الحمد لله وحده والصلاة والسلام على من لا نبى بعده
ومع الحلقة رقم 3
من سلسلة
" مؤكد وغير مؤكدوقصة طريفة "
1- مؤكد :-
جزء المؤكد بتاعنا انهارده .. حيكون حديث .. والحديث ده يتضمن احياء سنة
...
وانت رايح تصلى التراويح او وانتِ رايحة تصلي التراويح
كثييير جدا بعد أول أربع ركعات تلاقى ناس كثير روحت
والأكثر منه بعد ال 8 ركعات وقبل صلاة الوتر تلاقى أفواااج بتمشي
زي ميكون الإمام حيصلى الوتر بره المسجد وهما طالعينله
طيب مشيوا ليه ؟؟ وراهم حاجه مهمه ؟؟
لا
طيب تعبانين أو مرضى ؟؟
برضه لا
طيب قاموا ليه ؟؟
مفيش .. كفاية كده .. نبقى نصلي في البيت بقه الوتر ..
طيب ده صح ومؤكد ولا غلط وغير مؤكد؟؟
لا غلط وغير مؤكد.. طيب ايه الصح والمؤكد ؟؟
الصح والمؤكد إن الرسول عليه الصلاة والسلام قال :
" إنه من قام مع الإمام حتى ينصرف كتب له قيام ليلة "
يعنى ايه بقه ؟؟ يعنى اللى يصلي مع الإمام لحد ما الإمام يخلص
يكتب ليه قيام الليلة .. يعنى الصح اننا نصلي مع الامام لحد ميخلص خااااالص وينصرف
طيب احنا بنحب نصلي الوتر بليل في البيت قبل الفجر .. نعمل ايييييه ؟؟
تصلى مع الامام الوتر ولما يسلم قوم صلى ركعة كمان .. يبقى انت مصلتش وتر
وفي نفس الوقت مضيعتش عليك أجر قيام الليلة
2 غير مؤكد:-
كثير جدا لما حد يعمل عمل كويس أو عمل خير ..
نلاقى الناس اتبسطت كده وراحت قايله :
يا سلاااام .. فعلا .. زي ما النبي -عليه الصلاة والسلام - قال :
" الخير في وفي أمتي إلى يوم القيامة"
وتلاقى اللى معاه راح قايل : ااااه .. صدق رسول الله
هو طبعا صدق رسول الله -صلى الله عليه وسلم - ..
بس الرسول مقالش الكلام ده ..
الحديث ده : لا أصل له
وانظر سلسلة الاحاديث الضعيفه والموضوعه حديث رقم 30
اختراع يعنى
حاجه مش موجوده فى كتب السنة أصلا
فنحذر من الحديث .. بس فيه حديث تانى صحيح ويفيد نفس المعنى ..
حد عارفه ؟؟
فكروا وحنقولوا إن شاء الله في حلقة قادمة
3- قصة طريفة :-
بمناسبة جزء الغلط والغير مؤكدالثابت في حلقتنا
كثير منا بيعمل الغلط علشان لقى الناس بتعمله
وده في حد ذاته غلط .. لأنه متأكدش اللى بيعملوه صح ولا غلط
ايه بقى الكلام اللى محدش فاهم منه حاجه ده ؟؟
اقرأ القصة ديه وانت تفهم :-
ذكر ابن الجوزي -رحمه الله- أن بعضهم قال :-
" و مررت بقوم اجتمعوا على رجل يضربونه ، فقلت لرجل يجيد ضربه : ما حال هذا ؟ قال : والله ما أدري ما حاله ، ولكنى رأيتهم يضربونه فضربته معهم لله عزّ وجلّ وطلبا للثواب "
ده من غير ميعرف هما بيضربوه ليه أصلا .. وخلي بالك من حتة انه بيضربه لله وطلبا للثواب ديه
كثير منا نفس الكلام شاف الناس بتعمل فعمل .. من غير ميعرف اللى بيعملوه صح ولا غلط
يعنى كثير يجيلك ايميل فيه حديث موضوع مكذوب .. من غير منفكر نعرف صحيح ولا لا ..
على طوووووووووووووول ندوس على
Forward
وتكتب ايميلات صحابك وصحاب صحابك واللى يعرفوا صحابك واللى ميعرفوش صحابك
وانت في دماغك انك بتعمل كده طلبا للثواب وبتعمله لله
وانت بتساهم في نشر كلام كذب عن النبي صلى الله عليه وسلم
والغريب ان لو جاله حديث صحيح .. ميبعتوش !!
يقولك ما هو الناس تلاقيها عارفاه !!
فلازم نتأكد قبل مننشر حاجه عن الدين أو نساهم في حاجه أنها صح ولا غلط
مش علشان لقينا صحابنا بيعملوها .. نعملها
بكده خلصت الحلقة الثالثة يارب متكونوش زهقتوا ..
وبكره إن شاء الله نلتقى في الحلقة الرابعة إن شاء الله
وجزاكم الله خيرا
تابعونى مع الحلقة الرابعة
اختكم فى الله منى رشدى