ندالة اهلها

**dody samoul** · 26 - 6 - 2009, 11:24 PM

ميت ألف فرصه عشان أسيب مصر

ولا عمري سبتها

علشان هى بلادي اللي بجد بحبها

بحبها بكدبها وصدقها

بحب فيها أصالة وندالة أهلها

بحب فيها السهر بحب

زيفها وأصلها

بحب فيها طلعة الشمس

تنور وشها

بحب فيها القمر طالع

يغازل حسنها

بحب فيها المشي علي شط

نيلها وبحرها

بحب فيها بناتها

راسمين ملامح شعبها

دي بنت مايصه وحاطه

ورده فـ شعرها

ودي بنت جد ونازله

جري لشغلها

هتلاقي فين تاني بلد

كل حاجه فيها

تخليك تحبها

هتقولي ظالمه هقولك

برضو بحبها

هتقولي ضالمه

مهو ده سواد شعرها

هتقولي زحمه هقولك

علشان بنعشق أرضها

هتقولي فيها فساد

هقولك ده من طيبة شعبها

جرب كده تسهر ولو وحدك

علي ضف نيلها وحبها

جرب تشوف بنت حلوه

مع شاب واقف جمبها

بيحبها شايل في قلبه

هموم الدنيا كلها

وبرضو بيحبها

جرب كده تاكل دره وترمس

علي شطها

وتشوف وشوش الناس

واضحك زيها

طب وانت ماشي لوحدك

ووقعت في مشكله

مش بتلاقي ألف واحد

جمبك بيحلها

لا تعرفهم ولا يعرفوك

بس جمعكم حبها

أهي هي دي مصر

زاحمه ظالمه

فاسده ضالمه مش مهم

ده كفايه خفت دمها

هافضل لمصر أقول وأعيد

أنا أصلي عاشق أرضها

وطبعا ده كله كلام في الهوا

أنا لو تجيني نص فرصة هقول لها

بالسلامه يا مصر

ومش عايز أشوف وشها

وهي دي بقى ندالة أهلها

**DREAM** · 27 - 6 - 2009, 01:11 AM

انا صراحه كلامك جميل ومشيت معاه بس فجأه لقيته اتشقلب في الهوا زي الاغنيه بتاع متحت صالح وأهي ضربت شالباظ يعني انت اتكلمت عليها انا ارجح انت بتعمل زينا يعني وبتصبر نفسك علي اللي فيها المهم جيله جدا خالص تحياتي

**dody samoul** · 27 - 6 - 2009, 09:49 PM

ميرسي جدا على كلامك بس على فكرة الموضوع منقول
وانا جبته عشان الحتة اللى فى الاخر بتاعة الندالة اصل هو ده الواقع
وميرسي على ردك

**ريماس** · 27 - 6 - 2009, 11:11 PM

ميرسي دودي علي موضوعك
وتقبل مروري

**dody samoul** · 27 - 6 - 2009, 11:38 PM

طبعا لازم يبقي مرورك على راسي
وردك يكون احلى رد عندى وميرسي لمرورك يا قمر

**jewel_lowis** · 28 - 6 - 2009, 11:38 AM

مرسى ليك على الموضوع
بس ياريت اى منقول يكون فى باب اشعار وخواطر
شكرا لك
تم النقل

**dody samoul** · 28 - 6 - 2009, 11:47 AM

سورى انا مكنتش اعرف
وميرسي على ردك

**بسبوووسه** · 1 - 7 - 2009, 06:05 PM

قليل عليك كلمة جامد ولاونه منقول بس بردو حلو اوى

وانا عماله اقرأ اقرأ اقرأ واقول في نفسي
مش معقول ده موضوع لدودى ابداااااااااااااا
واكمل قراءة وانا مش مصدقه
وفي الاخر لاقيت اللى يثبت انك دودى
ههههههههههههههه

بس من رأيي ان كل واحد ميستناش مصر هتديله ايه ولا حاجه
لو انا شايفه وضع مش عاجبنى احاول اصلح اللى انا اقدر عليه عشان حاجتين
ان ربنا هيسألنى بعد كده ايه اللى انا عملته مفيد للناس وان مينفعش اشوف حاجه غلط ومصلحاش لو قادره لانه هيسألنى عليها بردو
وعشان تكون ضميرك مستريح عشان لو حتى فكرت تسيب مصر تكون سايبها وانت عملت اللى عليك

وعموما مصر او حتى اسرائيل كلها ارض الله وبنعمر فيها زى ماأمرنا سبحانه وتعالى(ومتنسوش ان ده دورنا من الاصل )

وعموما انا قاعده ومش منقوله من مصر
تقول ايه بقي ....اصلى بموووووووت فيها

وكالعاده طبعا
ج
ا
م
د
يادودى