قهوتنا على الانترنت
ابحث عن :  
صفحة 1 من 2 12 الأخيرةالأخيرة
النتائج 1 إلى 10 من 17
  1. #1

    حوار مختارات الأبنودي..

    دي مجموعة من أشعار الشاعر عبد الرحمن الأبنودي موجودة في كتاب اسمه مختارات الأبنودي حبيت أنقلها هنا

    **

    أول ما نبدى القول

    أول ما نبدى القول نصلى على النبى
    باحب بلدى ويسكرنى الغنا والناس
    واحب صوت المكن لما يكون داير
    واحب قمح السنابل..واعشق الدراس
    واحب شال الربيع عل كتاف بستان
    واغوى سريخ النباتة..تحت سن الفاس
    واحب عالم ..وعالم باللى ناقصنى
    وأى فكرة صحيحة..ع الخدود تنباس
    مدى الخطاوى يا بلدى يا ضحكتى الحرة
    مدى الخطاوى يا بلدى وانتى شايلة الناس.

    صحت المدينة فى يوم مالقيتش جناينها
    القمرى طار منها وغربانها جانييناه
    السجن خنقة وزنقة البطن يا جنينها
    قضبانة سودا وعنيدة بضى صفراوى
    صفى الغناوى لى الأسفلت وانا غاوى
    ما اغنى غير وسط عاريينها وحافيينها.

    ومن بعيد القمر عوام بلا شاطىء
    ما دخلش شباكى ده عالى وده واطى
    هوه اللى يعشق عيون بلده يصير خاطى؟
    ده ان كان عشقك يا مصر خطية ونجاسة
    طين النجاسة يا نخاسة.. بلغ باطى.!!

  2. #2

    افتراضي رد: مختارات الأبنودي..

    خيط الحرير

    الليل جدار ..
    إن يدن الديك من عليه يطلع نهار.
    وتنفلت من قبضة الشرق الحمامة أم الجناح..
    أم الجناح أبيض فى لون قلب الصغار.
    آه يا حبيبتى يا ام خصلة مهفهفة..
    قلبى اللى مرعوش الأمان..
    لسة بيحلم بالدفا..
    والشمس كلمة طيبة وفيها الدفا.
    قلبى اللى كان قرب يموت..
    لسة بيحلم بالبيوت
    زى الخرز
    والدرب خيط
    حرير..ولا ضم كل حيط
    وف كل دار يترش حب الحب غيط.
    يتنفس اللبلاب على الباب الكبير..
    وبرضه ملضوم بالحرير

    يا ام العيون الدفيانين..
    لو تعرفى من فين سمار النيل ؟منين!!
    إوعك تقولى لإن جوفه عب طين..
    أسمر ..
    لإن الشمس فوقه من سنين..
    لو تعرفى طول السنين..
    على شاب عريان البدن وبدراعاته المكشوفين.

    وانتى عينيكى اسمرو من شيل الحنين..
    ولإنهم متكحلين بشىء حزين
    بشىء فى كل عيون صحابى الطيبين
    إللى فى عينيهم إنتظار.

    والليل جدار
    إذا يدن الديك من عليه ..
    يطلع نهار

  3. #3

    افتراضي رد: مختارات الأبنودي..

    لوحدى
    وامشى وحدى ع الجسور
    طيرة ...هاجة م الطيور
    طيرة..هربانة بجناحها
    هاجة م الطير فى الطابور.

    أترمى..وارقص ..وأبكى
    واترعش.. وانزف.وأدور
    واتملى بهوا البحور.

    يا سلااام
    لو يتوه منى مكانى
    كل ما أخرج منه للتانى
    يتوه الأولانى.!!

    نص نايم.. نص صاحى
    أمشى فى طراف الضواحى
    من ورا نخل الكفور.

    لا صباع شافنى وشاور
    ولا ناس ..بيا ..تشور.

    وحدى .. ما يخبر عليا

    غير غبار الخطوة
    غير صوت العبور
    زى مافى ريح الدروب..
    ريحة الكافور
    هربانة من شجر الكافور..!!


    يا سلاااااااااااااام

    لو يتوه منى مكانى
    كل ما اخرج من مكان
    ما ارجعش تانى.

  4. #4

    افتراضي رد: مختارات الأبنودي..

    كباية شاى..كتبها سنة 1967

    على كرسى ف قهوة ف شارع شبرا
    قعدت
    و جاب لى كباية الشاى الجرسون.

    -كباية شاى القهوة غير كباية شاى البيت خالص-

    بصيت له كتير
    مش عارف ليه
    من مدة طويلة ما شتفش حى.

    كان الشارع نابض فيه الدم المطفى وحى.

    مر عليا الراجل لاصلع خالص.
    والنبت اللى فى ايدها طبق الفول الناقص خالص.

    مرت عربية جديدة وفيها ناس وشها ساكت خالص
    وولد بيكلم بنت على التلتوار
    بالحس الواطى
    وخايف خالص.
    وعلى التلتوار التانى كان دكان فكهانى منظم خالص
    وقعت سنجة تروماى(خمسة...)
    طلع الولد - المتشعبط - ركبها
    وركب من باب الترماى قدام الكومسارى
    شافه ماكلمهوش خالص.

    عدى الراجل اللى ما نزلش من ع العجلة بقى له ست سنين...
    كان تعبان جدا
    وموطى
    ومش بيبدل خالص.

    أخد الجرسون قرشين بقشيش
    بص لى جدا..جدا
    واستغرب خالص خالص ..!!


  5. #5

    افتراضي رد: مختارات الأبنودي..

    يامنة

    عن يامنة عمته إللى بيقول عليها لما كتب القصيدة إنها كانت آخر حباية فى العنقودد الأبنودى القديم ويترحم عليها وعلى فاطمة قنديل أمه والشيخ محمود أبوه وذلك فى مستهل تقديمه للقصيدة

    وهو كتبها سنة 1997


    والله وشبت يا عبد الرحمان..
    عجزت يا واد..؟
    مسرع؟
    ميتى وكيف؟
    عاد اللى يعجز فى بلاده
    غير اللى يعجز ضيف..!!
    هلكوك النسوان؟
    شفتك مرة فى التلفزيون
    ومرة..ورونى صورتك فى الجورنان
    قلت:كبر عبد الرحمان.!!
    أمال أنا على كدة مت بقالى ميت حول.!!
    والله خايفة يا وليدى القعدة لتطول.
    مات "الشيخ محمود"
    وماتت "فاطمة اب قنديل"
    واتباع كرم اب غبان"
    وانا لسة حية..
    وباين حاحيا كمان وكمان
    عشت كتير
    عشت لحد ما شفتك عجزت يا عبد الرحمن
    وجالولى جال خلفت
    وانت عجوز خلفت يا اخوى؟؟
    وبنات..!!؟
    أمال كنت بتعمل إيه
    طيلة العمر اللى فات؟
    دلوقت ما فقت؟
    وجايبهم دلوك تعمل بيهم ايه؟
    على كل..
    أهى ريحة من ريحتك ع الأرض
    يونسوا بعض
    ماشى يا عبد الرحمان.
    أهو عشنا وطلنا منك بصة وشمة.
    دلوك بس ما فكرت فى "يامنة" وقلت :يا عمة؟؟
    حبيبى انت يا عبد الرحمان
    والله حبيبى وتتحب
    على قد ما سارقاك الغربة لكن ليك قلب.
    مش زى ولاد الكلب
    اللى نسيونا زمان..!!
    حلوة مرتك وعويلاتك ولا شبهنا..؟
    سميتهم ايه؟
    قالولى : (آية)و(نور)
    ماعارفش تجيب لك حتة واد؟
    والا أقولك
    يعنى اللى جبناهم..
    نفعونا فى الدنيا بايه؟
    غيرشى الإنسان مغرور.!!
    ولسة يامنة حا تعيش حاتلبس
    لما جايبلى قطيفة وكستور؟
    كنت اديتهمنى فلوس
    أشترى للركبة دهان
    آ..با..ى ما مجلع قوى يا عبد الرحمان.
    طب ده أنا ليه ست سنين
    مزروعة فى ضهر الباب
    لم طلوا عليا أحبة ولا أغراب.
    خليهم..
    ينفعوا
    أعملهم أكفان.!!
    كرمش وشى
    فاكر يامنة وفاكر الوش؟
    إوعى تصدقها الدنيا..
    غش ف غش.!!
    إذا جاك الموت يا وليدى
    موت على طول.
    إللى اتخطفوا فضلوا أحباب
    صاحيين فى القلب
    كإن ما حدش غاب.
    واللى ماتوا حتة حتة
    ونشفوا وهم حيين..
    حتى"سلامو عليكم" مش بتعدى
    من برة الأعتاب.
    أول ما يجيك الموت..افتح.
    أول ما ينادى عليك..إجلح.!!
    إنت الكسبات.
    إوعى تحسبها حساب.!!
    بلا واد ..بلا بت..
    ده زمن يوم ما يصدق..
    كداب.!!
    سيبهالهم بالحال والمال وانفد
    إوعى تبص وراك.
    الورث تراب
    وحيطان الأيام طين
    وعيالك بيك مش بيك عايشين..!!
    يو....ه يا "رمان" وده اسم التدليل لعبد الرحمن الأبنودى فى طفولته
    مشوار طولان
    واللى يطول يوم عن يومه يا حبيبى..حمار!!
    الدوا عايزاه لوجيعة الركبة
    مش لطوالة العمر.
    إوعى تصدق ألوانها صفر وحمر.
    مش كنت جميلة يا واد؟
    مش كنت وكنت
    وجدعة تخاف منى الرجال..؟
    لكن فين شفتونى..؟
    كنتوا عيال.!!
    بناتى (رضية)و(نجية) ماتوا وراحوا
    وانا اللى قعدت.
    طيب يا زمان..!!
    إوعى تعيش يوم واحد بعد عيالك
    إوعى يا عبد الرحمان.
    فى الدنيا وجع وهموم أشكال وألوان.
    الناس ما بتعرفهاش.
    أزعرهم لو حتعيش
    بعد عيالك ما تموت.
    ساعتها بس..
    حاتعرف إيه هو الموت.!!
    أول ما يجى لك ..نط
    لسة بتحكى لهم بحرى حكاية
    "فاطنة وحراجى القط"..؟
    آ...باى ما كنت شقى وعفريت
    من دون كل الولدات.
    كنت مخالف...
    براوى...
    وكنت مخبى فى عينيك السحراوى
    تمللى حاجات.
    زى الحداية..
    تخوى ع الحاجة ..وتطير.
    من صغرك بضوافر واعرة..ومناقير.
    بس ما كنتش كداب.
    وآدينى استنيت فى الدنيا
    لما شعرك شاب..!!
    قدم البيت.
    إتهدت قبله بيوت وبيوت.
    وأصيل هو ..
    مستنينى لما أموت..!!
    حا تيجى العيد الجاى؟
    واذا جيت
    حاتجينى لجاى؟
    وحتشرب مع "يامنة" الشاى.؟؟

    حاجى يا عمة..وجيت
    لا لقيت "يامنة" ولا البيت..!!

  6. #6

    افتراضي رد: مختارات الأبنودي..

    الحارة الفلسطينية!!!

    شوف كام سنة عدت وأنا صاحى
    اسم بلادى..... هو سلاحى
    والثورة ..بتسهر صباحى
    فى الحارة الفلسطينية!!!
    . . .
    ألف سلامة ..ألف سلامة
    يا علمى اللى ضلموك .. يا ما
    حتى الدنيا .. ليها قياامة..
    فى الحارة الفلسطينية!!
    . . .
    أعلامى سودا من الهم
    أحلامى حمرا..وده دم
    فى الاكفان البيض نتلم
    م الحارة الفلسطينية!!!
    . . .
    يا سلالم طالعة يا ثوارها
    أجسادنا سلم لقمرها
    الأطفال ..خلعت أعمارها
    فى الحارة الفلسطينية!!
    . . .
    يا أرض الرسالات باركينا
    بنوفى الندر إللى علينا
    الموت..بيرفرف حوالينا
    فى الحارة الفلسطينية!!!
    . . .
    الثورة ضد الصهيونى
    هيه عقلى وجنونى
    واتقهقر..لما يردونى
    للحارة الفلسطينية!!!
    . . .
    و "يسوع " ماشى شايل خشبه
    اللى يهينه ..واللى يسبه
    صلبوه هم..والا اتصلبوا
    فى الحارة الفلسطينية!!!
    . . .
    يا حجارتى..لسلاح الواطى
    يا قنابل .. يا رصاص مطاطى
    أنا ماشى معدول وصراطى
    الحارة الفلسطينية!!
    . . .
    الأرض اللى زارعها سنابل
    وأغانى شحارير وبلابل
    أهو جانى اللى زرعها قنابل
    فى الحارة الفلسطينية!!
    . . .
    أنا راحل باقى على العهد
    وشهيد ..جايلك ع الوعد
    أنا جثة فى "كنيسة المهد"
    والحارة الفسطينية!!
    . . .
    والبنت اللى يا دوب تيجى وردة
    انفجرت فى القدس ..وفاردة
    دراعاتها ..ماتت وبتنده:
    "الحارة الفلسطينية"
    . . .
    وباواجه كل ماباتقدم
    الدولة ام الجيش متنظم
    أمريكا .. تحت المخيم
    فى الحاة الفلسطينينية!!!
    . . .
    يا عيون الدنيا يا شايفانا
    عميا..؟ والا انتى عميانة؟
    عمرك ما حتبقى ويانا
    فى الحارة الفلسطينية!!!
    . . .
    يا الأقصى ..يا شامخ فى مكانك
    متغمس فى الحزن ..أدانك
    بتعد اللى ماتوا عشانك
    فى الحارة الفلسطينية!!!
    . . .
    والقدس الحرة ..المغصوبة
    غالبة..لكن بتبات مغلوبة
    مش دى اللى تحررها الطوبة
    فى الحارة الفلسطينية!!
    . . .
    كفى صراخك..مابيسمعنا
    غير الدمع اللى ف مدامعنا
    أحياؤ..والقبر اللى جامعنا
    الحارة الفلسطينية!!
    . . .
    ماحناش ضعفا ولا احنا غلابة
    مهما عوت حوالينا..ديابة
    واتردمت تحت الدبابة..
    والحارة الفلسطينية!!!
    . . .
    ولا بصياحنا ..ولا بنواحنا
    ولا نخلق فى العتمة صباحنا
    إلا أيادين ..وسلاحنا
    فىالحارة الفلسطينية!!
    . . .
    أنا أعلا ما ف صوتى سكوتى
    واحلا حياة بعشها ..موتى
    أنا أرضى ..وقلبى ..وملكوتى
    الحارة الفلسطينية!!!

  7. #7

    افتراضي رد: مختارات الأبنودي..

    ارقص على السلم

    سلم قلوعك للغروب..والغربة
    واعجن..وكل واشرب بقية زادك
    ولا انت واصل بالقلوع..لأوروبا..
    ولا انت راجع بالقلوع لبلادك..
    فياشاب..
    يا معلم ..يا متعلم..
    ارقص على السلم.

    يا صهد ..يا شاوح
    ضلل على الرايح
    فى اليم...من غير يم.
    والزند من غير دم.

    وياشاب يا مطفى العيون الماس
    راح الحماس..وقعدت فى الضلة.
    كشفت عريك فى البلاد للناس
    وتاجرت فى الأشعار وفى الفعلا.
    لا دين
    ولا ملة.
    لا وصلت..لا رجعت..لا منور ولا مضلم.

    الحق قام
    والكره قام
    لا قمت تتكلم..ولا تسلم..
    فارقص.

  8. #8

    افتراضي رد: مختارات الأبنودي..

    حطب القطن

    القبر المحشور بالأموات
    والليل اتأنى لما فات
    ووقف يبص ف خرم الباب أربع مرات

    الكلب بيعوى فوق الحيط..
    وترد عليه من شرق السكة كلاب يتجن..
    ويهد السقف ..يمطر فوق العيلة حطب القطن.

    الليل ساعة..
    دقتها من دق الطواحين.
    من دق قلوب الناس النايمة على التربة
    جنب المواعين.
    جنب جرار المية النايمة فى الطين.
    وحفيف النخل
    حفيف ورقة بين إيد محضر فى عيون مساكين.
    وبخار(الزريبة) الطالع ..يحكى حكاية
    عن عيشة وخضرة وفاطمة وست الكل
    واحمد سماعين.
    أربع نسوان لون الأزمة
    واتناشر عود.
    أشباح ممدودة بعرض الدار.
    اتناشر واد
    حدفتهم ع الدنيا ليالى ماشافتش نهار
    قناديل مطفية ف عين الكون.
    بتدخن عين والد مديون
    قورته محروته بمحرات الزمن اللى حييه.
    يسعل فى الليل..
    تتهز مع سعاله جناحات العصافير فى صداغه.
    حاضن بعينيه وصدره الموضوع:
    "القطن خلاص حيموت م الجوع.."
    حيموت القطن
    لوما تفكش هوه وقام لاجل يفك الرهن.

    وتنوح ع البعد سواقى
    وراها واد عمال يحدى موال أخضر لون البرعم.
    ويعود أحمد سماعين لزمان..
    أيام ما أبوه قالله وكانت سارقاه سكين الموت:
    "أمك والأرض..
    دين موتى عليك
    وأهو انت كبرت بقيت راجل"
    واتمدت إيد ع الرمش وجابت لتحت
    ورجع والنعش خشب وملاية.
    لحظة..
    ضاع فيها وسط تعازى الناس
    وكأنه لسه بين إيد الداية.

    وتمر أيام تدفن أمه..
    وتفك وصايته من عمه
    وتمر ايام..وايام..وايام.
    الواد بيحس بجسمه يشكه لما يشوف ع الجدول بنت.
    الواد يتجوز ..ويخلف..
    والرزق براح..
    وعينيه لسة فيها الركن التانى
    إتجوز بنت "الحسانى"
    لاتنين فى البيت ..والبيت كوانينه بتكلف
    لتنين ..من ديه ومن ديه
    أحمد سماعين كان بيخلف.
    وهداه "الحاج فرج"بالتالتة وجابها لحد الباب..
    والبنت شباب
    وشبابها صعب ومتحلف
    والبنت بتحبل وتخلف.
    والرابعة أبوها اتوفى وسابها فى رعايته
    خاف م الفتنة
    كمل دينه على كل مذاهب أهل الدين
    باربع نسوان لون الأزمة
    وتناشر عود.

    وشوية شوية النار تسرح..
    لما يتدرى الجرن رماد
    والكتف يهزل..ويضيعوا ف قيراطين الطين.
    ويمد احمد سماعين الإيد..يرهن أرضه.
    وتمر الأيام وزمانه بيعيد بعضه..
    واحمد سماعين لسه بيمد الإيد برضه.

    أحمد سماعين رجليه مش باينه من العكاز
    أحمد سماعين غيمتين فى عينين
    غرقانة فى إنذار الداين
    الورث صحيح اهو مش هاين..
    لكن..مسكين راح يعمل إيه؟
    حتى الأولاد لسة ماكبروش
    أصل النسوان كانوا بيولدوا ساعات مع بعض.
    أحمد سماعين بيعض الأرض.
    الأرض اتباعت للداين..
    والمش هاين أصبح هاين..
    والدار بتنام من غير قنديل
    وعيال بتبات تندغ بسنانها الليل
    وحريم تتحسر على أيام العز..زمان..
    اليوم كله خناقات..وصوات
    وفلان رايح..وفلانة جات
    والقبر المحشور بالأموات
    من ضلع الفقر بيسحبله أربع خشبات
    والليل اتأنى لما فات..
    ووقف بيبص ف خرم الباب أربع مرات
    ودخل وطلع شايل جثة أحمد سماعين.
    والكلب بيعوى فوق الحيط..
    وترد عليه من شرق السكة كلاب يتجن..
    ويهد السقف..
    يمطر فوق العيلة حطب القطن!!

  9. افتراضي رد: مختارات الأبنودي..

    اقتباس المشاركة الأصلية كتبت بواسطة samamasr مشاهدة المشاركة
    ومن بعيد القمر عوام بلا شاطىء
    ما دخلش شباكى ده عالى وده واطى
    هوه اللى يعشق عيون بلده يصير خاطى؟
    ده ان كان عشقك يا مصر خطية ونجاسة

    طين النجاسة يا نخاسة.. بلغ باطى.!!


    أحسنتي الإختيار يا أيمان


    عبد الرحمن الأبنودي بيتكلم بلسان الفلاح البسيط في أرضة

    والعامل الغلبان في في شغله

    والموظف المطحون على مكتبه


    كلماته عذبة وسلسه وبتعبر عن معظم طبقات الشعب


    تسلم ايدك
    وانت تعد فطورك ، فكر بغيرك
    (لا تنس قوت الحمام)
    وانت تخوض حروبك ، فكر بغيرك
    (لا تنس من يطلبون السلام)
    وانت تسدد فاتورة الماء ، فكر بغيرك
    (من يرضعون الغمام)
    وانت تعود الى البيت بيتك ، فكر بغيرك
    (لا تنس شعب الخيام)
    وانت تنام وتحصي الكواكب ، فكر بغيرك
    (ثمة من لم يجد حيزا للمنام)
    وانت تحرر نفسك بالاستعارات ، فكر بغيرك
    (من فقدوا حقهم في الكلام)
    وانت تفكر في الاخرين البعيدين، فكر بنفسك
    (قل.. ليتني شمعة في الظلام)

    البحث على جميع مواضيع العضو مسلمـ

  10. افتراضي رد: مختارات الأبنودي..

    اقتباس المشاركة الأصلية كتبت بواسطة samamasr مشاهدة المشاركة
    الحارة الفلسطينية!!!


    . . .
    يا عيون الدنيا يا شايفانا
    عميا..؟ والا انتى عميانة؟
    عمرك ما حتبقى ويانا
    فى الحارة الفلسطينية!!!
    . . .
    يا الأقصى ..يا شامخ فى مكانك
    متغمس فى الحزن ..أدانك
    بتعد اللى ماتوا عشانك
    فى الحارة الفلسطينية!!!
    . . .
    والقدس الحرة ..المغصوبة
    غالبة..لكن بتبات مغلوبة
    مش دى اللى تحررها الطوبة
    فى الحارة الفلسطينية!!
    . . .
    أنا أعلا ما ف صوتى سكوتى
    واحلا حياة بعشها ..موتى
    أنا أرضى ..وقلبى ..وملكوتى

    الحارة الفلسطينية!!!

    مبدع إسمه الأبنودي

    كلامه بجد ملوش حل


    شكرا أوي يا إيمان على إختيارك الموفق
    وانت تعد فطورك ، فكر بغيرك
    (لا تنس قوت الحمام)
    وانت تخوض حروبك ، فكر بغيرك
    (لا تنس من يطلبون السلام)
    وانت تسدد فاتورة الماء ، فكر بغيرك
    (من يرضعون الغمام)
    وانت تعود الى البيت بيتك ، فكر بغيرك
    (لا تنس شعب الخيام)
    وانت تنام وتحصي الكواكب ، فكر بغيرك
    (ثمة من لم يجد حيزا للمنام)
    وانت تحرر نفسك بالاستعارات ، فكر بغيرك
    (من فقدوا حقهم في الكلام)
    وانت تفكر في الاخرين البعيدين، فكر بنفسك
    (قل.. ليتني شمعة في الظلام)

    البحث على جميع مواضيع العضو مسلمـ

 

 
صفحة 1 من 2 12 الأخيرةالأخيرة

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

الكلمات الدلالية لهذا الموضوع

ضوابط المشاركة

  • مش هتقدر تضيف مواضيع جديده
  • مش هتقدر ترد على المواضيع
  • مش هتقدر ترفع ملفات
  • مش هتقدر تعدل مشاركاتك
  •  
جميع الحقوق محفوظة لمنتديات مصراوي كافيه 2010 ©