بعد 125 الف سنة مش حيبقى فيه رجالة !!!!!!

**الاميرة سومة** · 9 - 6 - 2009, 07:34 PM

خلاص "لا رجال بعد اليوم" بهذه الحكمة خرجت علينا د. برايان استاذ علم الوراثة بجامعة أكسفورد في كتابها "لعنة آدم" حيث قامت بعمل دراسة مستفيضة على الكروموزوم "y" المسئول عن الجنس الذكري واكتشفت أنه يتعرض للتآكل - على أساس أن كل ذكر مننا مربي جواه فار- ومهدد بالانقراض بناء عليه يا سادة يا رجال توقعت هذه السيدة فناء كل الرجال من العالم بعد مرور -شبرا- قصدي 125 ألف سنة .

يعني ايه يا جدعان ؟ يعني ايه يا ست انتي ؟ ! يعني الرجالة بعد كده هيبقوا ايه بح ؟ مفيش ؟ أيون طبقا لكلام الست برايان كمان 125 ألف سنة ان شاء الله مش هيبقى فيه رجالة وبالطبع نحن لسنا بصدد مناقشة الكرومزوم ولا الطروم والترسانة ، نحن بصدد الكارثة الكبرى أنه مش هيبقى فيه رجالة ، طب تقولي مش هيبقى فيه بطاطس ، طماطم، ثانوية عامة حتى .. إنما رجالة ، طيب ماشي لو احنا قفزنا قفزة لقدام 125 ألف سنة يا ترى حال الدنيا من غير رجالة هيبقى ايه ؟
أولا نظرية ما يجيبهاإلا رجالها حتكون خلاص بح مش موجودة لأنهم يا ولداه مش هيكونوا مشرفين في الدنيا ، وإن كانت العبارة دي أصلا انتهت من حياتهم من زمان .

ثانيا : كل بنت بعد كده هتقدر تمشي في الشارع باحتها وابقى قابلني لو لقيت واحدة رجعت البيت متأخرة وبيسألوها انت ليه اتأخرتي ؟ طبعا مش هتقول أصل كان فيه واحد غلس بيعاكسني "منين يا ضنايا ييجي اللي بيعاكسك ده" ربنا افتكر الرجالة كلهم وبالطبع مش هيكون فيه محاضر تحرش ولا معاكسات .

ثالثا : كل البنات حتبقى عوانس رسمي ..وبالطبع لن تحتاج اي بنت لأن تقف أمام المرايا ساعات طويلة لان ببساطة اللي كانوا بيقفوا قدام المرايا علشانهم راحوا يا قلبي في خبر كان وأخواتها وبنت خالتها .

رابعا : أي لقب يحمل كلمة "رجالي" مش هيبقى موجود يعني مش هيبقى فيه ترزي رجالي ولا كوافير رجالي أو حتى تواليت رجالي ، أكشاك العيش مش هيبقى فيها باب حريمي وباب رجالي كله هيبقى حريمي ، ولا المترو يا سادة ويا سيدي عليه هيبقى كله حريما بعدما كان ليهم عربية واحدة ، بس خلاص عيشوا بقى ما هو هيبقى بتاعكم لوحدكم .

خامسا سيتم إلغاء كل جمعيات ومنظمات حقوق المرأة يعني مش هيبقى فيه حاجة اسمها حقوق -ولا صيدلة- مرأة ما هما كانوا موجودين عشان يقولوا الرجالة منغصة علينا عيشتنا أهم خفيم لوحدهم .. ابقوا في اجتماعتكم بقى عيطوا وقولوا الله يرحمهم كانوا وحشين بس مش قوي .

سادسا : نهاية قانون الخلع .. تقدروا بقى تخلعوا مسامير .. ابواب .. شبابيك إنما رجالة يا حسرة بح !

سابعا فرصة أن تتولى حكم البلاد سيدة في حادثة لم تحدث من أيام كليوباترا والحمد لله انها مش هتخلف .. طبعا إذا ده حصل هتبقى الحياة لا تطاق ولا هيبقى لونها بمبي ولا فسدقي لا هيبقى لونها اسود غطيس يعني عاوز أقول ان الحياة لازم تكون فيها النصين الحلو والوحش ، الناعم والخشن -وطبعا مش باتكلم عن الكحك- لا قصدي على الرجالة وربنا ما يحرمكم مننا .

هههههههههههه تخيلو كده بجد الدنيا من غير رجاله هتبقى عامله ازاااااااااااى