انا اسف

**egm** · 25 - 4 - 2009, 09:07 PM

هو أنا ليه ماخدتش.. بالى مره وكمان مافكرتش.. إن أنا ممكن اجرح ناس وكمان أخربش.. وديما بقول إن أنا مأبأذيش.. وأتارينى بأذى ناس.. وبعاملهم من غير احساس.. وأرجع أقول دا أنا اسف دا كان قصدى والله خير.. دا أنا بس كان عندى مشكله.. وكنت مشغول فى حلها.. والحمدلله وصلتلها وعرفت أيه اصلها.. وياريت ماتزعلش منى وأنا اسف مره تانيه.. واقول لنفسى ما أنا خلاص اعتذرت.. يعنى هاعمّله إيه أكتر من كده.. أنا خلاص عملت اللى عليّا.. وأتارينى سيبت قلب بيبكى وكمان بيقاسى.. وهايفضل يتألم سنين وسنين.. مع انى سألته وقالى دا أنا مسامحك.. وعادى ماهو ده طابعك.. طول عمرك مش متعود تيجى تقول أنا أسف باقتناع.. ولا عمرك حتى قولت متشكر بإيقاع.. طول عمرك بتقول أسف وبحس إنها غصب عنك.. وكمان متشكر وهى يعينى مخاصمه قلبك...

عارف انته لما تزعل حد منك كأنك دقيت مسمار وشيلته تانى فلازم يسيب أثر فى مكانه...
طب عارف مره إتنين كانو بجد إخوات.. وديما بيقضوا مع بعض أحلى أوقات.. ومن كل قلبهم بيدعوا لبعض ويتمنوا أمنيات.. ولعب وضحك ودمع وهزار وحاجات وحاجات.. جه الشيطان دخل بينهم من سكات .. وزعلوا من بعض واتخاصموا ساعات وساعات.. ومع مرور الوقت كل واحد فيهم كان بيستخبى جوه قلبه ويتمنى ترجع تانى الضحكات.. ونفسه يجى اليوم اللى يرجعوا فيه تانى اخوات.. بس كان واقف بينهم للأسف شوية عناد.. بأه أروح اقوله أنا اسف.. أنا جرحتك.. أنا اذيتك.. أنا زعلتك.. أنا ظلمتك.. سامحنى دا أنا كل همك.. دا أنا صحبك.. دا أنا أخوك ..دا أنا نفسى أبقى جنبك.. وأرجع تانى امسحلك الدمعات...وفضلوا اللى الاتنين يكابروا ويكابروا مع العناد.. وعدى الوقت وجات اللحظات.. اللى فيها اتصالحوا بس للاسف مش زى الاخوات.. وعشان مش عارفين يرجعوا تانى اخوات.. فضلوا طول عمرهم يندموا على اللى فات.. واعتبروها بس برواز لأجمل ذكريات.. وكان ده كله سببه إيه إن اننا مش متعودين نتعامل بشوية مصطلحات...

فيها ايه لو قلت من كل قلبك متشكر.. ومعاها إبتسامه بكل تحضر.. ولو جريت عليه وقولت بكل جوارحك أسف.. وصدقنى لو لفيت الدنيا مش هاتلاقى حد أكتر منى عليك خايف.. يابن الناس... ما تنساش كلام عليه الصلاة والسلام "تبسمك فى وجه اخيك صدقة"..."لا يحل لمسلم أن يهجر أخاه فوق ثلاث ليال‏ "..." إن الله قد أعطى كل ذي حق حقه " فيها ايه لو جيت مره وانته بتشترى حاجه.. او بتقرا حاجه.. او بتنزل حاجه من على النت وقولت متشكر.. او لو انته ماشى وخبط حد من غير قصد.. او ظنيت ظن سيىء.. او حتى شتمت او عملت اى تصرف غلط ..وقولت انا اسف... صدقنى هى حاجه جميله جدا وهاتزعل أوى لو قولتلك الناس بره بيتعامله كده وبيقولوا عليها تحضر مع انها عندنا أصل فى إسلامنا..
وكبدايه منى متشكر على قرايتك وأسف ان كنت صدعتك

منقول

**احمد طنطاوي** · 25 - 4 - 2009, 09:36 PM

عندك حق في كل ما قلته ..
فلانسان يستطيع أن يحيل حياته الي نعيم
بالرضا والحب والتسامح والعطاء والترفع
عن الصغائر .
أشكرك جدا علي الكلام الطيب .

**Serag Magdy** · 25 - 4 - 2009, 09:53 PM

وكبدايه منى متشكر على قرايتك وأسف ان كنت صدعتك

ولا يهمك يا معلم
ياريت تصدعنا بمواضيعك دي علطول
والله يا عم انت كل حاجة قولتها صح
لو كل واحد قال متشكر وقت ما واحد يقوم معاه بواجب
او قال انا اسف لو غلط في حق حد
محدش ها يزعل من حد
بالعكس
كله ها يبقي في مبسوط
تسلم يا معلم ع الموضوع الجامد اوي ده

**وردة نيسان سوريا** · 26 - 4 - 2009, 10:37 AM

اعتذارك مقبوووول ههع هع
ميرسي على التوبيك الحلو

**egm** · 26 - 4 - 2009, 04:20 PM

شكرا على مرور الجميع
وان شاء الله فى احسن
والى الامام يا روميل
هع هع هع هع هع

**بسمة حبيبي** · 26 - 4 - 2009, 05:04 PM

تشكر على الكلام الجميل
دمت بخير تحياتي ليك

**egm** · 26 - 4 - 2009, 05:55 PM

الف شكر بسمه
وشكرا على مرورك
ودمتم بخير

**mozo** · 30 - 4 - 2009, 12:25 AM

اكيد الكلام جميل جججججججدا
والله
ولازم نحس ببعض
واللي يغلط يقول انا غلطت
واللي حد يعمل معاه حاجة يشكره
المهم ان يكون في تفاعل طيب بين الناس
شكرا يا جميل على الكلام اللي زي الفل ده

الموضوع: انا اسف

أدوات الموضوع

انا اسف

معلومات الموضوع

الأعضاء الذين يشاهدون هذا الموضوع

الكلمات الدلالية لهذا الموضوع

ضوابط المشاركة