يبقى انت اكيد في مصر!!!!

**~~الغاطس~~** · 2 - 8 - 2009, 08:48 PM

بصوا من الآخر كده انا ملييش نفس اعمل أي حاجة في الدنيا يعني انا الخنقة
اساسا وصلت بيا آخرها زيي زي كل الشعب المصري ...بس انا الجرعة عندي زيادة شوية ...يقوم منه لله عم احمد الزلنبحي البقال عندنا مشغل التليفزيون المصري لفتت نظري الأغنية اللي شغالة ...اغنية اسمها ...يبقى انت اكيد في مصر .

في البداية طنشت شوية ...وبعدين ركزت ..وركزت اكتر لقطت كلمتين من الأغنية ما معناه ...لما الحفيد يشد ايد جده ويقوله يلا يا جدي نصلي العصر ...يبقى انت اكيد اكيد في مصر .

هاهاهاهاهاهاهاهاهاهاهاهاه اهاه والنبي ايه حلوة دي ....يعني لو عيل صغير غلط واتخبل في عقله في الصومال مثلا وقال لجده تعالى نصلي العصر ...حيبقى بقدرة قادر تنقلب الصومال مصر علشان يبقوا اكيد في مصر .

والله اللي كتب الشعر ده دماغه لاسعة ( مع الأعتذار لقارئتنا المتميزة لاسعة ) .انا بقى لا شاعر ولا بفهم في الشعر ده لكن اللي اعرفه ان عندي حاجات كتير مش ممكن بجد مش ممكن تحصل لو حصلت إنك تقول غير حاجة واحدة ....تقول يبقى انت اكيد في مصر .

لو البلد تعبانة و44% من سكانها يعيشون تحت خط الفقر وفيها عبارة غرقانة وانفلوانزا الطيور ومع كده مسؤل يطلع في حوار صحفي والمذيعة تسأله انت مرتاح لوضع البلد ...فيكون الجواب مرتاح اوي ......يبقى انت اكيد في مصر ( يلا .... حتة من ورا ظهر الرقابة واللي يلحقها يلحقها )

لو لقيت الظابط ماسك واحد عمال يديله على قفاه في مظاهرة او في القسم....يبقى أنت أكيد في مصر .

لو لقيت نص شبابنا بيضرب بانجو وحشيش عـ القمة ......يبقى أنت أكيد في مصر .

لو صندوق زبالة فاضي والناس رامية الزبالة جنبه ...يبقى أنت أكيد في مصر .

لو لقيت غطيان البلاليع في الشارع مسروقة وصناديق الزبالة مسروقة ولمض النور عـ السلالم مسروقة وشارع بحاله في محطة الرمل لبيع الموبايلات المسروقة ...يبقى أنت أكيد في مصر .

لو لقيت بلد تعبانة وموجوعة وشبابها همه في الدنيا روبي وهيفاء ......يبقى أنت أكيد في مصر .

لو لقيت رغيف العيش فيه دبارة ومسمار وجناح صرصار ..يبقى أنت أكيد في مصر .

لو لقيت البطيخ مسموم والعنباية قد التفاحة والتفاحة لا طعم ولا ريحة والخوخة منقعوة في الكلور والمية اللي نازلة من الحنفية ريحتها مجاري .....يبقى أنت أكيد في مصر .

لو حبيت تعرف اللي بيحصل في بلدك لازم تشتري دش وتعرف من بره بلدك عن طريق الفضائيات ....يبقى انت أكيد في مصر .

لو مشيت على طريق مصر اسكندرية ولقيت مدن وبيوت طويلة عريضة وقرى سياحية ...فاضية ومهجورة وصحابها ما بيسكنوهاش غير اسبوعين في الصيف ....ومشيت في شبرا ولا الحضرة ولا كرموز ولا غيط العنب ولقيت الناس عايشين في اكشاك خشب وصفيح .....يبقى انت اكيد في مصر .

لما 90 % من الموبايلات اللي بتقع من صحابها في الشارع او في المواصلة اللي بيلاقيها ما بيرجعهاش وياخدها ويقبلها حرام على نفسه ....يبقى انت اكيد في مصر .

لو لقيت شعب عمال يفتخر انه شعب متدين وبتاع ربنا واكتر بلد فيها الأسلام وبلد الأزهر ...ومع كده سب الدين شيء من العادي انك تسمعه في الشارع ....يبقى انت اكيد في مصر

لو لقيت من كل بيت خارج مدرس خصوصى ..
يبقى أنت أكيد...أكيد في مصر

لو لقيت فى بلد سنه سادسة ابتدائى و سنه خامسة ابتدائى!...
يبقى أنت أكيد...أكيد في مصر

لو لقيت فى كل بيت واحد أو أتنين ماتوا من السرطان ...
يبقى أنت أكيد...أكيد في مصر

لو رحت التأمين الصحى و إدوك حديد و زرنيخ ...
يبقى أنت أكيد...أكيد في مصر

لو لقيت فى بلد البحث العلمى فيها تايه و لسه بيحاول يجد العلاقة بينه وبين المجتمع ...
يبقى أنت أكيد...أكيد في مصر

لو لقيت فى بلد ربع سكانها ساكننين فى عاصمتها ..
يبقى أنت أكيد...أكيد في مصر

لو لقيت فى بلد تعبيرات مثل \"السحابة السودة\" و \"الشفافية\" ...
يبقى أنت أكيد...أكيد في مصر

لو سمعت جملة \"اللى نعرفه أحسن من اللى منعرفوش\" ..
يبقى أنت أكيد...أكيد في مصر

لو رحت \"دار الفؤاد\" و جاتلك الفاتورة و نعشك فى طريقه \"لدار الخلد\" ...
يبقى أنت أكيد...أكيد في مصر

لو رحت تطلع مخالفات عربيتك و لاقتها غير صحيحة لأن بالفعل معندكش عربية ...
يبقى أنت أكيد...أكيد في مصر

لو لقيت عجوز و عجوزة ماشيين و معاهم سلم خشب لزوم طلوع الرصيف ...
يبقى أنت أكيد...أكيد في مصر

لو ركبت مترو الأنفاق و ملقتشى هوا و لا تكييف ...
يبقى أنت أكيد...أكيد في مصر

لو مزنوق و ملقتشى مراحيض عامة ...
يبقى أنت أكيد...أكيد في مصر

لو مرة لقيت رسوم الزبالة على فاتورة الكهربا و مرة تانية على فاتورة الغاز ...
يبقى أنت أكيد...أكيد في مصر

لو سمعت بودانك و شفت بعنيك رئيس نادى محترم بيشتم الكل بدون عقاب أو جزاء ...
يبقى أنت أكيد...أكيد في مصر

لو فتحت التليفزيون و شفت ظرف \"البيت بيتك\"...
يبقى أنت أكيد...أكيد في مصر

لو سألت واحد أو واحدة مين الريس فى كل الألفية الثالثة؟! و رد و قال بدون تفكير \"..........\" ...
يبقى أنت أكيد...أكيد في مصر

لو قرأت الصحف فى 2005 و فى 2016 عن توصيل الكهرباء للعشوائيات و لقيت نفس الكلام \"التوصيل عملية مستمرة\" ...
يبقى أنت أكيد...أكيد في مصر

لو قرأت الصحف فى 2005 و فى 2050 و لقيت نفس الكلام \"الأصلاح السياسى و الإجتماعى عملية مستمرة\" ...
يبقى أنت أكيد...أكيد في مصر

لو رحت تنتخب و معاك بطاقة إنتخابية و ردوا و قالوا إنك متوفى ...
يبقى أنت أكيد...أكيد في مصر

لو سألت واحد أو واحدة ليه بالعربى هيه إسمها \"مصر\" و بالخواجاتى هيه إسمها \"إيجبت\"؟! و رد و قال معرفش! ...
يبقى أنت أكيد...أكيد في مصر

لما تلاقي الظلم هواية …… وكل الناس بتقول ده كفاية
لما تشوف شعبك مطحون …… سعر كرامته تملِّي يهون
لما تلاقي الناس مخنوقة …… وِحْكوماتهـا بقت أهزوءة
يبقى انت أكييييد أكيييد في مصر

لما تلاقي حكومه خايبة …… لكل هموم الشعب ده سايبة
لما تلاقي شعوب محروقة …… والقوانين جاية ومسلوقة
شفت حكومة سفاحيـن …… للعـمــال والفـلاحيـن
أو بتشوف إعلام كـداب …… عمال بيشجع في خـراب
يبقى انت أكييييد أكيييد في مصر

لما تلاقي سجون مليانـة ….. فيها كل الناس الغلبانـــة
إنتخابات فيها وتـزوير …… علشان ينجح شخص حقيـر
واما تلاقي مسئول كـداب …… وحكومـة فاتحالــه الباب
يبقى انت أكييييد أكيييد في مصر

لما تشوف مسئول وحرامي …… والمفروض لمكانه حامي
لما تلاقي الرشوه سايدة …… وحكومه مش جايبة فايـدة
لما تشوف مسئول هيموت …… حط وراه إبنه الهلفـوت
شفت الدنيا وفيها بطالة …… وحكومة ع الشعب ده عالة
يبقى انت أكييييد أكيييد في مصر

لما تلاقي حكومة هايفة …… عايزه تخللي شعوبها خايفة
لما تقول للريس هيـه …… تاخد وجبة وعشرة جنيــه
شفت استفتاء مسرحيــة …… من أسوان لاسكندريـة
واما تشوف طبخ في قوانين …… ويجيبوا الستة وتسعين
واما يكون ده كلام مش حصر …… دي أمثله تشهد ع العصر
يبقى احنا أكييييد أكيييد في مصر

لو لقيت الأتوبيس فاضي ..والشارع نظيف ...والناس إيجابية ...والأكل نظيف ....يبقى أنت أكيد مش في مصر .

وبعد ده كلة برضو بنحبها ومهما تعمل فينا هنفضل نحبها

منقول ياض انت وهو وهي

**love_egy** · 2 - 8 - 2009, 08:57 PM

بجد عندك حق يا ماااااااااان

نايس توووووووبيك

**سمسمه النونه العسوله** · 2 - 8 - 2009, 09:08 PM

خلاص حرام عليك قطعت قلبى حرام انا مش عرفه اقول ا يه بس كفايه انا غرقت الارض من كتر العايط مش قدره ايه يا ابنى القل ده انت الناقل الموضوع ده يا سلام ايه العقل ده هههههههههههههههه

**قمر الليالى** · 2 - 8 - 2009, 09:56 PM

بلدنا احسن بلد فى الدنيا بس العيب مش فيها العيب فى اللى مسكنها

نيس تيوبك سانكس

**sunlight** · 2 - 8 - 2009, 10:05 PM

لا والله مصر جميله جدا
وبعدين انت مسمعتش باقى الاغنيه
لماتلاقى فى جرحك الف عين باكيه عليك
وتلاقى فى فرحك زغاريد وزينه من حوليك
يبقى انت اكيد اكيد فى

مصر

**~~الغاطس~~** · 2 - 8 - 2009, 10:35 PM

يا جماعة بلاش نفاق كلنا عارفين ان بلدنا خربانة ياعم خربانة الدنيا خربانة
كلها كوسة وقرع وكدب وغش ومش وعشل اسود علينا وعلى اللي جابونا
بلاش اكمل عشان هاقول ايه ولا ايه ولا

ايه

**sunlight** · 2 - 8 - 2009, 10:56 PM

لالالالالالالالالالا
انت قاسى اوى عليها يا غاطس
دى جميله اوى
طيب انت جرب تحبها من قلبك

:

بقولك من قلبك
حاول تحبها وشوف ايه اللى هيجرالك

اكيد هاياخدوك امل دوله

**HoBa HoBa** · 3 - 8 - 2009, 05:16 AM

ههههههههههههههههههههههههه ههههههه
دى الحاجات دى قليلة عن الحاجات اللى فى مصر

الموضوع: يبقى انت اكيد في مصر!!!!

أدوات الموضوع

يبقى انت اكيد في مصر!!!!

معلومات الموضوع

الأعضاء الذين يشاهدون هذا الموضوع

المواضيع المتشابهه

مكياج جديد للعرايس صور مكياج للعروسه 2010 ميك اب كيوت

دعوات تركية لمقاطعة المنتجات الأميركية والبريطانية - هل من مستجيب مع تركيا ؟

الكلمات الدلالية لهذا الموضوع

ضوابط المشاركة