انت اتجننت ..... انت مش عارف انت بتكلم مين .؟!؟.

[Mr.Mo0ody]

بسم الله الرحمن الرحيم
كل يوم بيعدى علينا بشوف مواقف جديده وبنسمع كلام غريب والله
يعنى من ضمن كلام كتير بنسمعه

( أنت اتهبلت انت مش عارف انت بتكلم مين ؟)

تشوف الواد من دول لسه مطلعش من البيضة بس ابوه ماسك منصب مش كبير اوى فى البلد بس ليه وضعه يعنى ماشى بصدره فى الشارع

ولما حد يكلمه ولا يقوله يابنى عيب لما يغلط

يقوله انت مش عارف انت بتكلم مين ؟



والراجل الكبير يا عينى واقف خايف يقول لنفسه مين ده اللى بكلمه ليطع ابوه رئيس المجلس المحلى وينخ تانى

ويقوله والله يابنى مقصد اعمل اللى انت عايزة

ويمشى الراجل خايف للواد الصغير يعمل فيه حاجه فيقعد فى البيت ميطلعش كام يوم ويفضل بعدها خايف للواد الصغير يزحلقة وهو ماشى فى الطريق ولا حاجه


ونمشى لمكان تانى بعيد شوية

وتلاقى بنت امورة صغنتوته كده ضاربة النضارة الشمس والطقم الفخم والبرفان اللى ريحته تشمم شارعين قدام

ورايحه تخلص ورق من مصلحة حكومية ودخلت على موظف حوكمى غلبان تقوله عايزة اخلص الورق ده ؟

يرد عليها يقولها طيب ثوانى يا فندم وهخلصهولك

تقوله ثوانى ايه انت مش عارف انت بتكلم مين ؟

يرد الموظف اللى طالع عين اهله . هتكونى مين يعنى ؟

تقوله لا انت لازم تتربى وتطلع الموبيل وتتصل على واحد صاحبها وتقوله انا اتهزقت على اساس انها بتكلم يعنى ابن وزير المصالح الحكوميه وهو اصلا زميلها فى الجامعه

الموظف الغلبان يبصلها وهى متنرفزة . خلاص والنبى يا بنتى انا غلطان ومش هعملها تانى ويسيب كل اللى فى ايده ويقوم جرى يخلصلها ورقها ويسيب مليون واحد واقف قدامه لغاية ميخلص للانسه ورقها



خدوهم بالصوووووووووت قبل ميغلبوكوا

مثل شعبى اصبح كل الناس بتمشى بيه مع شوية مظاهر كدابه تخفى الحقيقة المرة وشوية براعة فى الكلام بلسان فيه شوية تناكه

وصفة سهله اوى علشان تعمل نفسك مهم فى البلد

وديما الناس بتبص للمظهر وتحدد ازاى هتتعامل معاه ومبتفكرش مين فعلا اللى قدامهم وبيفرحوا اوى لما حد يكلمهم بتكبر على اعتبار منهم انه صاحب منصب كبير ولو اتحاجوه فى حاجه كوسطة يعنى يسهلهم العملية

وهو فى الاخر مش حاجه اصلا بس عرف يمثل دور خايب عليهم وهما يصدقوه


انت عارف انت بتكلم مين ؟

بنسمعها كتير ومبنعرفش ايه وراها

هل اللى بيقولها بيقولها بجد وفعلا هو منصبة عالى فى البلد ويقدر يعمل ويسوى فينا ؟

ولا واحد بيحاول يتحايل عالقانون بتمثيل دور صغير علشان يخلص ورقه ملففاه الكرة الارضية ؟

وفى كمان شويه لمثله معانا

موقف رقم (1)
_________
* المكان : فى الشارع
* الزمان : الساعه 2 الظهر
* العسكرى : انت ماشى بالسرعه دى كده ليه <<<< هات رخصك
* الواد : الرخص ؟ ليه حضرتك فى ايه بس ؟
* العسكرى : يعنى انت ماشى بالسرعه دى وفطريق معاكس ومش عارف ليه <<< رخصك بقولك
* الواد : طيب حضرتك انا مش معايا رخصه
* العسكرى : تمام اوى كده كملت ماشى بسرعه وطريق مخالف وبتقاوح ومش معاك رخصه
طيب يلا قدامى على القسم
*الواد : قسم ! انت مش عارف انت بتكلم مين ؟
__________________________
الموقف التانى
المكان : فوق اى كوبرى من بتوعنا
* الساعه : فى اى وقت بالنهار
واحد خبط عربيه واحد بس يظهر ان الخبطه جامده شويه
* شخص رقم 1 : انت مش تفتح وانت بتسوق علشان متخبطش فى الناس كده
* شخص رقم 2 : انت بتكلمنى انا يا اخ انت ( بكل بروووووووود )
* شخص رقم 1 : اه بكلمك انت ... يعنى انت مش بتشوف وخبطنى وكمان مش بتسمع
* شخص رقم 2 : انت بتكلمنى كده ازااااااى ؟ انت مش عارف انت بتكلم مين ؟


الموقف التالت
______________________________
* المكان : قدام البنك او اى مصلحه حكوميه
* شخص رقم 1 : انت يا حضره ياريت تركن بعيد عن هنا شويه
* شخص رقم 2 : مش هركن بعيد عن هنا انا اللى جاى الاول وانا اللى لاقيت المكان فاضى اعتقد انو من حقى انى اركن هنا مش انت اللى تركن
* شخص رقم 1 : من حقك ومش هتركن هنا بردو وبعدين انت بتكلمنى كده ازاى انت اتجننت انت مش عارف انت بتكلم مين ؟
__________________
وخد عندك كتير بقى من المواقف دى
بس عايزين نعرف
* ايه يا جماعه احنا فين هنا ؟
* يعنى ايه انت اتهبلت انت مش عارف انت بتكلم مين ؟
* لغايه امتى هنسمع ونشوف واحنا ماشيين ناس بتقول انت مش عارف انت بتكلم مين
ناس تبلطج على ناس ولما ييجو يردو وبالادب يكون الرد عليهم
( انت مش عارف انت بتكلم مين )انت مش عارف انا مين
انت مش عارف انا ابن مين
المهم انتو ايه رائيكم
وياريت لو حد صدفه موقف زى ده يعرفهولنا
اتمنى الكلام يكون خفيف عليكم


وفى النهاية

مقدرش اقول غير اننا لو فضلنا نتعامل كده مش هنتقدم ولا هنقدر نوصل ونبقى زى زمان لما كنا بنتحكم بعلمنا فى العالم كله


بنضحك على بعض بالكلام علشان منعطلش نفسنا بس والله اللى بيعمل كده معاه الف حق فى كده مهو عايز يخلص مصلحته زى محصل مع البنت فى المثال التانى

او بنتباها بالمنصب زى محصل فى المثال الاول للواد الصغير والراجل الكبير

[~ man neO ~]

شوف انتى الموقف ده هو ما قلوش انتى بتكلم مين والموقف ده حصل مع جماعه اصحابى
واللى عمله اناا اعرفه كويس
كانوا قاعدين على مقاعد تحت عماره وكلاء النيابه بتاعت المحكمه بتاعت طاميه عندنا
فوكيل النيابه طالع من المحكمه وشاور من بعيد بايده اللى هما يقوموا فكل اللى كان قاعد
قام وكانوا مجموعه كبيره والمعلم ده قاعد ماقمش لا وايه حاطط رجل على رجل
فوكيل النيابه جه جمبيه وقالوا مشفتش زمايلك كلهم قاموا مقمتش ليه
قالوا محدش يقدر يقومنى وبلطج معاه شويه فالعسكرى ميل على وكيل النيابه
وقالوا ييا باشاا سيبك منه ده عبيط قالوا يستعبط على نفسه
راح المعلم رد عليه وقالوه انتى غريب فى البلد دى فقعد باحترام علشاان تعرف
تقعد مش عايز اكلمك
فراح وكيل النيابه سايبوا ومشى ومن بعديهاا لما يشوف حد ولا اكنه شايفه

يعنى الواحد زهق من موضوع عندك واسطه تروح تشتغل عندك واسطه
تقدم لكليه حربيه عندك واسطه تخلص حاجه عندك واسطه
كمان شويه نروح نتجوز يقلولناا عندكم واسطه
لا ولا البلوه الاكبر لو اتجوزناا وحبيناا نخلف مراتك تقولك هاات واسطه
الاول
دى مشكله والله وربناا يرحمناا برحمته
وشكلراا ليك مودى على الموضوع

[sunbright]

انت اتجننت ........ انت مش عارف انت بتكلم مين ؟؟؟

بجد كلمه بسمعها فى اليوم اكتر من 20 مره

تسلم ايدك يا جميل

[Mr.Mo0ody]

كمان شويه نروح نتجوز يقلولناا عندكم واسطه
لا ولا البلوه الاكبر لو اتجوزناا وحبيناا نخلف مراتك تقولك هاات واسطه
الاول

هههههههههههههههههههههههه
جديده دي يا محمود

بس الحاجات دي ماينفعش فيها وسطه خاااااااااااالص

ههههههههههههههههههههه

شكرا محمود على الرد الجميل ده
وشكلك مكبوت قوى من الموضوع ده

تسلم ايدك
ونورت التوبيك

[Mr.Mo0ody]

انت اتجننت ........ انت مش عارف انت بتكلم مين ؟؟؟

بجد كلمه بسمعها فى اليوم اكتر من 20 مره

تسلم ايدك يا جميل

تسلمي يارب

وفعلا بقت حاجه تخنق خالص

ميرسي ليكي ونروتى التوبيك

[طيف عابر]

بالفعل محمد كلام حقيقي وموضوع بيحصل للاسف فقط في بلدانا العربية
وعشان هيك بتلاقينا مكانك سر
بينما عند الاجانب الرئيس نفسه ما بيتجرأ يتهرب وما بيتجرأ يخالف بحجة انه رئيس

للاسف مشكلة خطيرة بالفعل واثرها اكيد سلبي

الف شكر
تسلم ايدك
لي عودة ان شاء الله

[شيري العسولة]

بص موضوع مهم بس عايزة اولك احنا مش بنعمل كده من فراغ بجد
الواحد بيشوف بلاوى
اقل حاجة علشان اعمل البطاقة لو كان بابا ( الله يرحمة ) ماكنش معايا ماكنتش عاملتها خالص
بس المنصب حلو كتير يامودى
وانا بجد ساعات كتير بتحط فى مواقف واضر اقول الكلمة دى انت مش عرف انت بتكلم مين
يعنى مثل بسيط انا لما كنت فى المدرسة الثانوى المدير كان مضايقنى جدا سبتة مرة واتنين وفى الاخر زهقت وقولتة انت مش عارف انت بتكلم مين ومن ساعت ما بابا شد ودانة بطل يجي جمبى
ف عايزة اقولك ان المواقف هى اللى بضرنا نعمل كده بجد
بس فى شباب وخداها موضة مع تغير اللبس كده

سورى لوطولت عليك بس الموضوع بجد مهم جدا

[taher said]

بص يا مودى مواضعك جميل بس الناس البيحصل معها كدة وبتسكت هيا الغلطنة لو كل واحد قال لا اكيد هانتغير انا ان شاء الله عمرى ما هاعمل كدة

[كابوس الحرامية]

البلد دي بقت ماشيه كوسة ووسايط ربنا يخرجنا منهم على خير بقى الا انا اتخنقتمرسي يا مودي على الموضوع اللي يجنن دة

[salama10]

فعلا يامودى موضوع متكرر وبقت موضة

بس عارف لو البلد ماشية مظبوط

ما كانش حد قدر يقول الكلمة دى ابدا

بس للاسف

البلد ماشية بالوسايط

فكل واحد حتى اللى معندهوش واسطة

بيحاول

علشان مايروحش فى الرجلين

دمت بخير وود