تصدق ان الملك خوفو كان اهلاوى؟

[فــــارس الكافيه]

خوفو كان اهلاوى

بيقولوا :

خوفو كان اهلاوي وعلشان كده خد أكبر هرم في العالم ومصر

اما خفرع الأصغر منه شويه كان زملكاوي وعلشان كده خد الهرم اللي بعده علطول

اما منكرع فعلشان كان اتحاداوي اسكندراني فحطوه على بداية طريق مصر اسكندرية الصحراوي

وقدموله الهرم الثالث في مصر

والقصه دي بتبين لنا مدى شعبية الاهلي والزمالك والاتحاد في زمن الفراعنة

علشان كده بنوا ليهم 3 اهرامات وماكنش لسه في انديه تانيه طلعت غير التلاته دول

ولا انبي ولا اسماعيلي ولا حتى طلائع الجيش !

كان يجي الماتش بتاع الاهلي والزمالك وتلاقوا طيبة كلها مش على بعضها

وكل فرعون او فرعونه ينزلوا من على الاهرامات ويطلعوا من التوابيت

ويطلعوا يجروا على السينما الموحده الكبيره ( ماكنش لسه في تليفزيون )

او كانوا بيتفرجوا بالوصله وهما في المعابد بتاعتهم بيشربوا بردي ( شيشه فرعوني )

كان الفراعنه بيحبوا تعليق علاء صادقع ومحمود بكرع وأمون رع ( واحد فرعوني زي تريكه كده )

مره منتخب الفراعنه كان بيلاعب منتخب الهكسوس والدنيا كانت مقلوبه في تصفيات كأس العالم

كانت ساعتها الكوره في العالم في 5 دول بس : الفراعنه ابطال العالم ومنافسهم اللدود الهكسوس

والرومانيين والفرس والعرب

والهكسوس دخلت فينا جون بدري على ارضنا

وفاجأه لاقينا جماهير خوفو ( الاهلي ) بتشتم في شحاتايزييس وبتحدفه بالموز في الملعب

وفاجأه لاقينا جماهير خفرع ( الزمالك ) بيشتموا في حضري أتون وبيحدفوه بالبصل

وملحوظه ان شحاتايزييس كان مساعد المدير الفني أبو الهول

لان ابو الهول هو اللي كان ماسك منتخب الفراعنه ساعتها

وحضري أتون بعد الماتش احترف في الهكسوس بعد تألقه ومات مدفون في تابوت هربان لليونان

واليوم ده في التاريخ اصلا كان سبب الحرب بين الفراعنه والهكسوس

علشان فيه قشرة موزه جات غلط على أفا واحد من مشجعي الهكسوس

وطبعا انتم عارفين أحمس عمل ايه فيهم ( يقال ان تريكه من سلالة أحمس * )

والحمد لله ان الفراعنه قدروا يحولوا الهزيمه الى نصر والجماهير الاهلاويه الزملكاويه

بدل ما ينزلوا يحتفلوا : نزلوا الملعب يضربوا في اللاعيبه وفي بعض

وكان القطرين ساعتها قطر زملكاوي تبع كاكد الكاندور وقطر اهلاوي تبع تريكيكا

قطر الاهلي كان فودافون ومشروبهم البيبسي وقطر الزمالك كان موبينيل ومشروبهم الكوكاكولا

المهم ان البلد كان كلها تعصب للساحرة المستطيلة

وعلشان التعصب ده كان اي لاعب يتنقل من خوفو لخفرع كانوا بيقتلوه ويحطوه في تابوت

والعكس صحيح وعلشان كده لاقينا العديد من المومياوات للفراعنه من عصر خوفو وخفرع

ولكن في نهاية عصر الفراعنه اراد الحاكم ان يقضي على كل ما هو متعصب

فبنى الاهرامات الثلاثه ودفن كل مشجعي الانديه الثلاث في مصر فيها

ومافضلش منهم غير واحد بس كان مسافر وعلشان كده الفراعنه كلهم اسرار ماحدش عارفها

المهم علشان مانخرجش بره الموضوع

ان الواحد المسافر ده الناجي الوحيد منهم التاريخ لم يحدد هويته

فيه برديات بتقول انه كان اهلاوي

وفيه برديات بتأكد انه كان زملكاوي

اما المعابد فكتبت انه كان مالهوش فيها ولكنه لما رجع تعصب من ما حدث للشعب

وقرر ان يشجع الاهلي ومراته أعترضت وطلعت زملكاويه ومن هنا عاد الصراع مره اخرى !

ولكن بفكر حديث ومن ثم بدأ عهد المماليك والتاتار وقطز ومحمد علي

وانتشرت شعبية الاهلي والزمالك اكثر واكثر

حتى وصلنا لعهد السيد الرئيس محمد حسني مبارك موحد القطرين ( الاهلي والزمالك مع بعض في مدينه واحده هي القاهره !! ! )

ويقال في نشرات الاخبار انه اهلاوي وابنه زملكاوى

[فــــارس الكافيه]

اد كده وحش ومش عاجب حد

[مرمر]

لا طبعا جميل ومعلومات جاااااااامده بصراحه

تسلم ايديك فارس موضوع حلو

[khalouda]

لالالالالا الملك خوفو هو الزمالكاوى وعلى فكرة كان صاحبى الروح بالروح وخليفتة الملك فاروق صاحبى برضوا

نادى الزمالك هو النادى الملكى

[mano]

يخرب عقلك يا راجل والله العظيم جامدة كييييييييييك تسلم ايدك

[princess nour]

ههههههههههههههههههههه جااامد موت يافارس ولله تسلم ايديك ياجميل

[فــــارس الكافيه]

ميرسى يا نور على مرورك الجميل جدا ده واحب اقولك ان مرورك ده كتير كتير نورنى

[spider2009]

لالالا
غلط كل اللي بتقولوه ده
الملك خوفو
كان بيشجع نادي السكة الحديد
علشان ده اول نادي في مصر

[فــــارس الكافيه]

هههههههههههههههههههههه تسلملى يا واد على الرد الجميل وعلى المرور الاجمل ده

[عصفورة صغيرة]

ايه دا ايه دا؟
هو انت من سنه كااااااااااااااااااام؟؟؟؟ ؟؟؟؟؟
ههههههههههههه
بجد بجد بجد جاااااااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااااا ااااااااااااااامد
تسلم الايادى ,,

تقبل مرورى ,,,,,