خطـــــك وحش ... بالذمة دا خط واحد كبيـر
جملـة لو إتقالت لأي حد، أكيد حيبقي شكله وحش أوي أوي
أنا حأعرضلكم حـوار مع واحد خطه بالصراحة وحش أوي، شوفوا الحوار ده
إيه رأيك في خطـك؟
أنا شايف إن خطي حلو لأني بحبه .. ثم إن العباقرة أصلا خطهم وحش .. و بحب أوي فكرة إن خطي لو مكتوب في وسط مليون خط، أصحابي بيطلعوه و يعرفوا إنه خطي.!!!
تفتكر حاجة عن حصة "الخط العربي" أيام المدرسة؟
طبعا أفتكر إن مفيش لعبة ما لعبنهاش في حصة الخط .. كنت بحس أنها حصة لتنمية قدرتنا علي اللعب و التهييس، و كانت بعيدة كل البعد عن فكرة ازاي نكتب أو نحسن خطنا.!!!
العيب في مين من وجهة نظرك؟
العيب في النظام اللي عودنا علي إنها حصة فاضية .. بتتقدم بطريقة غبية إيه الفكرة من إن حد يكتب جملة أنت تكررها.
إزاي تكون فنان و متمكن في الرسم بالشكل ده و خطك يكون كده؟
حكمة ربنــــا ..!!!!
فكرت تروح لحد يعلمك الخط؟
فكرت و أنا كبير لأني زمان كنت بتكسف .. لكن اكتشفت إني صعب أتعلم من جديد، لأني اتعودت و لأني فشلت إني أحسنه، علمت نفسي إزاي أتأقلم معاه و بقيت بحبه.!!
أكتر موقف محرج خطك حطك فيه؟
كنت مرة كاتب في اسكتش الجامعة، و واحد من زملائي قرأها بالصدفة و قال:"مين أطفال إبتدائي اللي بيلعبوا في اسكتشاتك دول؟!!"
مواد الجامعة إزاي بتنجح فيها؟
عادي يعني، المادة اللي المفروض أجيب فيها امتياز، بجيب فيها مقبول.!!
و إيه الإنشكاح اللي انت فيه ده يا بني، مش صعبان عليك تعبك يضيع عشان الخط؟
ما أنا قولتلك إني اتأقلمت معاه .. و أهم حاجة إني متأكد من جوايا إني ذاكرت و عملت اللي عليا و استاهل امتياز..!!
لو أنت مكان الدكتور اللي بيصحح ورقتك تفتكر هتستحمل تكمل الإجابات للآخر؟
المشكلة مش في إني استحمل .. المشكلة في القدرة علي فك الطلاسم .. أنا كتير بكتب حاجات و فعلا مش بعرف أقراها .. و هتكون النتيجة إن لو المادة مفروض تجيب امتياز هيكون أخرها معايا مقبول...!!
مش حاسس إن عندك مشكلة محتاجة حل؟
عندي مشكلة بس مش مأزماني يعني .. زي حد طخين و عايز يخس، فحاول بس مش عارف. خلاص بقي بيتعايش مش هيفضل طول عمره حزين عشان طخين يعني..!!
" أعتقد إن السبب الرئيسي هو إن في طفولة الشخص ما إهتمش بموضوع الخط ده، مع إنه كان لازم يحسن من نفسه و هو صغيـر، و برضه المسؤولية بتبقي علي الآباء عشان هما اللي مفروض بيطوروا طفلهم "
و انت بقي خطك مفخــرة كده و لا .....
" إهداء لMido_7 و المعلم عـجــوة كرامل "