لو حصلك الموقف ده احتمال تروح فيها

[dody samoul]

بصوا بقي فكرة الموضوع قايمة على التواصل بين الاعضاء يعنى كل واحد يدخل يرد يكتب موقف مضحك حصله عشان نضحك كلنا
وانا هبدا
كنت انا قاعد مع ابن عمتى واصحابه فى شقة كلها شباب بس كان فيها واحد غتت اوى ربنا مايوريكوا خنقة منكد علينا كلنا
كنا حوالى 5 شباب بس مكنش حد طايقه خالص
كلمت ابن عمتى قولتله الكلام ده مينفعش انا مش هستحمل كده قالى طب اصبر على بالليل
المهم جينا بالليل وبالترتيب مع الشباب فهموا الاخ ده ان محمد ابن عمتى بقول ان عليه عفريت وان محمد بيفهم فى موضوع الجن ده وكده المهم اخينا ده كان بيتوهم بسرعة وده اللى ساعدنا
المهم محمد راحله قاله انت عليك عفريتة وهعرفلك اسمها دلوقت وقمت انا نزلت سكينة الكهربا والنور قطع قام الاخ ده اترعب وراح محمد على المطبخ وعمل ميه بسكر وكتب كلمة بالميه على ايده
ورجع محمد للاخ ده قاله هات ورقة وقام مولع فى الورق بحيث انها بقت سودة خالص وقام فركها على ايده فلزقت طبعا على الكلمة المكتوبة بالمية بسكر وكانت الكلمة شاغية
وقاله هى دى العفريته اللى عليك وهنحضرها دلوقت عشان نعرف عايزة منك ايه وقام محمد يتكلم بكلام مش مفهوم وقام واحد من الجماعة دخل لابس ماسك مخيف ولابس ملاية سرير ودخل ومحمد قام عمل فيه مغمى عليه والاخ سبناه مع الشخص اللى عامل فيها عفريت
والواد قعد يصرخ ويقول لا اله الا الله وينادى يا احمد يامحمد الحقونى وقام مغمى عليه بس بجد
بعد مافوقناه وعرف انه كان مقلب قام يضرب فينا بس بعد كده بقي بيقولى يااحمد بيه
الادب حلو برضه
معلش طولت عليكم ارجو للى يدخل يكتب موقف كوميدى عشان نضحك شوية

[gogo]

ههههههههههههههههههههه جامدة بس حرام كدة كان ممكن يموت فيها
انا مرة انا وصحبتى واخوها الصغير كنا قاعدين لو حدنا وفجاة بنبص من البلكونة لقينا تحت فى الشارع عربية بوكس
وبعدين بنبص على السلم لقينا ناس طالعة جرى على السلم احنا اترعنا وانا استخبيت تحت السرير وصحبتى استخبت ورا الباب وعمر الصغير فضل يقول متخافوش انا هضربهم ولقينا خبط جامد على الباب فتحنا لقينا واحد بيقول لنا فين صبحى قلنالة صبحى مييييييييييييييين وفضلنا نألف قصص ونقفل فى وشهم الباب ويخبطو تانى وينزلو ويطلعو تانى واحنا مرعوبين مرة نقولة بابا موظف ومرة مدرس ومرة احنا مش من هنا جنناهم ورشينا عليهم مية

[dody samoul]

ميرسي على مرورك يا gogo
انا حصلي موقف مع الشرطة انما ايه مسخرة بصي ياستى
كنت انا وجماعة اصحابي واقفين على الطريق ولابسين لبس ضباط المهم عاملين لجنة وكلماعربية تعدى تدفع خمسين جنيه عشان تعدى
المهم واحد معانا رايح لعربية من التلاتة اللى واقفين ورا بعض فقام واخد معاه نوته وراح لاول عربية عداها ودفعت التانية واحد فيها شافه قاله فى ضابط بيلبس شبشب واحنا انفجرنا من الضحك قاله اصلي بيتنا قريب المهم لقى العربية التالتة شرطة
قال كبسة يا جماعة اجرى ياجدع وحنا خدنا السكة ازح
بس ربنا ستر ومعملنهاش تانى بس الواحد كان مرعوب
كانت ايام الشقاوة بقي ربنا عداها على خير
عموما ميرسي لكى كتير

[نيمو]

مرة حصلى موقف بجد انا وانا فى الموقف كنت مضايقة اوى بس اول ما روحت فضلت اضحك ضحك فظيع كنت ماشية بليل كانت حوالى 8.5 او 9 كده وكان فى ولد بيعاكسنى بس مش بيعاكس وخلاص لا فضل ماشى ورايا وعمال ايه بقى كلام شعر ومش عارف ايه ويمشى جنبى شوية وايه انا اتخنقت منه وعمال يقول نكت واشتغالات وحاجات فظيعة فانا اتخنقت منه اعمل ايه قلت امشى و واروح واجى يمكن يتوه وفضلت ماشية واخش فى شوارع واطلع من شوارع وايه وهو ماشى ورايا راغى فظيع صدعنى وفجاة وقفت ببص حواليا لقيت نفسى توهت وبقى منظرى زبالة جدا وقمت بصاله وقلتله اتنيل امشى قدامى وطلعنى على الشارع الرئيسى الواد بصلى كده واستغرب وقلى طيب نتعرف قلتله امشى عشان مزعلكش وطلع جدع ووصلنى كان ماشى قدامى وانا كنت هموت من الضحك كنت عايزة اتوه تهت انا بس اول لام وصلت قلتله متتوقعش انى هشكرك لا انت صدعتنى ومفيش سلام ومشيت جرى ههههههههههه تسلم على التبويك الجامد

[هبه اتش]

بصراحه مواضيع جامده نار انا كمان حصلحي موقف محرج اوى كنت ماشيه في الشارع في مصر وكنت راسمه نفسي على الشباب اني مش بكلم ناس بيئه وانى هاكون مهندسه المهم واحد كان عايز يكلمني وفضل يبعتلي بنات صحابي ويتحايل عليا فانا تقلت عليه وجاب رقمي وكلمنى وانا زعقتله وفغلت في وشه المهم تانى يوم ماشيه فى الشارع جت ام العيل ده وكلمتنى المشكله ان كان معايا واحد صديقي اوى المهم الست قالنلى بصوت عالى منك لله ياشيخه جننتى الواد طبعا انا فى نص هدومى ربنا يخرب بيتك انتى فاكره نفسك حلوه دانتى شبه عود القصب المسوس المهم صديقى قالها انتى ازاى تكلميها كدا قالتله وانت بقا اللى هي فضلتك عن ابنى غوروا فى داهيه جاتكم القرف وفضحتنى في الشارع وقدام صاحبى وفضلت اعيط وصاحبى يضحك عليا وبعدين الشله كلها كلمتنى وطلع الاستاذ اتصل بيهم واحد واحد وحكالهم

[dody samoul]

نسخن شوية ياجماعة

[ريتاجوكو]

انا بقي في يوم ماما طلبت مني انزل الشارع اشتريلها حاجه وفضلت ماشيه ....... مااشيه ...... بس محصلش حاجه....بس بجد مواضيع جاااااااااامده معلش بقي بهرج معاكواااا

[نص مصرية]

هههههههههههههههههههههه مواقف حلوووة


لما افتكر حاجه هرجع اكتبها

[dody samoul]

ميرسي على مروركم بس عايزين الكل يدخل ويكتب عشان عايزين نضحك شوية
الهمة يا جماعة

[dody samoul]

اللى يدخل يرد ويخلى عنده دم
هو احنا شغالين لله وللوطن
استجدعوا بقي