كيف نصنع طاغيه صغير؟؟؟

[Young DeviL]

من كام يوم لقيت أخويا بيقولي إن صاحيه كان بيساله على واحد أخويا يعرفه و متقدم لأخته وأيه رأيه فيه و كدا ... فلما عرفه قاله لا بلااااااش دا كان خاطب صاحبة روزا و بتقول أنه مش كويس .... صاحبتها إلى إسمها فاطمه فاكرها؟؟ قاله آآآآآآآآه دي الي كانت هيا و أختك شرطه مدرسية و إحنا في إبتدائي

و هنا كانت الصاعقة

يا عينيييي هوا احنا مأثرين في العيال كدا لدرجة إنهم لسه فاكرنا من 5 سنينفاتت اننا كنا شرطه مدرسية !!!!!!!!!!!!!! قلته ايه يا احمد هوا تأثيرنا كان قوي كدا !!! قالي دا انتو كنتوا جبارين

ههههههههههه

مع اني مش فاكره اي حاجه عن طفولتي المشرده غير إني كنت نسمة عابرة

هههههههههه

مش عارفه ايه الاشعات المغرضه دي و بعدين احنا كنا بنحقق الأمن و الاستقرار في البلد احمم احم قصدي المدرسة

اعدت افتكر كدا اكتشفت فعلا اني كنت مرعبه عشان فاكره اني في يوم و انا بتابع حالة الأمن في الفسحة لقيت بنت صغيره في سنه أولى شعرها إتشبك في فرع شجرة و هيا بتلعب ... و يا دوب فكتلها شعرها من هنا و البنت راحة جرييييييييي هربانه و قعدت تقولي و هيا في قمة الرعب مش هعمل كدا تاني مش هعمل كدا تاني ... يا بنتي هوا انا كلمتك

بس أكيد هيا فاطمه الي كانت مرعبه و عشان احنا ماشيين سوا كانت العيال بتترعب و فكراني شريرة انا كمان

انا .... دا انا كنت نسمه يا جماحه

بس بجد اكتشفت دلوقتي ايه سر الخوف الي بيتزرع جوانا من اي حد صاحب سلطه بالذات لبتوع الأمن.... انا كنت عيله زي بقيت العيال بس شاطره و المدرسين بيحبوني و مشتركه في كل حاجه , رياضه و رسم و مسابقات و ليا شعبيه فطبعا دي احد المميزات الي تأهلني اني امسك منصب قيادي كبير في الداخليه 00000 يييييه قصدي في امن المدرسه

تصورا كدا عيله زيي زي غيري بس حطيت على راسي كاب احمر و في دراعي شريط احمر (ايوه طبعا رتبه امال ايه ) بقى ليا سلطات جامده و اتحكم في العيال زي مانا عايزه

و تتفتحلي كل الأبواب المغلقه و امشي في الأماكن المحظوره , سلطه بقى يا جماعه و حصانه جامده

يعني كان ممكن ادخل عادي جدا جدا أوضة الألعاب و أخد الكور الي عايزاها أو أمشي في أي دور و الفسحة شغالة و طبعا ليا الحق في تعيين المساعدين بتوعي الي كانوا في بعض الأوقات بيزودوها شويه و يرعبوا الناس .. لكن دي ضريبة المسؤليه هيييييه هنعمل ايه بس

سلطات سلطات يا جماعه

بس عشان بكلمكوا كدا و بسبكوا تقلولي ساره او شيطانه عادي كدا بمنتهى البساطه دا بس تواضع العلماء , انما انا كانت ليا سلطات جامده جدا جدا لدرجة اني مرة و انا في رابعه ابتدائي الميس طلبت مني اني اقف على العيال ( و اكيد طبعا مش هقف فوقيهم افطسهم... لا يعني اراقبهم لحد ماترجع) بس فلكم بقى ان تتصورا لما اكون رائدة الفصل من اربع سنين بنتخابات حرة مستقله نزيهه و في نفس الوقت شرطه مدرسيه ايه الي ممكن يحصل يا جماعه

انا راضيه حكمكم

و انا واقفه بقى بعد ما اسنفذت كل طاقتي في الصبر و المحياله و يا جماعه مايصحش و ارجوكوا و الي هيتكلم هكتب اسمه على السبوره لما الميس تيجي هتشوفها .... و الميس مابتجيش

طب يا جماعه الي هيتكلم هيقبى حمار و هنضحك عليه... فيسكتوا طبعا عشان كرامتهم لكن برده بعد شويه الحمار يروح متكلم و بعدها الفصل كله معاه ..طب خلاص الي مابيحبش ربنا يتكلم راح جاي واحد خارج عن القانون و الدين طبعا و راح متكلم .. وهنا كنت جبت آخر موارد الصبر و العقل و الحكمه عندي ...يالك من صنديد رعديد زنديق ... رحت قايله له مش قلت ماحدش يتكلم ... و طاااااااااااااااااااااااا خ ................. ايوه هوا كدا بالظبط زي ماتخيلتوا

ههههههههههههه

حتة قلم محترم ( بجد شريرة و مكسوفه من نفسي) على وشه يا عيني اسكت الفصل كله و محدش حط منطق كان يا عيني اسمه سيد راسه مربعه كدا و شعره اورانج اورانج وكان أبييض و عنده نمش , و يا عيني اكتفى بالعياط لانه قال و الله لاقول للميس لما تيجي و لكن بما انه ماكنش شاطرو الي مش شاطرين يقعوا في أسفل المثلث الغذائي للسلطات و القدره على أخد الحقوق ... فانا بسطله بصه طرحته ارضا بعد ان كانت قد رفعته جوا و قلتله و ريني كدا هتقول للميس ازاي ؟؟؟؟؟هو انا مش قلت ممنوع الكلام ؟؟؟ هاااااا؟؟ انت كدا غلطت و لا مغلطتش , قال غلطت

قلت يبقى خلااااااااااااااص

و جت الميس و ماقلاهاش حاجه

شخصيه برده يا جماعه

بعدها بكام يوم تكررت نفس الواقعه بس المره دي لواحد اسمه احمد سمير و كان شاطر شويه فراح قال للميس قالته ايوا انت غلطان و راحت جابه قايلاي لوحدي ماعتمليش كدا تاني

بس و عدى المضوع

( بس لما ماما عرفت ساعتها زعلت مني و فهمتني ان كدا طبعا غلط ) ماما دي غريبه

كله عشان الحفاظ على الأمن القومي بس

ههههههههههههههههه

بس ماتفتكروش إني فضلت كدا على طول عشان في آخر سنه في إبتدائي إتغيروا المدرسين وجالنا اتنين مدرسين رجاله و لما جنا نعمل إنتخبات المدرس صمم إن رائد الفصل لازم لازم يبقى و لد و الأمين المساعد بنت فطعبا مابقتش رائده بنتخبات غير نزيه فاجتلي صدمه نفسيه عشان التفرقه العنصرية دي و إعتذلت العمل السياسي بعد كدا عشان اتيح فرصه للجيل الجديد

---------------------

بجد مش مستوعبه الي كنت بعمله دا و كنت فاكره بجد اني كدا بعمل حاجه كويسه

و فعلا مش مصدقه ازاي يخلوا اطفال يتحكموا في اطفال و يدوهم سلطه يتحكموا في غيرهم و الأطفال بطبعها شريرة

و ازاي يبقى حد زيي زيك مايفرقش حاجه غير اني اديته سلطه و امكانايات انه يتحكم في حد زيه بالظبط

------------------------------------

و في الأخر بليز يا سيد و يا احمد سمير بجد سورررررررري سامحوني كنت شريرة- بس كله عشان الأمن...و أنا مـتاكده انكوا مقدرين

[السياسي الصغير]

وضح انك كنتي يعني بسكوية وانتي صغيره كنتي تحطي على الجرح يبق كده على طول.
ده وانتي كبيره بعتي اهلك وتبرتي منهم عشان بنص جني شكولاته تقولى كنتي نسمه .
كده عرفت الموضوع كان ليه جزور من الطفوله.

ده انا كنت قائد عام فريق الشرطه وفريق الكشافه وعمل فريق كشافه واخد بيه اول محافظه وصعد جمهريه وانا في وأول ثانوي كانت مدرسة جديده وانا الى عامل الفريق وانا الى مضربه وكنا حنصعد لبطولة العرب وكنت مزور اثنين اصحابي على انهم معايه في المرسه وهم في مدرسه تاني ومكنتش بعمل نص الى انتي كنتي بتعمليه .
ناس ليه نصيب في الدنيا

[Young DeviL]

وضح انك كنتي يعني بسكوية وانتي صغيره كنتي تحطي على الجرح يبق كده على طول.

ده وانتي كبيره بعتي اهلك وتبرتي منهم عشان بنص جني شكولاته تقولى كنتي نسمه .
كده عرفت الموضوع كان ليه جزور من الطفوله.

ده انا كنت قائد عام فريق الشرطه وفريق الكشافه وعمل فريق كشافه واخد بيه اول محافظه وصعد جمهريه وانا في وأول ثانوي كانت مدرسة جديده وانا الى عامل الفريق وانا الى مضربه وكنا حنصعد لبطولة العرب وكنت مزور اثنين اصحابي على انهم معايه في المرسه وهم في مدرسه تاني ومكنتش بعمل نص الى انتي كنتي بتعمليه .

ناس ليه نصيب في الدنيا

لا والله دانا كنت رقيقه خالص

دا السنه الي فاتت كنت رئيسه اتحاد الطلبه واتخيل بقا كنت بعمل ايه في العيال

تسلم ويسلم مرورك يا جميل

[السياسي الصغير]

واضح جدا ان حضرتك رقيقه جدا استاذه ساره بتكلى رقاق كتير حضرتك .
تضرب الود بكعب الجزمه وحنا نقول ليه الشباب خيفين ومش ردين يتكلم ويقف قدام السلطة ويعمل مظهرات.
ويطلع السبب في الاخر جعب الجزمه ويطلع مبارك وامن الدوله وكلاب العادلى مظلمين.
ادخلى على موضوع في عيد ملادك الكلام وسبعين وقوليلى رايك

[Young DeviL]

ههههههههههههههههههههههههه ههههه دخلت تسلم ايدك بس بجد كنت رقيقه ومن الواضح ان مبارك هيقول زيك انا السبب في الي الشباب فيه مهو ما بيصدق يلاقي حد يقول انه هو الي بوظ البلد

[السياسي الصغير]

نرجوا من المسؤلين ومن يريد الحفاظ على هذه البلد .
اعتقال السبب الرئيس فيما وصل اليه الشباب في هذه الايام .
على ايد الكثير من البنات برياسة الشيطانه (ساره ) .

ونقدم هذه القصيده تعبير على ما يحدث (مش عوز حد يزعل)

على شط النيل ماشية الجواميس بتقول ياجميل انا عايزة عريس
يطلع فيس ويحل الكيس تتغدي حشيش ونحلى دريس


هاتغذي حشيش واتعشي حشيش واقفل على نفسي الباب والشيش
لو غيط فدان لأمايكفيش فدان ده يادوب أول سرفيس

والبقر تقول انا عايزة التور مايكونش مهندس ولا دكتور
ويجر الساقية فور باى فور ويجيب بيتي فور اربع وخميس

والمعزه تقول انا طالبة خروف مالهوش أخوات ولا عنده ظروف
كسيب وامسكلة انا المصروف وكون حيوان جنتل وحسيس

والفرخ اشترطت آل عالديك انها ما تحبش اى شريك
وقالتله اتحضر خليك شيك وديني ارقد ع البيض في باريس

اولا مش انا الى مؤلفها واحد زميلى بس انا مزود عليها حجات .
ثانيا مش اقصد بيها اى حد ده مجرد هزار مع اجمل اخوت في المنتدي.

[طيف عابر]

واضح انك كنتى شقيه طيب مههو عادى اسمك شيطانة يعنى معروف عندك الشقاوة

بس بصراحة رد سياسي روعه عنجد وما ترك لنا مجال للرد

شكرا سارة موضوعك جميل وطريف بنفس الوقت

[ملكة الاحزان]

اشهدلك ياسارة انك كنتى ملاك وانتى صغنونة وانك كنتى غلبانه قوى
وكل ده كان على يدى
واكيد انى عارفه انتى طنتى الدنيا ازاى ولا تحبى افكرك
بجد موضوع جميل ياشيطانه
معلش ياجماعه اصل انا وساره معرفه عمر بحاله انا عارفاها اكتر منكو ديه كانت غلبانه قـــــــــــــــــــــوى

[السياسي الصغير]

واضح اوي استاذه ساره احمد .
واسف جدا بس اكيد ظني في محله ان حضرتك من الناس الى الشيطانه كانت بتعامل معاهم بالصندر وهم صغيرين وعشان كده بتقولى الكلام ده.
ولكن بعد مرور الزمان يجب ان تخذين بالتار .
والله والله والله لو بداتي انتي حتلقي الكثير وكثير وكثير وكثير بالكثير ورائك.

[ملكة الاحزان]

واضح اوي استاذه ساره احمد .

واسف جدا بس اكيد ظني في محله ان حضرتك من الناس الى الشيطانه كانت بتعامل معاهم بالصندر وهم صغيرين وعشان كده بتقولى الكلام ده.
ولكن بعد مرور الزمان يجب ان تخذين بالتار .

والله والله والله لو بداتي انتي حتلقي الكثير وكثير وكثير وكثير بالكثير ورائك.

كل الموضوع ان ساره جارتنا وما اجراك ساره كانت بتعمل ايه وهيه صغنونة ولحد دلوقتى بتخلينى عايزة اسيب البيت وامشى ديه هى ساره وهى فعلا شيطانه