أناقتك في البيت

**شيري العسولة** · 9 - 6 - 2009, 09:17 PM

بصراحة ومن غير مقدمات طويلة انا حبيت اجبلكم شوية معلومات خفيفة كده
عن اختيارك لهدوم البيت
تعالوا نشوف مع بعض

قبل ما تشتري هدوم البيت خدي بالك

قبل ما نتكلم عن الموضة عايزاكي تاخدي بالك من شوية الحاجات البسيطة دي وهي...

1. إنك وأنت بتختاري هدوم البيت إنك تجيبيها واسعة شوية وده لسببين: السبب الأول إن بعض الأقمشة لما بتتغسل النسيج بتاعها بيكشّ وبتلاقيها بقت صغيرة.. السبب التاني إن هدوم البيت لما بتكون واسعة بتخليكي تتحركي براحتك في البيت.

2. حاولي إنك تنوّعي في نوعية الملابس اللي بتشتريها للبيت، وده علشان ما تحسيش بالملل بسرعة خصوصا لو كنتِ من الناس اللي بتقعد في البيت لفترات طويلة.. يعني من الآخر كده: لازم تكون هدومك متنوعة بين "جلابية" و"بيجامة" و"ترنج".

3. بلاش تلبسي ألوان غامقة وإنت قاعدة في البيت وحاولي على قدّ ما تقدري إن معظم هدومك في البيت تكون ألوانها فاتحة؛ وده لأن الألوان الغامقة بتدي إحساس بالكآبة على عكس الألوان الفاتحة اللي بتدّي إحساس بالمرح والحيوية داخل المنزل.

4. لو كنتِ من الناس اللي جلدها حساس وعندها حساسية من الأقمشة الصوف أو القطيفة يبقى ممكن تلبسي ملابس قطنية خفيفة تحت ملابسك اللي هتلبسيها وأهو منها تدفيكي وفي نفس الوقت تكون بمثابة عازل بين جلدك وهدومك وتقدري تلبسي اللي إنت عايزاه من غير ما تتضايقي.

اتكلمنا كتير صح؟!

ماتخافيش دلوقتي حالا هنتعرف على الموضة

• بالنسبة للخامات:

هتلاقي إن "الصوف" و"القطيفة" و"الكستور" و"الموهير" من أكتر الخامات اللي ممكن تديكي إحساس بالدفء في الشتاء.

• بالنسبة للتصميمات والأشكال:

فيه تصميمات وأشكال كتير قوي فهتلاقي:

الجلابية الكروهات والبيجامة الكروهات هما الموضة في شتاء 2009

كمان الجلابية القطيفة السادة بألوانها المتعددة موضة

الترينجات القطيفة متربعة على عرش الموضة في كل شتاء

والبيجامة اللي فيها رسومات بسيطة هي كمان موضة

لو كانت الدنيا برد قوي يبقى لازم يكون عندك:

روب طويل قطيفة أو روب قماش علشان تلبسيه على الترنج أو البيجامة أو الجلابية وإنت قاعدة في البيت

شال صوف تحطيه على كتفك وإنت قاعدة بتتفرجي على التليفزيون في الشتاء

لو عايزة تدلعي نفسك

لو كنت عايزة تدلعي نفسك في الشتاء وفي نفس الوقت تدفي نفسك يبقى لازم يكون عندك شباشب شتوية زي دي تلبسيها وإنت قاعدة في البيت... وعلى فكرة الشباشب دي سهلة التنظيف كل اللي عليكي إنك تغسليها في مية مضاف إليها أي مسحوق غسيل وهي هتنظف وهتبقى زي الفل.

**botta** · 10 - 6 - 2009, 12:45 AM

تسلم يا معلم على النصائح الغالية دى

و فى انتظار الجديد علطول

شكرا شيرى

**ام اسراء** · 10 - 6 - 2009, 02:34 AM

ياشيرى الشتاء خلص
فين الصيفى

يله ينفع الشتاء الجاى
تسلمى ياجميله

**شيري العسولة** · 10 - 6 - 2009, 11:56 AM

المشاركة الأصلية كتبت بواسطة botta

تسلم يا معلم على النصائح الغالية دى

و فى انتظار الجديد علطول

شكرا شيرى

ههههههههههههههه
حلوة معلم دى

تسلمى ياقمراية لمرورك الغالى والله

**شيري العسولة** · 10 - 6 - 2009, 11:57 AM

المشاركة الأصلية كتبت بواسطة ام اسراء

ياشيرى الشتاء خلص

فين الصيفى

يله ينفع الشتاء الجاى

تسلمى ياجميله

ههههههههه
حاضر ياقمر هاجيب الصيفى انتظرية
وتسلم لمرورك الجميل

**gogo** · 10 - 6 - 2009, 12:44 PM

تسلم ايديك مشكور بس الحاجات دى معروفة

**شيري العسولة** · 10 - 6 - 2009, 12:58 PM

طيب المرة الجاية هاجيب حاجة مش معروفة
وماتنسيش ان فى ناس مش عارفين كل حاجة

**elmagicer** · 10 - 6 - 2009, 01:21 PM

شكرا على التوبيك الجنان دة

**شيري العسولة** · 10 - 6 - 2009, 01:41 PM

ميرسي ليك
ويارب تفضل منورنى على طول

**hadji23000** · 14 - 6 - 2009, 12:53 PM

يسلمو علي المجهود

تحياتي لكم

اخوكم حجي

الموضوع: أناقتك في البيت

أدوات الموضوع