يارب مصر تخسر !!!!!!

[احمد الصباغ]

الحكاية بدأت كده..

"أتمنى من أعماقي أن تخسر مصر آمين يارب، أنا بكره مصر لأن بعضاً من ناسها حاقدين على المنتخبات العربية"
مغربي- المغرب


ثم انحرفت إلى كده
"أفيقوا يا أولاد "فيفي عبده" فوزكم على الكاميرون راجع لمشاكل كبيرة موجودة في هذا الفريق وأي منافس آخر غير المصراوية كان سيفوز بنفس النتيجة أو أكثر فلا تغتروا أكثر من اللازم، أما بخصوص منتخب السودان فهو مستعد لمسح تعثره.. على الأقل هو يمتلك إرادة وعزيمة وليس مثلكم بائعي الكلام والشطح واللهو و عباد الجنيه والدولار"
محمد- السودان


ثم أصبحت ظريفة لهذه الدرجة
"يارب مصر تخسر، وبالنسبة للمصريين عندي ليهم هدية.. ساندوتش فول بالزيت...ههههههه"
ليلى- تونس


ثم أصبح شاذاً لهذا الحد
"رغم أنني لا أهتم كثيراً بكرة القدم... ولا يهمني إذا كان الفائز السودان أو مصر.. فهو في النهاية نصر وهمي.. لكني أتمنى من الله أن تنقطع العلاقات بين مصر والسودان إلى الأبد.. وأتمنى أن يقام جدار وحاجز بين السودان ومصر.. حتى نرتاح من أحقاد الفراعنة"
السوداني- السودان

حاجة لطيفة خالص زي ما حضرتك شايف

واضح طبعا أن "الطحن" اللي فوق ده مرتبط ببطولة الأمم الإفريقية لكرة القدم المقامة حاليا في غانا..

وواضح طبعا أن "الطحن" اللي فوق ده عبارة عن تعليقات لعدد من القراء المنتمين لأكثر من دولة عربية، وهي التعليقات المنشورة على موقع "العربية.نت" قبل وبعد مباراة مصر والسودان في البطولة..

احكِ لنا بقى شعورك إيه..
بعد ما قرأت التعليقات دي اللي فيها رصاص، ودانات مدافع، وصواريخ، وقصف بالطائرات بين قراء كلهم - وياللمصيبة- عرب بالمناسبة؟

لاحظ بس تطور الهجوم..

التعليق الأول
-كتبه مغربي- تمنى الهزيمة لمنتخب مصر مش لأنه فريق وحش لأ.. لأنه "بيكره مصر".. وش كده!.. طب ليه وعشان إيه.. وياترى كان فيه مصريون في الجيش الفرنساوي لما احتل المغرب من سنوات طويلة؟ لأ طبعا.. طب ليه كراهية؟! ماحدش يعرف!

التعليق التاني
خش بقى على التعليق التاني.. دخلنا في مرحلة "فيفي عبده".. ودي وجهة نظر عربية عن مصر تشبه كتير النظرة الأوربية لمصر برضه.. كتير في أوربا فاكرين مصر عبارة عن شوية "جمال" -جمع جمل- رايحين جايين في طريق صلاح سالم وساعات بيعملوا مشاوير من على الدائري.. وكتير من العرب "الأخوة" متخيلون أن مصر "كباريه" كبير.. وأن كل بنات مصر راقصات.. ودي طبعا وجهة نظر "غبية" لأن الهدف منها هو التجريح من أجل التجريح فقط..

التعليق التالت
وده برضه مرتبط.. اللي بيتكلم عن أن هدية المصريين ساندوتش فول.. لأ وإيه.. و"ههههههه" كمان!

التعليق الرابع
تعال بقى على التعليق الرابع.. ده كارثة حضرتك.. أولا الأخ اللي كاتبه مش بتاع رياضة.. بس سخن على التعليقات.. وهوب راح قايل حكمة العدد "نقيم حاجز بين مصر والسودان" ليه ياسيد؟.. "عشان نرتاح من أحقاد الفراعنة"!.. كده خبط لزق.. حواجز وأحقاد؟

طب تعال نتكلم بهدوء شوية في الموضوع بعد ما سخنا احنا كمان!

تفتكر إيه السبب اللي بيخلي مباراة كرة قدم عادية بين فريقين عربيين تتحول إلى معركة حربية؟

وليه المباراة دي بتطلع حاجات المفروض ماتطلعش.. وبتمسح كل الكلام الجميل عن "وطني حبيبي الوطن الأكبر"، و"الأمة العربية" والكلام الكبير ده؟

وإيه السبب في إن بعض المصريين لا يتمنون الخير أو التوفيق لبعض الدول العربية التانية حتى ولو كان ده في ماتش كورة؟

وإيه السبب برضه في أن بعض مواطني بعض الدول العربية عندهم رغبة في إلحاق الهزيمة والخسارة لمصر من أول الكورة ولغاية الأمور الكبيرة في السياسة والاقتصاد.. وفي أحيان كتيرة بينظروا إلى المصريين على أنهم "درجة أقل" وماينفعش يطلعوا فوق أصلا؟ -ده الهدية ساندوتش فول حضرتك!-

تفتكر الخلل فين.. والعيب في مين.. والعلاج إيه يعني؟

ولو كنت مصري ورحت دول عربية "شقيقة".. التعامل هناك إزاي ونظرتهم ليك ولمصر إزاي؟

ولو كنت عربي وجيت ضيف علينا في مصر.. شفت المصريين بيبصوا لك إزاي؟ وإيه درجة حبهم واحترامهم لبلدك العربي برضه؟
وليه العلاقة بين المصريين والعرب بقت بالشكل ده.. رغم أننا قبل كده كنا يداً واحدة فعلا.. في الحرب والسلم.. ومصر كان لها دور كبير في دعم الدول العربية سواء بالخبرات الفنية والعلمية في مجالات مختلفة أو حتى بالدعم المالي المباشر.. وفي نفس الوقت كان العرب سنداً حقيقياً لمصر في أوقات صعبة زي حرب 1973 مثلا..

خاصة وأنه مادامت العلاقة بيننا كمصريين وكعرب تدهورت جدا إلى هذا الحد ووصلت إلى هذه المرحلة.. يبقى إسرائيل بقى براحتها تعمل فينا اللي هي عايزاه.. ولا عندك اعتراض؟
الموضوع كبير وخطير ومقلق ويخوف..
والخناقة والكراهية لو كانت على الإنترنت النهارده،
وبسبب ماتش كورة..
ماحدش عارف بكرة إيه اللي هيحصل..

وماتنساش تكتب رأيك
يعني لازم تكتب..

[علي مدكور]

والله يا استاذ احمد الموضوع اكبر من ماتش كورة!!

بس انا هعلق علي كذا نقطة كده ،،

وإيه السبب في إن بعض المصريين لا يتمنون الخير أو التوفيق لبعض الدول العربية التانية حتى ولو كان ده في ماتش كورة؟
..

بالعكس ! مثلاً ماتش زي الماتش الأخير تونس - الكاميرون
الماتش كان جميل
وكلنا مش كلنا معظمنا يعني كنا مع تونس مش عشان حاجة
لأنها دولة عربيه فقط،


صراحة الموضوع كبير زي ما قولت لحضرتك ،،
وننتظر رد باقي الأخوة

[AhMeD El-Za3eEm]

موضوع جميل يا أستاذ الصباغ .. طبعا كلامك صحيح
للأسف ان فيه ( عرب ) كتير جدا بيكرهوا مصر لدرجة اني سمعت اغنية
من ( شوية سعوديين ) محترمين جدا و قالوا كلام و شتايم في مصر
و دا من ايه دا .. ليه كل الحقد و الغيظ دا كله .. هي مصر عملتلكم حاجة
و لا أهل مصر عملولكوا حاجة ... معروف جدا ان المصري مضياف
يعني بيحترم ضيفه اي كان عربي أو هندي .. مغربي أو كويتي
أنا حاولت أسأل نفسي السؤال دا .. ملقتش جواب منطقي أو غير منطقي واحد
سؤال ملهوش غير علامة استفهام كبيرة (؟)

أنا كعربي مصري ... عايز أعرف لحد امتي الهيافة و الكلام الفاضي دا حيفضل في عقليه كل عربي ؟!!

يهظر ان الموضوع كبير زيادة عن اللزوم يا جماعة

[طيف عابر]

بصراحة كلام مؤسف جدا وفعلا قد يسعد الاعداء جدا
واستغرب الهجوم على مصر وشعبها المضياف الطيب بهذه الطريقه الفظة
ولكن هذا دليل اكبر على التخلف الذي يسيطر على بعض العقول العربيه
ان ُتعامل في بعض الدول على انك اجنبي فهذا ايضاً مظهر من مظاهر العنصريه التي ستؤدي بنا الى المزيد من الكوارث والتراجع

ولكن لا تستغرب استاذي
الم يتعارك الاخوة فيما بينهم في العراق ولبنان وفلسطين والجزائر وحتى في المغرب نفسها ؟؟؟
فان كنا نكره بعض على مستوى مواطني البلد نفسها فكيف سنحب بعض كعرب؟؟

بكل فخر اقول انني افتخر باسلامي وعروبتي ومصر فوق واكبر من كل قذارة يتفوه بها الاخرون

بارك الله فيك مقال فعلا يستحق النقاش والمتابعه من الجميع