جى اصالحك

[::: MhYeS BS KwYeS :::]

آدينى بصارحِك .. أيوة ظلمتِك و اتسببت فى جرحِك .. و ف عز الفرحة هدمت فرحِك
و كان ساعتها من حقِّك تردهالى .. و رديتهالى
لما قسيتى .. عليا و مشيتى ... سايبانى بترجى فيكى .. بنادى عليكى .. تسمعى .. و لا بتسمعى
و مهما أحاول أوقفِك .. أهدِّيكى و احلفِك ... برضُه مش عايزه ترجعى
و لا عايزة تعديهالى
و مهما اقولِك سامحينى
غصب عنى ، ماكنش قصدى .. برضُه مشيتى و سيبتينى وحدى .. و انتى عارفه لما بتمشى و يهون عليكى بُعدى
أد إيه بتجرحينى
و دفعت تمن جرحِك من عذابى طول الليالى
كنت فى بُعدِك بتألم كل ثانية .. بتعذِّب مرتين ، مرة ليكى و مرة ليا .. نار و عايشة ليل نهار جوّه فيا
بس كنت بعذُرِك و من قلبى مسامحِك .

عزِّة نفسِك و كبريائِك .. خلوكى تختارى فُراقك
و رغم إنى غالى عندِك .. غصب عنِّك إخترتى بُعدِك
ماهو برضو كبريائك غالى
قلت استنى شوية لحد ما تهدى .. ما انتى لازم هتحنِّى ليا و تعدِّى ... ما هو برضُه حالِك من حالى
عاملة قدامى قوية و عنيدة .. و مش عيزانى
و انتى فى بُعدى عايشة وحيدة .. و أكيد محتجانى
ماهو مين غيرى هيحِسِّك ... حتى أكتر من نفسِك ... إلا حبيبِك .. و انا حبيبِك مش حد تانى
و انتى برضو أكيد حاسه بيا و عارفة إيه مالى
و عارفة إنى مش حـ اسيبِك ... وانى من تانى حـ آجى و اصالحِك
أيوه حـ آجى و اصالحِك .

هتصدينى .. هتقوليلى لاء ماتجيش ... مش خايف ، كدة كدة جى مايهمنيش
هاتحمِّل أى حاجة هتعمليها .. أى كلمة هتقوليها
كلُّه إلا بُعدك .. إلا دمعِك ... دا فوق إحتمالى
و صدقينى أنا خدتلِك تارك منى ... كنت مخاصمنى .. مش بكلمنى .. ضميرى بيلومنى .. و قلبى بيألمنى
دا انا حتى كنت من النوم حارمنى
كل اللى انتى عايزه تعمليه فيا ... عملتُه فيا .. كل كلمة كنتى عايزه تقوليها ليا ... أنا قولتيهالى
بس لو فى نفسِك حاجة لسه ، آدينى واقف قدامِك .. خلَّصى كلامِك ... و انا حـ افضل ساكت و مش حـ ارُد
و من غير ما اقول سامحى .. باينة آهوه ف ملامحى ... كفاية عند .. كفاية بعد
كفاية اللى جرالِك و اللى جرالى
خلاص بقى فُكِّيها
آدينى جيت ليكى .. و انتى عارفة انى ليكى ... و حياتى انتى بتملكيها
و انتى الوحيدة اللى ف خيالى
لو مش عايزة تقوليها بصوت ... قوليهالى سكوت ... فيه حاجات كتيرة ممكن تحكيها
و فيه حاجات كتير ف بالى
لمسة إيديكى ... أو نظرة ف عينيكى ... أو ضحكة نفسى تضحكيها
إضحكيهالى
مش لازم يقولها لسانِك .. كفاية أشوفها فى ملامحِك .
جيت أصالحِك .

[قطقوطة]

بجد جامدة اخر حاجة ويارب لو كانت كلماتك تصالحك بقة اعتقد مفيش بنت تسمع كل دا وتفضل مخصماك
وياريت تتقبل مرورى

[::: MhYeS BS KwYeS :::]

ثانكيوز اوي ياقطقوطه

نوورتي

[عصفورة صغيرة]

ايه يا عم الاحساس دا كله ..
مهيس مننين بقى ما انت مركز اوى اهو ,,,,

بجد كلمات روعه

تقبل مرورى **مريــــــــــــــــم**

[cenrila]

والله تبقي معندهاش دم

لو استنت مخصماك بعد دا كله

بس لو انت مهيس فعلا يبقي لها حق

هههههههههههههههه

تقبل مروري

[::: MhYeS BS KwYeS :::]

ههههههههههههههه

ميرسي اوي ليكو

نورتو

" مهيس بس كويس "