رمضان جانا .. أهلا رمضان

**botta** · 14 - 8 - 2009, 03:45 PM

وحوى يا وحوى .. حالو يا حالو ............
كلمات كتير مرتبطة بوجود الشهر الكريم
و كمان أفعال كتير و عادات و تقاليد متعلقة بالشهر ده
حاجات بتحصل فى معظم ــ لأ كل ــ البيوت المصرية و العربية

منها : لازم ترويق جامد فى البيت و من ضمن ما نفعله فى التنظيف ده نجيب المصحف من على الرف العلوى فى المكتبة و ننفض الغبار المتراكم عليه بقاله كام شهر عشان خلاص رمضان جه و هنقرأ القرآن ، و كأننا مش بندور على المصحف الا فى الشهر ده

و كمان التنظيف الشامل ده للبيت عشان فى رمضان مافيش وقت ، أيوة اليوم بيضيع : الصبح بنعمل الأكل اللى بنرمى كتير منه ، و بعد الفطار كله يلحق مكانه أمام التلفزيون ــ نظام أنتخه بعيد عنكم ــ و كأن مافيش مسلسلات و برامج الا فى رمضان

من الطقوس دى كمان : حالة اعمار شامل للمطبخ من تلاجة و أرفف و دواليب اللى مكسرات و اللى جوزهند و اللى سودانى و السمن و الزيت و ...........................................
و كأننا يا حرام صايمين طول السنة و دى فرصتنا الوحيدة للأكل

ماشى .. طبعا كلنا بنشوف التصرفات دى و غيرها كتيييييييير ــ الحمد لله مش فى بيوتنا احنا ــ بس تيجوا نقف عندها و نفكر ايه ده؟؟

ليه التنظيف ده ما يكونش جوانا احنا .. يعنى ننظف قلوبنا من الحاجات الوحشة اللى فيها ، و الله هنحس بفرق و انشراح فى صدورنا و هنلاقى نفسنا مقبلين على الطاعة و العبادات طول الشهر بنشاط ــ مش أول كام يوم و بعد كده التقل يشتغل ــ طبعا عارفين .

ليه علاقتنا بالمصحف ما تبقاش طول السنة و نحاول نختم القرآن و لو كل شهرين تلاتة مرة ، مش برده أحسن من مافيش؟؟؟

ليه نضيع نهار رمضان فى عمل الأكل و ليله فى أكل اللى عملناه بدون اقتصاد أو تدبير أو احترام لمعدتنا و جسمنا؟؟؟

ليه نشترى حاجات كتير ــ مع اننا علطول نشتكى ان مافيش فلوس ــ طب المعقول ماله يعنى ؟؟؟

طولت عليكم .. مش كده ؟

بس هدفى نلحق نفكر فى الكام يوم اللى باقيين قبل رمضان و نلحق نظبط أحوالنا شوية

و اللى يفتكر عادة تانية غلط يفكرنا و ناخد ثواب تذكرة بعضنا

كل رمضان و احنا أخوة فى الله

**سميرعطيوة** · 14 - 8 - 2009, 03:47 PM

يارب اعيده على الامه بالخير

**botta** · 14 - 8 - 2009, 03:53 PM

آميــــــــن

شكرا أخ سمير لمرورك

**مورامودى** · 14 - 8 - 2009, 08:04 PM

السلام عليكم ورحمة الله وبركاته

اهلا رمضان ------رمضان جانا بالخير واليمن والبركات
يالا نسارع مع بعض فى رمضان فى الحسنات لازم يا اخواتى نحصد كم كبير من الحسنات فى رمضان ونجاهد على ان الله يغفر لنا ذنوبنا ويكفر عنا سيئاتنا قولو امين

**No TiMe** · 14 - 8 - 2009, 11:12 PM

رمضان كريم عليكي شيماء وتقبل منا واياكي صالح الاعمال
وفعلا رمضان بنشوف فيها اكتر من كدا
وزي ما قلتي الناس تحسيها انهم صايمين السنه كلها ومش بياكلو الافي رمضان

توبك جميل زي ما تعودنا منك
تقبلي مروري ولو انو قلييل بس معلش عما ارجع مصر وكل سنه وانتي طيبه

**botta** · 15 - 8 - 2009, 10:15 AM

المشاركة الأصلية كتبت بواسطة مورامودى

السلام عليكم ورحمة الله وبركاته

اهلا رمضان ------رمضان جانا بالخير واليمن والبركات
يالا نسارع مع بعض فى رمضان فى الحسنات لازم يا اخواتى نحصد كم كبير من الحسنات فى رمضان ونجاهد على ان الله يغفر لنا ذنوبنا ويكفر عنا سيئاتنا قولو امين

شكرا مورا لمرورك الطيب

ربنا يقوينا و يعيننا على الطاعة و يتقبل منا

آميــــــن

**botta** · 15 - 8 - 2009, 10:21 AM

المشاركة الأصلية كتبت بواسطة Mr.SOMY

رمضان كريم عليكي شيماء وتقبل منا واياكي صالح الاعمال
وفعلا رمضان بنشوف فيها اكتر من كدا
وزي ما قلتي الناس تحسيها انهم صايمين السنه كلها ومش بياكلو الافي رمضان

توبك جميل زي ما تعودنا منك
تقبلي مروري ولو انو قلييل بس معلش عما ارجع مصر وكل سنه وانتي طيبه

ربنا يبارك فيك يا اسلام

و منورنى و الله .. ربنا يسعدك

كل سنة وانت طيب انت و أسرتك

وترجع مصر بسلامة