تخيل انك الرئيس

[احمد الصباغ]

تخيل أنـــــك الرئيـــس

دى مجرد فضفضة ... تنفيييييس

تخيل كدا انك بقيت الرئيس
احلم
يا عم انت حتدفع حاجة من جيبك
الحلم ده على حسابى
غمض عينيك شوية واحلم انك بقيت رئيس البلاد


متقولش ازاى .. مش مهم
زورت الانتخابات ... او قلت للناس انتخبونى احسن ارمى نفسى من فوق البرج فصعبت عليهم قاموا انتخبوك .. او يكون لك واحد صاحبك امريكاوى بتكلمه على الياهوو وقال لبوش انك ولد مجدع ورجولة وكفاءة وانك من بتوع العولمة والعوالم والنظام العالمى الجديد لنج .. ومش من اللى بيصلوا الفجر جماعة ... فوافق بوش انك تقعد على ... الكرسى



المهم انك بقيت دلوقتى رئيس البلاد
مين قدك يا عم

حتاكل طعمية مقلية بزيت فرنساوى وربنا حيتوب عليك من طعمية ام عميره وزهرة الميدان المقلية بزيت العربيات



وحتتعالج من انيميا الفول .. الفول الجديد بقه يا عم من غير سوس وهترتاح من عم سيد بتاع الفول



وابقى قابلنى لو لقيت اى مسمار فى العيش ... حتاكل عيش من ابو الرغيف بربع جنيه ... سخن وطازة وطرى .. تخيل .. طرى مش زى العيش اللى انت كنت بتاكله وانت بتشرب كباية ميه ورا كل لقمة علشان تنزل



لا لا العيش ابو شلن ده اللى انت كنت بتجيبه من الفرن ده لو قدرت تجيبه اصلا وعقبال متوصل بيه البيت يشلجم ويقفع ويعرقص ... وتعاقب عليه دوليا لأنه اصبح من اسلحة الدمار الشامل ... لا انسى الكلام ده خالص
الاوضاع حتتغير خالص ياعم ... دا انت ربنا حيكرمك خالص والله العظيم



طب بص دى ... حتاكل لحمة... طب والله لحمة .. متبرقش اوى كدة ... مش عارف يعنى ايه لحمة


انت مش كنت بتسمع وانت قاعد على القهوة وحاطط رجل على رجل وصباعك طالع من الجزمة انهم حيستوردوا حاجة كدة من السودان واثيوبيا
آه فاكر
اهى هى دى اللحمة
لا لا مش اللى انته كنت بتاكلها فى العيد ، بتاعت العيد دى اسمها كرشة ... متفضحناش بقه الله يسترك



وحيبقى فيه كنتاكى .. متسألش .. دى فراخ !!! يعنى حتودع عم ربيع السخاوى الفرارجى اللى كان بيعين لك رجلين الفراخ وانت كنت بتقول له عشان الكلب وكان ساعات يفوت لك حتتين قنصة على حتتين كبدة من بتوع الزباين اللى بيستحموا بصابون اجنبى



وحتشرب السيجارة كلها مرة واحدة .. يعنى مفيش تخميس
وبعدين دى سجاير ستراكى سترايك من بتاعت الست مارى منيب .. جو تانى



بس لما يخدوك علشان تحلف اليمين
ياعم دا غير يمين الطلاق اللى انته مصدره فى كل حدوتة تحكيها



اصحى معايا الله يكرمك

لما تروح تحلف اليمين اوعى تروح بالبدلة بتاعت جوازك .. انته عارف ... دى بقت مكيفة الهواء من كل ناحية .. الدكتور محمد مدكور اخو على مدكور عنده بدلة ابقى استلفها منه وإقضى مصلحتك وبعدين رجعهاله ... ماهى الجيران لبعضها امال ايه



وحياة رحمة امك يا شيخ متروح بالجزمة بتاعتك ... عشان خاطرى ابقى اشتريلك جوز جزمة من باتا يوه افتكرت باتا خصخصوها وباعوها لمحمود اسحق اشترى من الجماعه اللى قاعدين فى الشارع دى رخيصة هناك .... لأن الحدوة اللى انته مركبها فى كعب الجزمة بتعمل صوت .... قلق برضه .. وبعدين ممكن الجهاز يصفر عليك تبقى حكاية ... فاهم



أول يوم بس وبعدين همه بعد كدة حيتصرفولك فى جوزين جزم مستوردين عشان تقابل بيهم اصحابك بتوع الدول التانية



وحتنام على سرير عليه مراتب .. المراتب دى بقه جواها قطن ... ايوة قطن ... والله العظيم قطن .. ايوه تمام زى القطن اللى انته جبته من الاجزخانة للوله حودة ابنك لما الواد فضاله لزقه بالطوبة فى نافوخه فتحهاله



وجريت بيه على المستشفى قالولك هات لنا قطن وشاش وميكروكروم وصبغة يود وبلاستر وسرنجة وحقنة تيتانوس وكيس دم واقطع تذكرة بخمسة جنيه من شباك العلاج المجانى .... ايوه هو ده القطن ... فهمت



هتحلم أحلام نضيفة على السرير دا يا عم الحاج

افرد طولك ... متخافش رجليك مش حتطلع برة الاوضة .... انته مش فى بيتكم دلوقتى .. افرد افرد ... غمض عينيك كده .. غمض



ايه ... انت نمت اصحى يا عم ... اصحى ... الباب بيخبط ... الحق .. موظفين الكهربا على الباب ... الحق دول جايين يشيلوا العداد علشان بقالك 3 شهور مدفعتش الفاتورة والواد ابنك عايز فلوس الدرس والبنت عايزه فستان عشان معندهاش
والمدام بتقولك عايزه مصاريف الولاده ربنا ينتعها بالسلامه
و و و و و
برضه ميهمكش كمل الحلم الجميل واحلم واحلم واحكى لنا لو بقيت رئيس جمهوريه هتعمل ايه ؟؟؟؟؟
ياريت تقول لنا ........
ونحن فى الانتظار

[BA7IBAK YA BOY!]

طب هو ينفع ابقي رئيسه

مش لازم رئيس ذكر يعني

والله انا بيتهيالي حعمل حاجات كتير

بس ايه هي مش عارفه لان انا مش محطوطه في الموقف

بس مش حخلي في بطاله

مش حغلي الحاجات حجيب شقق للناس اللي في المناطق العشوائيه

حدي فرص عمل وشقق للشباب يعني مثلا الشاب اللي يوصل سنه 25 سنه ليه شقه


يعني حاجات كتير والله بس

جربو انتو وخلوني الرئيسه ههههههههههه

تسلم ايديك يا استاذنا علي الموضوع الحلو ده

بس قولنا برضو لو حضرتك الرئيس حتعمل ايه يا تري ها

[MagMan]

... الساعه 7 صباحا يوم السبت الموافق 26/1/2008...
..اذاعه لندن BBC تقول ..
.السلام عليكم ورحمه الله وبركاته.
تم انتخاب السيد/ محمد احمد عبد المجيد
رئيسا لجمهوريه مصر العالميه. (وده هيكون اسمها طبعا )
وقال في جلسته الافتتاحيه عده قرارات من اهمها الاتي:
اول قرار : اعدام الرئيس الاسبق رميا بالجزم .
القرار الثاني :نجاح كل الطلبه الموجودين بجامعه المنوفيه فرع السادات واغلاق الجامعه والتعليم من اساسه .
القرار الثالث : تعين كل اصحابي وزراء وكل المشرفين في مصراوي كافيه هخليهم قعدين علي قد تلقي الشكاوي والاقتراحات واللي هيخرج من الكافيه يبقي نهاره اسود ومنيل .
القرار الرابع : الغاء زراعه الكوسه في الاراضي المصريه .
القرار الخامس : انشاء اكشاك لبيع المخدرات والحشيش والبانجو وخلافه للشاب الخرجين .
القرار السادس : صرف باكو معسل يومي وعلبه سجاير للي مابيشيش
وده واجب مني للشعب .
...اللي مابيشربش يبقي وفر ...
واخيرا....
اللي يفكر يعارض الحكومه بتاعتي مش حرحمه no mercy
مفهوم ...
الغاء اشتراكات النت وجعله مجاني ب200 جنيه بس كل اسبوع وكفايه عليكم كده النهارده
سلامي لشعبي الحبيب

[Young DeviL]

... الساعه 7 صباحا يوم السبت الموافق 26/1/2008...

..اذاعه لندن BBC تقول ..
.السلام عليكم ورحمه الله وبركاته.
تم انتخاب السيد/ محمد احمد عبد المجيد
رئيسا لجمهوريه مصر العالميه. (وده هيكون اسمها طبعا )
وقال في جلسته الافتتاحيه عده قرارات من اهمها الاتي:
اول قرار : اعدام الرئيس الاسبق رميا بالجزم .
القرار الثاني :نجاح كل الطلبه الموجودين بجامعه المنوفيه فرع السادات واغلاق الجامعه والتعليم من اساسه .
القرار الثالث : تعين كل اصحابي وزراء وكل المشرفين في مصراوي كافيه هخليهم قعدين علي قد تلقي الشكاوي والاقتراحات واللي هيخرج من الكافيه يبقي نهاره اسود ومنيل .
القرار الرابع : الغاء زراعه الكوسه في الاراضي المصريه .
القرار الخامس : انشاء اكشاك لبيع المخدرات والحشيش والبانجو وخلافه للشاب الخرجين .
القرار السادس : صرف باكو معسل يومي وعلبه سجاير للي مابيشيش
وده واجب مني للشعب .
...اللي مابيشربش يبقي وفر ...
واخيرا....
اللي يفكر يعارض الحكومه بتاعتي مش حرحمه no mercy
مفهوم ...
الغاء اشتراكات النت وجعله مجاني ب200 جنيه بس كل اسبوع وكفايه عليكم كده النهارده

سلامي لشعبي الحبيب

بعد الكلام دا مبارك طلع رحمه دا معيشنا في نعيم بقا ربنا ميحكمك علي بلد ما ماج مان


انا بقا اي حاجه بايدي اني اعملها هصلح بيها حال مصر هعملها مقدرش اقول هصلح كل حاجه لان محدش يقدر بس علي الاقل هسدد ديوننا عشان ميبقاش فيه تدخل اجنبي وبدل ما نستورد كل حاجه من برا نصنعها بنفسنا احسن وبدل ما نبيعلهم قطع الغيار وهما يجمعوها منجمعها احنا احسن بدل ما نرجع نشتريها متصنعه تاني ونشغل الشباب الي مش لاقي شغل في المشاريع دي وبكدا مشكلتين اتحلو وطبعا طلما بقا في مصدر رزق يبقا مش هيبقا فيه غلاء اسعار وهقول الحق في وش اي حد يعني بوش مش هقوله انتا رئيس دوله محترمه انا هقوله انتا سفاح بتقود شويه خنازير ويبقا يعمل الي هو عايزه بس مغضبش ربي عشان ارضي كلب زي دا وبدل ما اخصخص حاجات عامه هعمم حاجات خاصه بدل ما ابيع في ملك الشعب لاء بالفلوس اعمم كل حاجه عشان نماء مصر يرجع وفي رائي ان احسن واحد قاد مصر كويس وعرف يبنيها محمد علي ولو رئيس عمل الي هو عمله لمصر وبناها كدا يبقا رئيس ميه ميه

[dr_manoon]

القرار الاول - اعدام طاقم الوزاره كاملا وعلى راسهم نظيف او رابسو مش فاكره الاتنينن بينظفو اوىىىىىىىى
الثانى-حبيبى ابو جمال هاتهولى ودينى لفرمته زى هارد الكمبيوتر
هخترعله دوا يطيره القمر ويجيبه تانى راشق فى الارض زى النخله
هعصره انزل منه جزمممممممممممممم ياجماعه بعد الكلام ده ابقو اسالو عليا ماشى هههههههههههههه
الثالث-تعيين ماجمان مساعد لى ههههه لانه شكله كده هيظبطهم زىى
الرابع بقى انى منساش انى هتحاسب على كل فرد فى البلد دى
لازم على اد مقدر اريح الناس اقلل الاسعار اشجع صناعه بلدى ابنى مصانع اقلل البطاله واشغل الناس انظف المناطق العشوائيه ابنى كبارى احاول امنى بلدنا من الجهه العسكريه واخليها دوله عظمى ياههههههههههههههههههه كتير اوىىىىىىى
يلا بقى سلام

[احمد الصباغ]

الثالث-تعيين ماجمان مساعد لى ههههه لانه شكله كده هيظبطهم زىى

فى هذه الحاله مش هتبقى جمهوريه ولا مملكه دى هتبقى
عزبة الدكتوره منون وعبد المجيد ليمتد
ومحدش هيعرف يكلمهم خالص
ويبقى مبارك احسن ياعم
د اللى ميرضاش بالخل يرضى بمبارك

[MagMan]

فى هذه الحاله مش هتبقى جمهوريه ولا مملكه دى هتبقى

عزبة الدكتوره منون وعبد المجيد ليمتد
ومحدش هيعرف يكلمهم خالص
ويبقى مبارك احسن ياعم

د اللى ميرضاش بالخل يرضى بمبارك

يا باشا دحنا هنخليك كبير الوزراء والاب الروحي لدوله مصر العالميه
وبعدين والله لو مسكها عز الدين حسونه هيكون احسن من اللي فيها
والا انت شايف حاجه غير كده
دا انا هكون رئيس للجمهوريه

[memo911]

القرار الرابع : الغاء زراعه الكوسه في الاراضي المصريه .

انا هنتخبك بس علشان موضوع عدم زراعه الكوسه لانى نفسى فى وبص على التوقيع بتاعى

انا على العموم مش احب اكون رئيس لان سعتها هتشتم وهيدعى عليا كل الشعب
الرئاسه مش لعبه دى مسؤليه كبيره جدا امام الله والا ثانيا امام الشعب
ومحبش اكون سبب فى اتعاس الناس لانى مهما عملت اكيد هيكون فى حرميه
ونصبين و انا زاى كل الناس اكيد هخلط
فاشكرا للرئاسه

ويا رب اصلح حال الشعوب الغلبانه

[cinderella sh]

ايه الكلام الجامد ده يا عم الريس بس كلام خيلى ده احنا بنحلم شكرا على الموضوع

[سندريلا]

بسم الله الرحمن الرحيم
**************

طبعا اكيد كل واحد بيحلم انه يكون رئيس الجمهوريه او اي بلاد تانيه بس بصراحة مينفعش تكون الست رئيسه الجمهوريه