خيط الحرير
الليل جدار ..
إن يدن الديك من عليه يطلع نهار.
وتنفلت من قبضة الشرق الحمامة أم الجناح..
أم الجناح أبيض فى لون قلب الصغار.
آه يا حبيبتى يا ام خصلة مهفهفة..
قلبى اللى مرعوش الأمان..
لسة بيحلم بالدفا..
والشمس كلمة طيبة وفيها الدفا.
قلبى اللى كان قرب يموت..
لسة بيحلم بالبيوت
زى الخرز
والدرب خيط
حرير..ولا ضم كل حيط
وف كل دار يترش حب الحب غيط.
يتنفس اللبلاب على الباب الكبير..
وبرضه ملضوم بالحرير
يا ام العيون الدفيانين..
لو تعرفى من فين سمار النيل ؟منين!!
إوعك تقولى لإن جوفه عب طين..
أسمر ..
لإن الشمس فوقه من سنين..
لو تعرفى طول السنين..
على شاب عريان البدن وبدراعاته المكشوفين.
وانتى عينيكى اسمرو من شيل الحنين..
ولإنهم متكحلين بشىء حزين
بشىء فى كل عيون صحابى الطيبين
إللى فى عينيهم إنتظار.
والليل جدار
إذا يدن الديك من عليه ..
يطلع نهار