الست زيزي العايقة المعروفة في الوسط باسم زيزي 8 ريختر

[sheriiiif]

قرأت لك عن موائد الرحمن .... فأوعي تبخل برأيك بقا





المكان: مائدة زيزي العايقة في المهندسين بجوار ديسكو حمادة شنتح
الزمان: دلوقت أهو

الست زيزي العايقة المعروفة في الوسط باسم زيزي 8 ريختر، بتعمل حديث تليفزيزني مع المذيعة منى بلاي باك:
"إحنا النهارده قدام أكبر مائدة رحمن في حي المهندسين واللي بتعملها الفنانة الاستعراضية زيزي العايقة اللي كلكم عارفينها.. ست زيزي كل سنة وأنتِ طيبة!!"
تضع ست زيزي قطعة اللحمة بيمينها وسط حلة الشوربة قبل أن تعتدل وهي تزيل العرق من أعلى جبينها قائلة: "كل سنة وكلكم طيبين، مش لازم أقول لكم إنكم هنا بتشفوني واقفة على إيد الطباخين والسفرجية علشان مائدة الرحمن اللي باعملها كل سنة تكون على أعلى مستوى، يعني تبقى فايف ستارز، علشان الفقرا ياكلوا، هو ده واجبنا خصوصاً في رمضان شهر الخير.."
منى بلاي باك وهي تُحاول جاهدة أن تطبق فاها من هول منظر الطباخين والسفرجية وعصائر المانجة التي لا تنتهي:
آه آه آه.. ست زيزي نقدر نقول إن الفقرا بس هم اللي بييجوا المائدة بتاعتك ولا فئات كتيرة؟
ترد زيزي وعلامات الغباء ترسم لوحة رائعة على كل تقاسيم وجهها، وأطلقت (آه آه آه) طويلة تُعبر عن عدم فهمها لما قالته المذيعة: "إيه فئات دي، المائدة بتاعتي مفتوحة للكل والناس بتيجي ليها من كل حتة، حتى الناس اللي ساكنين في العمارات اللي أنتِ شايفاها دي بيحبوا يفطروا عندي هنا، وبيقولوا: أكل المائدة بتاعتِك يا ست زيزي أحسن ميت مرة من أكل البيت.."
لسه ما تستعجلش مش بس الست زيزي هي اللي عاملة مائدة فخمة لأ ده رجل الأعمال ظاظا بيه كده وكده عامل هو كمان يافتة طويلة عريضة على أول الشارع الواسع في حي الضاهر: "يا أهالي حي الضاهر الكرام.. هنا مائدة رجل الأعمال الكبير أوي ظاظا بيه كده وكده.. صوما مقبولا وإفطارا شهيا، ولا تنسونا في الانتخابات والعاقبة عندكم في المسرات".
واحد صايم: "الحق يا واد ده ظاظا بيه عامل مائدة هنا في الشارع ده"
صاحبه الصايم برضه: "مش ده اللي بيقولوا عليه حرامي ولسه راجع من بره بعد ما خلع بأموال البنك ده مش عارف اسمه إيه؟"
واحد صايم: "حرامي حرامي وإحنا ما لنا، وهو إحنا اللي هنحاسبه.. تعالى، البيت بعيد والأكل فيه ما فيهوش لحمة إحنا آخر الشهر بس هنا اللحمة موجودة كل يوم.. وهي فلوسنا اللي سارقها "الحرامي!!"

المكان: 6 أكتوبر..
بيت فوزي فرقعة المذيع في قناة فضائية حالها نايم في رمضان

فوزي بيتفرج على حوار الست زيزي العايقة، ونورت في دماغه فكرة مطرقعة جدا، مسك التليفون وقال:
"سماح عايزك تتفقي مع المفتي السابق علشان إحنا هنكلمه على الهوا النهارده في البرنامج و.."
سماح: "علشان إيه يا أستاذ؟ فيه حاجة جديدة؟!!"

فوزي فرقعة: "اسمعي اللي باقول لك عليه، وكمان كلمي الشيخ فتوح الراسي"

فوزي على الهواء مباشرة وماسك في إيده ورق كتير وعلى وشه نظرة جادة ولابس نضارة لزوم الموقف:
"فضيلة المفتي إيه رأي سيادتك في إقامة الراقصات ورجال الأعمال المشكوك في مصدر ثرائهم موائد للرحمن للفقراء في رمضان؟!"

المفتي السابق : "يا سيدي لا يجوز مقاطعة موائد الرحمن التي يقيمها الفنانون والمشاهير وغيرهم من رجال الأعمال، حتى ولو حامت من حولهم شبهات الفساد والمال الحرام خلال شهر رمضان الكريم، والحساب على هذه الموائد عند الله؛ لأنه المحاسب لكل واحد على نيته ومصدر ماله هل هو من حلال أم حرام!"

"كما أنه ينبغي ألا نصدر أحكامًا خاصة لها حكمها الخاص، وعلى المفطر أن يتحرّى الإفطار عن الطعام المعد من المال الحلال قدر استطاعته، لكنه ليس مطالبًا بأن يسأل صاحب المائدة عن مصدر ماله؛ لأن حسابه على الله".
فوزي فرقعة: "خليك معانا يا فضيلة الشيخ.. معانا دلوقتي الشيخ فتوح الراسي.. أهلا بيك، قول لنا إيه رأيك في الكلام اللي قاله فضيلة المفتي السابق؟"
فتوح الراسي: "أنا لست مع هذا الكلام -مع احترامي لفضيلة المفتي السابق- أولا لأن موائد الرحمن بدعة جديدة لم تكن على عهد رسول الله صلى الله عليه وسلم، وتحمل أكثر من خطأ أولها الفخر والمباهاة؛ فهذه مائدة فلان ابن فلان وتوضع لافتات وتقدم وجبات فاخرة وقد يستغني عنها الصائمون".
"كما أن فيها نوعاً من مخالفة الشرع؛ فهي إسراف وتبذير وفيها إنفاق المال الكثير في غير وجوهه، وإننا لا نحاسب النوايا أما إذا كان من يعد هذه الموائد أناس يستغلون ما صنعوا في الدعاية لهم كأن يكون أحدهم نجما أو ممثلا أو كان يكون أحدهم شخصية عامة أو أن تحظى بتأييد الذين اجتمعوا على هذه الموائد ومن هنا تبدو أن النية لم تكن خالصة لله"..



خلص الكلام .. وجه دورك دلوقتي علشان تقول لي رأيك بمنتهى الصراحة:



أنت بقى حكايتك إيه مع مائدة الرحمن؟
ممكن تقعد على مائدة في الشارع حتى لو ما كنتش فقير؟
ولا بتشوف إن ده شيء يسيء لك وسط الجيران؟
وهل موائد الرحمن زي ما هي دلوقتي فيها إهانة للفقير.. ولا لأ؟

ولو كانت فيها إهانة.. تفتكر نعمل إيه؟
اوعى تنسى.. لازم تكتب رأيك.. ورمضان كريم..

[دق دق]

استنى بس يا عم
هى الحكاية اسئلة واجابات

لالالالالالالا

الاول نشوف احنا فين من موائد الرحمن
وبعدين نجاوبك

مائدة الرحمن ثقافة مجتمع
عبارة عن ثلاث فئات

1- فئة القادرين على اعداد موائد الرحمن

* والفئة دى فيها من يعد المائده
لوجه الله واطعام الفقراء
وده بتلاقى يافطى مكتوب عليها فقط
"هنا مائدة رحمن"

* ومنهم من يتخدها سبيل للدعاية عما يقدمه من خير
واليافطة هنا بيتكتب عليها
"مائدة رحمن رجل البر فلان الفلانى"

* ومنهم من يتخذها سبيل لتطهير امواله
زى الست زيزى العايقة
هم قالولها كده ... مش ذنبها على فكرة

2- فئة زائري موائد الرحمن

* ودول فى منهم فعلا من يستحق لانه لا يملك قوت يومه

* ومنهم من يشتهى انواع طعام هو غير قادر على شرائها

* ومنهم من يجد لنفسه العديد من المبررات لتناول
طعام موائد الرحمن زى الصايم وصاحبة فى حكايتك

3- فئة الوسط

غير قادر على اعداد المائدة ... ولا يستحق زيارتها

دول الفئة التى تملك قوت يومها
ويمكنها اذا اذن المغرب عليها فى الشارع
ان تحصل على طعامها من حر مالها

**************************

ده باختصار مائدة الرحمن كما يراها الاخرون
دلوقتى اقدر اجاوبك على اشئلتك

علاقتى بموائد الرحمن هى فكرة مطرقعه
بفكر فيها من سنين بس للاسف منفذتهاش طبعا
نفسى اعد على جميع مستويات موائد الرحمن مش للاكل
انما لمراقيه الاخرين ... وملاحظة ردود الافعال
اثناء الاكل ... متستغربش
مهى موائد الرحمن الوجه الاخر "للاوبن بوفيه"
عندى فضول رهيب ارصد الظاهرة دى زى مرصدت التانيه

لا طبعا انى افكر اعد على مائدة رحمن واخد حق مش حقى
لا ... لانى من الفئة الثالثه
لا اقدر اعمل مادئة ... بس كمان مش حقى اعد عليها

الاهم من انه يسئ ليا ادام الجيران
ادام نفسى ... هشوفنى ازاى
وهى دى القضية
مش مهم شكلك ادام الناس ... الاهم ادام نفسك
علشان تقدر تواجه الناس

لا طبعا مفيهاش اهانه للفقراء والمحتاجين
ده نوع من التكافل الاجتماعى
واذا فى مشكله حقيقية تبقى فينا احنا
وفى نظرتنا لمن يستحقون تناول الطعام على تلك الموائد

اصعب سؤال هو سؤالك الاخير
لانك محتاج تغير ثقافة مجتمع بكل طبقاته

الله اكرم
اتمنى كلامى يكون واضح

[sheriiiif]

تعرفي يا دعاء
اكتر حاجة بتعجبني فيكي ايه ؟
نظامك و الترتيب الجيد للافكار في مخك
دكتورة بجد
ردك دايما منمق وواضح و مفصل و مرتب
و بالارقام وواحد اتنين تلاتة كمان
ايه الجمال ده؟
تسلم ايدك يا باشا
انا عارف طبعا ان الموضوع جه ع الجرح
قصدي ع الفلكلور
و أضافتلنا معلومات قيمة جدا
أضفت علي الموضوع الروح الاكاديمية
مش عارف اشكرك ازاي
و اشكرك علي ايه ولا ايه
علي ايجابيتك ؟
علي مجهودك؟
علي سرعة تفاعلك؟
علي حضورك؟
علي سرعة بديهتك ؟
علي ايه ولا ايه؟

[نيمو 77]

موائد الرحمن في حد ذاتها فكرة نبيلة غرضها الاساسي مساعدة المحتاجين وعابري السبيل ظلت هكذا لفترة طويلة حتى أنك لم تكن لتعرف من هو صاحب المائدة هى مائدة الرحمن وحسبولكن تغير الحال كما تغيرت الثقافة والعادات وأصبحت هذه الموائد فن من فنون التباهى والتفاخر والدعاية وبتنا نرى صنوفا من موائد الرحمن وللاسف خرجت من مضمونها الاساسي واصبحت ظاهرة تحتاج الى دراسه ولكن الصورة ليست كلها سوداء فالحمد لله هناك من لايزالون يعملون لوجه اللله ولا تعلم يمناهم ماتنفق يسراهم .
حكايتك إيه مع مائدة الرحمن؟
هى مش حكايتى لكن حكاية ظريفه لموظف عند زوجى في الشركة
الموظف ده كل سنه كان بيعزم اهل زوجته على الافطار في فندق شهرزاد .الفندق عامل خيمة رمضانيه وكل سنه يعزم اهله واهل زوجته مرة واتنين وثلاثه واتارى انها مش خيمة رمضانيه لكنه صوان منصوب لمائدة الرحمن وهو طبعاً عارف وبيستهبل الاظرف بقي ان اهله واهل زوجته مزعلوش منه بل اصروا انهم لايقطعوا هذه العادة ابدا
ممكن تقعد على مائدة في الشارع حتى لو ما كنتش فقير؟
متهيألى صعبه أوى انا احيانا بتضطرنى اشارات المرور اللعينه الى التاخير ولكن لااحب ابدا تناول شيء خارج المنزل
ولا بتشوف إن ده شيء يسيء لك وسط الجيران؟
لا مش عشان الاساءة وبس لكن مش بحب اكل حاجه من حد معرفوش بصراحه انا بقلق
وهل موائد الرحمن زي ما هي دلوقتي فيها إهانة للفقير.. ولا لأ؟
لا ما اعتقدش ان فيها اهانه لانها مش بتبقي للفقراء وبس هى ممكن تكون لاى عابر سبيل

ولو كانت فيها إهانة.. تفتكر نعمل إيه؟

• اعتقد ممكن عمل وجبات مغلفه جاهزة افضل من منظر الناس كده

__________________

[sheriiiif]

• اعتقد ممكن عمل وجبات مغلفه جاهزة افضل من منظر الناس كده

__________________

كلاكيت تاني مرة
هههههههههههههه

فكرة جميلة
بس متهيألي مش هتنفع
في الاماكن الشعبية
اللي بيغرفوا فيها الاطباق ع السريع
عشان يسدوا جوع الغلابة
اللمة حلوة برضه