الحلقة التانية
أعزائي مستمعين برنامج (احلى سبعه الساعه 7 ونص الا تلت) ... نسضيف اليوم المطرب العالمي المشهور صاحب الصوت الجهور .. إللي بيطلع من تحت الماجور ... أقوى من خوار الطور ... وأحسن من تغريد الصقور .. مطرب ركب الحنطور .. ووقف طابور .. لحد ما جه عليه الدور .. وبيتكتب عنه سطور .. مطرب بجد شكله يحير ... ولما تسمعه وشك يتغير ... كان طويل وفجاة بقدرة قادر أصبح قصّير .. كان كبير .. ودلوقتي بقى صغّير .. يا ترى عرفتوه .. المطرب ....... في أخر البرنامج إذا عرفت إحنا بنتكلم مع مين .اتصل على 666راجل666 تكسب معان جايزة البرنامج وقيمتها جاموسة بس ابقى شربها لبن ..
المذيع : أهلا وسهلا بيك منور برنامجنا ( إللي اختشوا نامو) قصدي اللي اختشوا ماتو
المطرب : أهلا بيك يا باشا .
المذيع : يا ترى إيه آخر أعمالك ؟
المطرب : أغنية لسه بسجل فيه حاليا هاتكسر الدنيا إسمها ( يا دنيا بربشي وضحكيلى وفرفشى )
المذيع : إيه رأيك في مطربين الزمن الجميل زي أم كلثوم وعبد الوهاب وفريد الأطرش . ونجاة وأسمهان وعبد الحليم وغيره .. ؟؟
المطرب : الزمن إللي إحنا فيه هو الزمن الجميل , لأن المطربين إللي سعادتك ببتكلم عليهم ما بيعرفوش يرقصوا زينا , وكانت الأغنية تقعد بالساعات لما كنا بنمل منها .
المذيع : إيه رأيك في ناس بيقولوا إني كلمات أغانيكم هابطة لكن كلام أغانيهم موزونة ؟
المطرب : الناس دول لا مؤاخذة ما بيفهموش لأننا ماشين مع الزمن كان في حد بيغني على أيامهم للحمير ولا للفوكه زي المانجا والبلح والعنب , بلاش كده حد فيهم غنى للبانجو .. يا باشا ما فيش مقارنة بينا وبينهم
المذيع : نشكرك
حكمه اليوم
المذيع : سيادتي سادتي المستمعين ,, إللي اختشوا ماتوا ..عارفين أصل المثل ده إيه ,,( مره حصلت حريقة كبيرة في الصيف والدنيا حر في عمارة وكان الناس في الوقت ده بيخدوا حمام كل واحد في مكانه ولما هجمت النار عليهم .. كل إللي لحق نفسوا وطلع وهو قالع هدومه عاش , وإللي اختشا ومرضيش يطلع عشان هو قالع .. مات )
عشان كده بنقول إللي اختشوا ماتوا
يا ترى مين المغني اللي كان معانا النهارده .. ياللا جاوب عشان تكسب جايزتنا مستنين مكلامتكم
علي 666 راجل 666
وانت تكسب
ومتنساش تشربها اللبن كويس