لو شاطر... تعرف تعيش في مصر بـ 1000 جنيه ! ! !

[اسلام غانم]

دورك فى طابور الفرن تلحق شغلك فى نفس الوقت ربنا معاك

حليب 120 جنيه عدد واحد لتر يومياً ويارب ميطلعش بودرة سيراميك ويكفى العيال

فول 32 جنيه كيلو فول اسبوعيا يعنى 125 جرام يوميا رضا والحمد لله

جبنة بيضاء 80 جنيه "كيلو في الأسبوع 125 جرام يوميا انت عايش "

بيض 20جنيه عبارة عن 10 بيضات فى الاسبوع يعنى لو اربع افراد يبقى بيضه ونص يوميا للاربعة

خضار 40 جنيه عبارة عن صنف واحد بس + كيلو طماطم + لمونه وحزمة جرجيراسبوعيا

فواكهه 20 جنيه عبارة عن كيلو برتقال أو قشر موز مرة اسبوعيا علشان العيال تفتكر اسمة

شاى 10جنيه لزوم الكيف اللى بيذل والضيوف الرزلين

سكر 16 جنيه عدد واحد كيلو اسبوعيا مش بقولكم الكييف يذل وضيوف معندهمش دم

ارز 16جنيه عدد واحد كيلو اسبوعيا للعائلة كلها يعنى 125جرام يوميا متوسط الفرد 40جرام

زيت 40 جنيه لتر اسبوعيا علشان تشرب بق على الريق يزيت معدتك 000 يستعمل كبديل للخضروات

مكرونه 32 جنيه عبارة عن عدد 4 كيس 400 جرام اسبوعيا 0000 خلى العيال تنبسط

دجاج 80 جنيه عدد واحد دجاجة اسبوعيا للعائله 000000 اظن معقول

لحم 120جنيه عدد واحد كيلو لحم اسبوعيا لزوم صنف الخضار واللمونه وحزمة الجرجير 00 الف هنا

بقوليات 10جنيه عبارة عن كيلو واحد بس شهريا ونقى اللى بتحبه براحتك ( عدس - لوبيا .... )

توابل 10جنيه عبارة عن دقيق + ملح + كمون + فلفل + كسبرة + وممكن تديها خل براحتك

صابون 15 جنيه عبارة عن صابونه واحدة للحمام + صابون مواعين + مسحوق للملابس

مواصلات 60جنيه بعد طابور الفرن تركب أتوبيس الهيئة ذهاب وعودة وبهدله وفرهده لفرد واحد

حلاق 10جنيه عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا )

مدرسة 40جنيه عبارة عن مصروفات المدرسة + مصروف العيال اليومى + كراسات 00ألخ

دكتور 30جنيه نمرض بالدور طبعا عدد اربع افراد مرة واحدة للفرد كل 4 اشهر وربنا يستر

ادوية 50جنيه أكيد طبعا العلاج بالدور وربنا يستر واتنين ميمرضوش فى وقت واحد تبقى كارثه

تليفون 10جنيه اشتراك الهيئة هنرد بس ومش هنتكلم معدش ينفع كلام

مياة 10جنيه للاسف لازم نشرب مياة ملوسة بالمجارى

غاز 5جنيه الحمد لله غاز طبيعى الله فى عون اللى عنده انابيب ( 10 جنيه للانبوبه ) وممكن تطلع فاضية

نور 20جنيه لمواكبة التطور غساله ملهاش مسحوق - تلاجة فاضية - بوتجاز يستخدم مرة كل اسبوع

قمامة 10جنيه اجبارى طبعا ومن الواضح ان العشة دى مفيهاش اكل اساس يبقى القمامة هتيجى منين

بواب 15جنيه مهو من حقه يعيش هو كمان لو عشر شقق يبقى 150 جنية شهريا خليه يهيس

صيانة 30جنيه لاصلاح الاجهزة بالدور غساله - سخان - بوتجاز - مروحه - تلاجة - سباكة - لمبات انارة الخ

ملابس 100جنيه عبارة عن الصيفى والشتوى داخلى وخارجى واحذية وشرابات واتصرف بقى

الاجمالى 1081
اكيد اللى هيخليك تعرف تعمل الكلام اللى فوق ده هيخليك تتصرف وتضغط مصروفاتك شويه علشان تبقى الحسبة 1000 جنية اقولك متمرضش ومتخدش ادوية وشيل 80 جنية معلش ربنا يقويك وينصرك على من يعاديك ويكفيك شر المرض




ايجار الشقة طبعا قانون جديد وللاسف ملهوش قانون كل واحد وبخته ومش هنحسبها كل واحد يقعد عند امه وبالمناسبة

عيد الام ربنا يخليها ويديها الصحه ---------- كل سنة وهى طيبة

عيد الكحك ---------------------------------- مضر وملهوش لزمة

عيد اللحمة ---------------------------------- مضر وملهوش لزمة

حلاوة المولد -------------------------------- السكر مضر وملهوش لزمة

[بحر الحنان]

ايه ده
والله حرااااااااام عليك البلد لسه بخير
يعني انا دلوقتي مش هخلي ابويا يزور صفحتك ابدا
انت عاوز تخلينا متغربين طول العمر ولا اييييييه
دانا بتحايل عليهم ننزل والله حرام يكون الحال كده
يلا ربنا معانا بقى بس انشاءالله هنلاقي رغيف نتعشى بيه

[احمد طنطاوي]

ايه ياعم اسلام حرام عليك
والله يااسلام لو 2000 جنيه
برضوا .. مفيش فايدة .. مش فايدة كامل
حسبي الله ونعم الوكيل
والحمد لله علي الستر .

[اميره بلا وطن]

دا على كده بقى ولا ميت الف جنيه يكفوا

[ميدو2]

ما بتتحسبش كده
الاسلام علمنا ان فى حاجه
اسمها البركه
البركه فى الرزق
العمر
من توكل على الله فهو حسبه

[brokenheart]

والله ولا 2000 حتي يكفو

ده الجنيه قرب يبقي شبه الليره .. بعد كدا ندفع 200 جنيه و نشتري باكو لبان

وانت حسبتها علي اساس طبقة تحت تحت المتوسطه .. ربنا يكون في عون الناس بجد

تسلم يا بوب ع الطرح المميز

واخيرا

تحياتي لكـــ