نـــاس ونــــاس ..!!

**انتهينا** · 20 - 6 - 2009, 06:52 PM

بسم الله الرحمن الرحيم

بدون مقدمات ....نخش في الموضوع علطول

-------------
بيكتب كلام رائع.....شخص تحترمه حقيقي لما تقراله

تتحاور معاه تكتشف كم العقلانية اللي هو فيها و اد ايه روعة و جمال اخلاقه

و تحس ان الدنيا فعلا لسه بخير...و شوية و هتسمع موسيقي المال و البنون في ودانك

طيب يا تري انت فعلا زي ما بتكتب و بتقول ؟

يا تري انت هو انت و لا انت مش انت ؟!!!

اقولك.....اسوأ شيء تعمله مع نفسك...هو انك تكذب عليها

---------------
دمه خفيف و شخصية لزيزة الصراحه

ما يقولشي كلمة و لا حرف الا لما تموت علي روحك من الضحك

ده حتي لو كتب نقطة بس...الناس هتسخسخ علي روحها من الضحك

و تلاقي اللي بيتغزل في جمال و حلاوة النقطة اللي اتكتبت كمان !!!

طيب يا تري يا فلان ...مع خفة الدم دي وراها قلب ابيض بجد و صافي و لا اللي في القلب في القلب بقي ؟
يا تري بتهرب من واقعك و لا انت شخصيتك كده فعلا ؟!!
يا تري مع خفة الدم دي فيه خوف من الله و لا انت بقيت مش فارقه معاك و الضحك بقي دينك ؟!!!

اقولك....تستطيع ان تخدع الناس بعض الوقت و لكن ليس كل الوقت

-------------
البنت الشقية اللي زي النسمة
اي حد يتمني يكلمها و كتير يحلمو بس تكتب حرف من حروف اساميهم ولو ضمن اسامي ناس تانية

الكل بيستني وجودها ..
الكل بيتلف حواليها و ينتظروها ...و ان غابت افتقدوها

كلمة واحده اقولهالك.....انتي فعلا سعيدة زي ما بيظهر اودام الناس ؟
هل بجد القلب ده ابيض و لا بتتظاهري بيه ؟

اقولك.....ما اسر عبد سريرة الا البسها الله اياها ..ان شرا فشر و ان خيرا فخير

----------
هو بيقول ...المتدينين دول عالم معقدة

ايه التخلف ده؟...جلابيه و طاقية و لحية ؟....اتحضروا بقي يا جماعه مش كده
و ايه بقي الخيبة اللي طالعين فيها الستات دي...خيمة سودة و ماشية في الشارع و الواحد مش عارف يشوف منها حاجة قصدي ....كاتمة علي نفسها بالخيمة دي ليه بس ؟
يا ناس ...الدين يسر و بلاش تشدد اومال

طيب انت ايه حالك مع الله؟
يا تري عارف اركان دينك ؟...طيب بتعرف تصلي يا عم المتحضر ؟

اقولك...... (( واتقوا يوما ترجعون فيه إلى الله ))

----------------
هي بتقول ... يا جماعه الدين وسطية و بلاش تشدد اومال
دا انا عارفه ناس ما يعرفوش غير طريق البيت و الجامع بس
لاء و النقاب اللي طالعين فيه ده.....و كمان يقولولك ال ايه الصحوبية مع الولاد حرام و بتاع
ناقص يقولولنا الحب حرام كمان
و التلفزيون حرام و الاغاني حررام و الاختلاط حرام....اومال ايه اللي حلال طيب بقي ؟

كلمة في سرك ..... اللي اختشوا ماتو
و الحق واضح...بس احنا اللي بنستصعبه علي نفسنا و بندور علي حجج و مبررات علشان ما نفقدشي كتير من المميزات و المكانة و كمان الوسط اللي عايشين فيه

و باقول....من ترك شيئا لله عوضه الله خيرا منه

-------------
دايما بينتقد /تنتقد الاحوال و الدنيا و العيشه و اللي عايشينها
كله وحش و كله غلط...و شوية و هيقلبوا مصلحين اجتماعيين و مش بعيد يمسكوا العصاية للناس

و مواضيع و حوارات كتيره حوالينا ازاي نصحح و نعدل الوضع المايل ده

طيب سؤال....يا تري بدأت بنفسك ؟
كلمة اقولها.....احمق الناس من يعظ الاخرين و ينسي نفسه

---------------------
و في النهاية ........خليك صريح مع ...الله...ثم نفسك..ثم الناس

..

**طلة القمر** · 21 - 6 - 2009, 10:31 AM

تحية لك
موضوع مفيد لانه صريح ومبسط
بارك الله فيك
فى انتظار المزيد

**انتهينا** · 11 - 9 - 2010, 06:23 PM

تحية لك
موضوع مفيد لانه صريح ومبسط
بارك الله فيك
فى انتظار المزيد

ربنا يكرمك

اسعدني مرورك جدا

وكل سنه وانتي طيبه

**البنت الجديده 1** · 11 - 9 - 2010, 06:52 PM

كم هو جميل ان ينظر المرء الي عيوبه
فيحاول اصلاحها ولا ينظر الي الناس
فالله تعالي عليم ومطلع علي ما في القلوب والصدور
ومجازي كل شخص علي فعله ونيته
............
بارك الله لك اخي الفاضل
لاحرمك الله الاجر
دمت بود
اليك كامل احترامي وتقديري

**انتهينا** · 14 - 9 - 2010, 01:28 PM

ربنا يكرمك يا رب

اسعدني مرورك جدا الصراحه

لكِ كامل احترامي

**هشام اللول1** · 14 - 9 - 2010, 02:23 PM

و في النهاية ........خليك صريح مع ...الله...ثم نفسك..ثم الناس

موضوع جميل فعلا يا احمد
لابد دائما ان نقف امام مرأه انفسنا
ونسال الله ان يجعل انفسنا راضيه مرضيه ومطمئنه

بارك الله فيك وحفظك ورعاك احمد