العياااال اتغيرت

[masman]

العياااال اتغيرت

العيال الأيام دي محتاجة طريقة حوار وتعامل غير اللي اتربينا عليها زمان العيال الأيام دى وصلوا والعالم مفتوح على بعضه مش زينا اللى اتربينا على القناة الأولى والتانية بالتيلة
خلاص مينفعش تقول للعيل دلوقتي العصفورة قالت لي وفتنت لي عليك

عصفورة إيه وهو بيفهم في الموبايل بتاعك أحسن منك ؟
ومينفعش تخوف العيل بأبو رجل مسلوخة

لأنه هايدخل على جوجل و يعمل سيرش عن معنى أبو رجل مسلوخة وهيلاقي الموقع بيقول له: هجايص وأساطير عملوها الكبار ف القرن اللي فات عشان يخوفوا بيها العيال

مينفعش تعاقبه بأنك تأومه من أودام فيلم بيحبه وبيتفرج عليه

لأنه هايشوفه تاني يوم على نفس المحطة الصبح وإنت ف الشغل ويخليك زي قرطاس الجوافة

عايز تعاقبه

نزل له فيروس على الجهاز بتاعه ودمر له الوندوز وقول له الجهاز مش ها يتفرمط ويتعمل له ست أب من أول وجديد ألا لما يتعدل ويشوف مذاكرته و يبقى محترم وبنى آدم

لما تعوز تدلعه وتكافؤه على تفوقه

مينفعش تجيب له بندقية صيد وكوره وكتب م المكتبة الخضراء والجو القديم ده كله تجيب له( دي اس ال) ممكن تظبطه بويب كام جامده أو تدخل علية ( بسكرين)

مينفعش لو أبنك سألك عن حاجه منتش عارفها تألفله أى أجابة من دماغك

بعد يوم ولا اتنين هايعرف الإجابه الصحيحة م التليفزيون ولا النت وساعتها هيبقى منظرك عامل زي العدة الأريكسون 688 لما يسألك أقعد معاه ع النت ودور معاه ع الأجابة المظبوطة و بلاش قلة قيمة

وأوعى تفهم الواد إن الرياضة هى أهلي وزمالك

بلا نيلللللا.. على رأى ماري منيب لأنه دلوقتى عارف لعيبه ريال مدريد والأرسنال وعارف أسعارهم كمان

وأذا طلب رأيك ف أكلة دليفرى م اللى بياكلوها الأيام دي

أوعى تقول له: يعنى أيه دى .. لأ خليك أب روش هز دماغك بألاطه وقول له.. حلوة طحن ياااد

[BA7IBAK YA BOY!]

ههههههههههههه

حلوه اوي بتاعت حلوه طحن ياد

بس بجد

موضوع روعه وحقيقي جدا

انا دلوقتي بنات عمتي وبنات خالاتي وخلاني

كل واحد وواحده منهم

في اولي وتانيه ابتدائي والكبير فيهم في خمسه

معاهم موبايلات

عيال لسه في اللفه ومعاهم موبايلات

وبيعرف يشتغلو بيه احسن مني

احنا اللي مش فاهمين ولا هما اللي كبار

الواحد اشتغرب من الدنيا دي

كان زمان رغيف العيش كبير والدنيا صغيره

دلوقتي الرغيف صغر والدنيا كبرت اوي

تسلم يا عثل علي الموضوع

رائع ومتميز كعادتك

[dr_manoon]

عندك حق ياماس بجد فكرتنى بموقف
قلت مره لبابا هو راجل ده بعتنا بيقولى يعنى ايه يبنتى
بقوله بعته يابابا مش عارفه بعته
يعنى حلقلنا هههههههههههههه
قالى هو انا فهمت الاولى امما افهم التانيه

[مسلمـ]

ههههههههههههههههههههههه


موضوع جميل وخفيف في فكرته وإسلوب طرحه


وإن كان بالفعل الواقع بيقول إن الأطفال دلوقتي بقو طفرة كبيرة عن الأطفال أيامنا إحنا


يعني ممكن الواد من دول ميعديش تلا سنين

ويعرف معلومات عن الكورة أحسن من واحد عدا الأربعين


ولسه ياما هانشوف

[affaan]

دايما بحب أقول "احنا مكناش عيال" ..

كل ما بشوف العيال بتاعة الأيام دي
بحكم أنى "مدرس" بقول المقولة دي ..

شكرا لموضوعك الهادف يا جميل ..

[العوامى]

دايما بحب أقول "احنا مكناش عيال" ..

كل ما بشوف العيال بتاعة الأيام دي
بحكم أنى "مدرس" بقول المقولة دي ..

شكرا لموضوعك الهادف يا جميل ..

فعلاً إحنا ماكناش عيال
كنا ملايكة
تسلم ايديك ياماس

[طيف عابر]

موضوع طريف وجميل
وفعلا جيل بيعرف كل شيء وصعب تسكته بكلمة او تعطيه شيء مكان شيء
انا فعلا احيانا بقول لو كنا متلهم والله اهالينا ما كانو يمكن تحملونا لاننا فعلا مكناش ابدا اطفال متل اطفال هالايام
طفل بيطالب بحقوقه من وعمره 4 سنين او حتى من اول ما يقدر يتكلم

شكرا كتير على موضوعك ماسمان

[mony]

والله فعلا موضوع متعايش مع عصرنا جدااااا
شكرا ليك
ومنتظرين المزيد

[TiMo0oR]

انتوا لسه شوفتوا حاجه

استنوا بس كام سنه و هيعملوا اكتر من كده

ده دلوقتى تجيب عيل عنده 10 سنين يفهم اكتر منك و يقولك حاجات من مش عارفها

[Hooba]

الموضوع ده قديم شويه
ويا رب ما يطلع مكرر

فن مخاطبه الأطفال

العيال الأيام دي محتاجة طريقة حوار وتعامل غير اللي اتربينا عليها زمان...
العيال الأيام دى وصلوا !!!!
والعالم مفتوح على بعضه مش زينا اللى اتربينا على القناة الأولى والتانية العتيقه واحياناً التالته

خلاص مينفعش تقول للعيل دلوقتي العصفورة قالت لي....وفتنت عليك
عصفورة إيه وهو بيفهم في الموبايل بتاعك أحسن منك ؟

ومينفعش تخوف العيل بأبو رجل مسلوخة....
لأنه هايدخل على جوجل و يعمل سيرش عن معنى أبو رجل مسلوخة وهيلاقي الموقع بيقول له: هجايص وأساطير عملوها الكبار ف القرن اللي فات عشان يخوفوا بيها العيال

مينفعش تعاقبه بأنك تأومه من أودام فيلم بيحبه وبيتفرج عليه..
لأنه هايشوفه تاني يوم على نفس المحطة الصبح وإنت ف الشغل....ويخليك زي قرطاس الجوافة!!!!

عايز تعاقبه
نزل له فيروس على الجهاز بتاعه ودمر له الوندوز... وقوله الجهاز مش هيتفرمط ويتعمله ست أب من أول وجديد إلا لما يتعدل ويشوف مذاكرته و يبقى محترم وبنى آدم.

عاوز تدلعه وتكافئه مثلا علي تفوقه ؟؟؟؟
مينفعش تجيب له بندقية صيد وكوره وكتب من المكتبة الخضراء والجو القديم ده كله....
تجيب له( Dsl) ممكن تظبطه بويب كام جامده او تدخل علية (Lcd بسكرين)

مينفعش لو أبنك سألك عن حاجه منتاش
عارفها تألف له أى أجابة من دماغك.........
بعد يوم ولا اتنين هايعرف الإجابه الصحيحة من التليفزيون ولا النت.... وساعتها هيبقى منظرك عامل زي العدة الأريكسون 688 لما يسألك... أقعد معاه ع النت ودور معاه ع الأجابة المظبوطة و بلاش قلة قيمة بقي .......فضحتنا يا راجل!!!!!

وأوعى تفهم الواد إن الرياضة هى أهلي و زمالك
بلا نيلللللا.. على رأى ماري منيب... لأنه دلوقتى عارف لعيبه ريال مدريد والأرسنال وعارف أسعارهم كمان

وأذا طلب رأيك ف أكلة دليفرى من اللى بياكلوها الأيام دى
أوعى تقول له: يعنى أيه دى....
لأ خليك أب روش هز دماغك بألاطه وقول له.. حلوة طحن يا وااد