طعموا ولادكوا .. و ريحوا بالكوا ...

**botta** · 15 - 6 - 2009, 01:40 AM

طبعا كتير منكم فاكر الجملة دى
دى كانت علطول فى نهاية الاعلانات بتاعة حملات التطعيم اللى وزارة الصحة كانت بتعملها ضد شلل الأطفال ( وقانا الله شر الأمراض )

بس عارفين : أنا افتكرت الجملة دى النهاردة ، و فكرت فيها من وجهة نظر تانية خالص

طبعا كلنا مهتمين بتطعيم أولادنا عشان نحصنهم ضد الأمراض .. مش كده ؟؟

لكن مين فينا مهتم بتطعيم أولاده ضد أمراض الزمن ده ؟؟ اللى هى : الكره ـــ الحقد ـــ الغيرة من بعض ـــ الكذب ـــ البعد عن ربنا فى أوقات كتير ـــ و غيرها أمراض مش عضوية بس معدية و العدوى بتنتشر بسرعة الصاروخ ( ولا صاروخ ايه بقى .. ده بقى فى حاجات أسرع منه )

الاعلان ده كان فى الثمانينات كنت لسه فى ابتدائى و عادى و بيمر ، لكن دلوقتى فى 2009 ما ينفعش حاجة تمر كده لأننا ما بقيناش صغيرين
لازم نطعم ولادنا ..

و اللى لسه مش متجوزين طعموا نفسكوا
عشان يوم ما ابنك يعمل حاجة تقول له بقلب جامد أنا لما كنت أدك ما كنتش بعمل غلط و كنت محصن نفسى من انى أتعدى

مش تحط وشك فى الأرض و تقول : له حق مانا كنت بعمل أنيل منه
هااا فاهمنى طبعا .. طيب أستنى ردودكم و آراءكم ؟؟؟

**ام اسراء** · 15 - 6 - 2009, 01:50 AM

ياسلام على مواضيع الجميلة اللى بتفتح باب المناقشة والحوار الهادف
ربنا يهدى شباب اليومين دول هو ف طبعا نسبه كبيرة ماشاء الله
ربنا يحميهم بس فى غيرهم بيحملوا كل الأمراض اللى عرضتيها
وفعلا لو فكر شويه حيقول لابنه أه لو عمل كده بالتأكيد حيتغير
ربنا يهديهم