتها توضبه و تجهز لقمة الراجل و تاخد رجليها فومين بالحجر و راسها نوبتين بالمكواة و فرشة كيده و فرشة كيدة و تبقى اليسطة الدنس و تستنى سونة على ما يرجع عشااان ينزل بسيمفونية غزل و شكر فى مجهوداتها الجبارة

و سونة بيرجع على اخره من كل الحوارات اللى بيشوفها فى الشغل و عاوز يتفك بكلمتين معاكى يشوط ف المدير و نائب المدير و رئيس مجلس الادراة و ينفث الضغط

يلعن ف المواصلات و الهيئة و الكمسرى و السواق و شهر اغسطس اللى هراه حمو نيل و تسلخات

مين اولى يا سوسو و الله لو قلتلك حكاية الراجل ده و انتى متعرفيهوش لا هيصعب عليكي و تقعدى تسمعيه و قليل ان منزلتيلك دمعتين و اتصعبتيلك تصعبتين

مستعجلة ع الكلمتين ليه يا سوسو ما هيقولهم بس اسمعيه الاول
انتى وراكى ايه

طبطبى على كتفه و قوليله معلهش يا خويا بكره ربنا يخلص م المدير و يتزحلق ف اى قشرة موز تكسر رقبته المفترى
هننيه شويه و خليه يهضم اللقمة و هو مرتاح
شغليللة شوية مزيكا بيحبها و اعمليله مساج فودانه بس متخرميهاش و الا فعنيه و متخزقيهاش

هتلاقيه فضى شحنة القرف اللى عنده و راق و ابتدى يشوف بقى انه ف البيت و دى سوسو و دا شعر سوسو و حواجب سوسو و يقول كل اللى نفسك فيه بس امانة عليكي ل تعدى الليلة و تسمعيه

[MoOoRa]

موضوع كبير جدا

ممكن فكره مصغرة عنه لانه محتاج وقت

لاني بجد لازم اقرأة شكله موضوع حلوووووووووو

[BA7IBAK YA BOY!]

موضوع كبير جدا

ممكن فكره مصغرة عنه لانه محتاج وقت

لاني بجد لازم اقرأة شكله موضوع حلوووووووووو

همممممممممممممممم
هو كبيير حبتين بس حلو والله
اقرا علي ضمنتي
نورت يا كميل بمرورك المميز