حد يشتري احلام
قرب يا باشا
يا بلاش
روحت لواحد ينشر كلامي عجبه بس قال الكلام ده يتنشر باسمي و انت ليك الفلوس شوفت قتلني و هو عاش
قرب يا باشا
يا بلاش
واقف بعيد ليه يا بيه قرب و خدلك كام ورقة صحيح احلام عمري بس دلوقتي ببيعهم ببلاش
قرب يا باشا
يا بلاش
الورق اللي في ايدك ده احلام قطعتها من قلبي كتبتها بدمي بس اهي ماتت و الورق ده عليك ما يغلاش
قرب يا باشا
يا بلاش
واقف في وسط الطريق واقف و في دمعي غريق ببيع احلام و في صدري حريق
قرب يا باشا
يا بلاش
كنت عايز الناس تشوف احلام بس قتلوها قدام عيني ماتت بين ايدي و قالو لي بيع و اهوه ببيعها تشتريها مني بكام
قرب يا باشا
يا بلاش
عمرك شوفت حد بيبيع احلام عاشت سنين معاه ساكنه جواه و اوعى تقولي في امل دي امل ماتت من زمان حكموا عليها بالأعدام قرب يا باشا و جرب كلام كتبه قلبي بدمه من كتر همه حب و خداع , خيانة و اخلاص , مشاعر و احاسيس , ندم و كله بينتهي نهاية واحدة بالألم ايه يا بيه مالك مستغرب ليه ما شوفتش حد بيبيع اولاده امل ماتت و دفنتها و احلام ببيعها ها تشتريها مني بكام ولا انت بس كلام
قرب يا باشا
يا بلاش
وناس تبيع الضنه عشان الضنه يعيش مع ان الضنه غالي و ناس تبيع نفسها عشان الرغيف خلاص الأنسان بقى رخيص بعد ما كان غالي
قرب يا باشا
يا بلاش