مع الشلة

و الاصحاب

الاوغاد



و انا قاعده فــ قعدة

أو واقفه فـ وقفة

أو نايمه فــ نومة حتى



و بيحصل حوار

أو مناقشة

أو حتى موقف





و بالرغم من انى معروفه وسط الشلة ان ودانى كبيرة - مش ارنب يعنى -

لا ده عشان بسمع اكتر ما بتكلم .. مش بزهق من السمع

و اى حد محتاج يفضفض أو يتكلم و يرغى بيجيلى على طول

مش عارفه ليه .. بس جايز عشان مش بصدر أحكام أو اتنرفز على حد بسرعة لو جه يحكيلى سر او كده

مش عارفه

المهم ان ساعات بقى .. مبقدرش امسك نفسى

بيتقال حاجة .. او يحصل حاجة تنرفزنى تعصبنى

أبقى شايفه العفاريت كده و هيا بتتنطط قدام منى

غصب عنى بلاقى أقل رد طلع منى هو

تــاك نيلة فيكي و فــ خيبتك

بجد مبعرفش اقول غيرها

لحد ما بقت لازمة فى بقى

كل ما يحصل حاجة او اسمع حاجة متعجبنيش اقولها على طول





صاحبتى الانتيخ .. اتصلت و قالتلى بتعملي ايه

قلتلها ولا حاجة ... لسه صاحىه م النوم و هائمه على وجهى

قالتلى طب انا جايالك

قلتلها تشرفي و تآنسي و تنوري

قالتلى طيب

قلتلها ايه مالك فى حاجة ولا ايه

قالتلى اه اتخانقت مع امى

قلتلها ليه كده بس

قالتلى اما اجى هحكيلك

قلتلها طيب

و لما جت.. و بعد ما هدىت شوية .. قلتلها ايه الحكاية بقى

قالتلى امى اتخانقت معاها و زعقت فى وشها قعدت تعيط رحت رازعه الباب و نازله

بصراحة ساعتها .. لاقيت ودانى صغرت و اضيقّت مرة واحدة

قلتلها نهارك مش فايت

قالتلى اسمعي بس بقيت الحكاية

قلتلها اسمع ايه و زفت ايه

حد يعمل كده فـ أمه يالا

هو انتي كولك على بعضك كده تسوى حاجة فى الارض من غير رضا امك عليكي



تــاك نيـــلة فيكي و فــ خيبتك







يوم تانى ..

مع أوغاد تانيين ..

كنا واقفين فى الحديقة .. و واحده جاىه فرحانه اوى و مبسوطه و سعيده

و بيتقولنا سمعتوا شريط ( حماقى ) الجديد ؟؟ ؟؟؟

توووحفة .. رهيييب .. خطير ... وهم يا جدعان

قلتلها يا شيخه.. سمعينى كده


و معلش رأى شخصى مقصدش ازعل بيه حد

ايه حمائى ده يا جدعااااااااان

و الله ولا صوت و لا صورة ولا أى حاجة خالص

و عليه ( يانا يانتااااااه ) تهد جبال .. نانسى عقرم نفسها متعرفش تقولها

شلت السماعات من ودنى .. و اديت الام بى ثرى للبت و قلتلها

تــاك نيلة فيكي و فــ خيبتــك






القعدة الجد بقه

قعدة سياسية

و كله يحاسب و يوسع كلام مهم بيتقال و حاجة عظمة يعنى

تطلعلى واحده تقوللى : يعنى شوفي ولاد الـ ( تيـــــت ) بيصرفوا كام على حتة تمثال لا راح و لا جه

و الناس مش لاقية تاكل

بلد بنت ( تيــــــت ) صحيح


( تيــــــت ) طبعا معناها ان البت شتمت بس انا حطيت تيـــت مكانها عشان الرقابة بس

المهم البت راحت مكمله كلامها : احسن حاجة الواحد يهج من ام البلد دى

و يعيش فى بلد نضيفة بقى .... فى اوروبا ولا حاجة ... البلاد اللى فيها شباب اموره دى

و يرتاح من القرف ده كله

قلتلها طب ده مش يبقى اسمه هروب يا جمر

قالتلى يا ختي هروب هروب بلا خاوتة

قلتلها طب تخيلي كده ان الكام مليون بني ادم وبني ادمه اللى فى البلد بيفكروا زى حضرتك كده

البلد حيبقى حالها ايه حضرتك

راحت ضحكت ضحكة هعهعهعهع ..

و قالت : هتبقى خرابة ... هعهعهعهع







تـــاك نيلة فيكي و فــ خيبتك




رفيقتى فى الدراسة بقى ..

كنا فى العربية و بسألها سؤال جه على بالى فجأة كده

- بقولك ايه يا بت

- نعمين يا حوووبى

- فكرينى كده تانى معلش ....... انت سقطتي ليه السنة دى ؟؟

- مكنتش بذاكر يا شيؤووووز

- ممممممم .. و مكتشي بتذاكري ليه ؟

- معرفش

- طب انتي حابه الكلية اللى انتي فيها و حابه المجال بتاعها ؟

- معرفش

- طب انت دخلتي على اساس ايه ؟

- معرفش

- طب بلاش دول .... نفسك تشتغلي ايه اما تتخرج ؟؟؟

- مش عارفه

- طيب انتي عارفه ايه و انا اسألك فيه أساسا ؟؟

- اى دونت نووووو هعهع

- طيب





تــاك نيلة فيكي و فــ خيبتــك






صاحبت صاحبتى بقه

دمها خفيف مووووت و بتحب الضحك

عليها ضحكة عفاريت من اللى هيا .. و خصوصا انه ما شاء الله طول بعرض .. . شحطه يعنى

كنا قاعدين قعدة لطيفة و لقيتها ضحكا الضحكة اياها

نياااااهاهاهاها

قلتلها خير متضحيكنا معاكي يا بت

قاتللى امبارح و انا بكلم اخت صحبي فى التليفون ....

قلتلها لحظة بس معلش مسمعتش كويس

أخت صحبك ؟؟؟

قالتلى اه أخت صحبي

و راحت مكمله القصة الطريفة .. بس مسمعتش منها حاجة

و سرحت شوية بعقلى كده ...

سرحت لانى اتكسفت اقولها تـــاك نيلة فيكي و فــ خيبتك لانها مش صحبتى .. دي صاحبت صحبتى

و قلت فى بالى هو فى بت تقول صحبي

داا ايه الخيابة دى ؟؟؟





تـــاك نيلة فيكي و فـــ خيبتك يا بعيده




بس

و بعد ما كتبت الموضوع ده سرحت بردو شوية

و قلت فى بالى

ايه اللى انا كتبته ده

هو انا مصاحبه الناس دى ليه

و مصاحبهم ازاى ؟؟؟

جاتنى نيلة فيا و فــ خيبتــــى

سلام بقى