حوار مفتوح بين شباب وبنات المنتدى فين الصح وفين الغلط؟

[قطقوطة]

ايه رأيكم ياجماعة نعمل حوار مفتوح بين بنات وشباب المنتدى؟
ونختار مواضيع هادفة ومفيدة؟
انا هبدأ وافتح اول موضوع وهو ..................
ايه رأيكم في ازمة الشغل دلوقت وفين الغلط من وجهة نظركم وايه الحلول المقترحة؟
وياترى ايه المشاكل والصعوبات اللى بتواجه كل من الشباب والبنات المترتبة على الازمة دى؟
يلا ياشباب عايزة رأيكم وانتو كمان يابنات

[sheriiiif]

واضح جدا ان ازمة الشغل بالنسبة للشباب
تتلخص في الوقت الحالي
في سبب واحد فقط
ان البنات و الستات واخدين كل فرص العمل
سكرتيرة حسنة المظهر
مطلوب عاملات مش عارف ايه
مطلوب مندوبات مبيعات
و الرجالة يروحوا يبيعوا بطاطا بقا
يا عالم حرام
اقعدوا في البيت بقا و ريحونا

[دق دق]

واضح جدا ان ازمة الشغل بالنسبة للشباب

تتلخص في الوقت الحالي
في سبب واحد فقط
ان البنات و الستات واخدين كل فرص العمل
سكرتيرة حسنة المظهر
مطلوب عاملات مش عارف ايه
مطلوب مندوبات مبيعات
و الرجالة يروحوا يبيعوا بطاطا بقا
يا عالم حرام

اقعدوا في البيت بقا و ريحونا

مهو لو كنتوا بتشوفوا شغلوكوا بضمير
مكانوش طلبونا احنا
ولا هو ايه
حاسبوا انفسكم

على فكرة ده ردى على شريف
انما ردى على الموضوع لسه جاى

[Ali Pharouq Najar]

طيب فى الأول
أنا شايف أن الغلط مش فى الشباب
إنما الغلط عند الجهات المسئولة عن إيجاد فرص العمل
و الله يا جماعة انا بأشوف ناس فى كليات راقية جدا
و تقاديرهم عالية ولكن
شغالين فى أماكن بعيدة كل البعد عن تخصصاتهم وأصلا لا تليق
بيهم
و الله أنا مش قصدى إغلط فى الشغل
الشغل مش عيب
و لكن لما تلاقى شخص متخرج من كلية الهندسة
شغال فى مطعم ..تقول إيه ؟؟؟؟؟؟؟؟؟
و متقوليش الغلط دا من عنده
؟؟؟؟

و يا سلام على العصر اللى أحنا فى
عصر مادى من الدرجة الأولى ..

فالحل عنهدهم
و أقصد الوزارات و الهيئات الخاصة بتشغيل الشباب
وبعدين كل شخص يتحط فى مكانه المناسب
و إن شاء الله المشكلة هتتحل ....

و شكرا على ترك المساحة لابداءالرأى


على فاروق

[دق دق]

ايه رأيكم ياجماعة نعمل حوار مفتوح بين بنات وشباب المنتدى؟

طبعا دى ظاهرة صحية جدا ان يكون فى حوار

ونختار مواضيع هادفة ومفيدة؟
انت رائعه ونشيطة جدا

انا هبدأ وافتح اول موضوع وهو ..................
وانا معاكى قلبا وقالبا
**************************
ايه رأيكم في ازمة الشغل دلوقت وفين الغلط من وجهة نظركم وايه الحلول المقترحة؟
بصى ازمه الشغل موجوده نتيجة تبادل الادوار
انتشار الكوسه والواسطة
بس كمان ايه
رغبه الشباب فى الوصول السريع احيانا
غير بقى الحاله الاقتصادية العامة
وفكر اصحاب رؤوس الاموال
من الاخر دى منطقة شائكة
وعلشان الحوار يبقى مفيد بجد
نتناقش فى كل نقطة لوحدها

وياترى ايه المشاكل والصعوبات اللى بتواجه كل من الشباب والبنات المترتبة على الازمة دى؟
طبعا واساسى الفراغ ... وده كارثه لوحده
كمان تولد الاحاسيس السيئة والنظرة التشائمية
اتباع سلويكات مش لطيفه
بلاوى

يلا ياشباب عايزة رأيكم وانتو كمان يابنات

موضوعك مهم جدا
وهنتكلم فيه كتير

[دق دق]

و الله أنا مش قصدى إغلط فى الشغل
الشغل مش عيب
و لكن لما تلاقى شخص متخرج من كلية الهندسة
شغال فى مطعم ..تقول إيه ؟؟؟؟؟؟؟؟؟
و متقوليش الغلط دا من عنده
؟؟؟؟
اتفق معك يا على فعلا
وده بيكون له اثر نفسى سيء جدااااااااا

و يا سلام على العصر اللى أحنا فى
عصر مادى من الدرجة الأولى ..

كمان عصر مصلحة
يعنى علشان عايز منك مصلحة
ممكن اعين حد يهمك حتى لو مش كفء
المهم ان اخد مكان حد يستحقه عنه
للاسف

طبعا انت عندك حق
بس ده احد اسباب الظاهرة وليس كل الاسباب

[sheriiiif]

مهو لو كنتوا بتشوفوا شغلوكوا بضمير

مكانوش طلبونا احنا
ولا هو ايه
حاسبوا انفسكم

على فكرة ده ردى على شريف

انما ردى على الموضوع لسه جاى

بقا البنت اللي بتدلع كل يوم و تيجي براحتها
و تمشي براحتها
و معلش اصل انا تعبانة
انا عندي صداع
انا مروحة
انا مش جاية بكرة
انا خلاص مش قادرة
ولا الشباب اللي بيشتغل بذمة و ضمير و طالع عينه
و ميعرفش يعني ايه دلع بنات
يا ناس حرام عليكم
اتكلموا بالحق بقا

[قطقوطة]

انا شايفة ان عندكم حق ياجماعة في كل كلامكم بس انا شايفة ان مستر شريف جاى علينا اوى كبنات انا معاه ان في بنات تافهة سورى في اللفظ لكن موجود وكمان بتدلع بس اكيد مش كلهم وكمان في شباب مستهتر مش عاوز اصلا يبقي اى حاجة غير انه ينام في البيت ويقول شغلى هييجى هييجى
مرسيه يادق دق لرأيك انا معاكى في نقطة افكار رجال الاعمال واصحاب رؤوس الاموال لكن الحال دا هيفضل كتير؟
انا كنت بفكر ان كل واحد لازم يبدأ اى حاجة عشان يوصل لهدفه
بمعنى حب ماتعمل كى تعمل ماتحب لكن دا مش مع كل الناس وبصراحة كمان مش في بلدنا كمان نظام الوسايط والكوسة اللى ماشي دا يعنى ايه واحد يكون ماعندوش اى كفاءة ولا اى خبرة ولا حتى استعداد للشغل ياخد مكان واحد عنده كل الامتيازات اللى تأهله للشغل دا كل ذنبه ان مش ابن فلان او فلانة
وبالنسبة لخريج الهندسة ياريت لو حد يعرف قهوة يحجز لى كرسي بعد سنتين الحق مكان قبل ماتتكلى واشوف واسطة عشان تقعدنى
بجد حرااااااااااااااااااااااا ااااااااااااااااااااااااا ااااااااااااااااااااااااا م
مرسيه ياجماعة لردودكم
مرسيه اوى ليك استاذ على انا معاك بردو في رأيك هنعمل ايه اكتر مابنمقق عنينا في المذاكرة عشان نبقي حاجة وفي الاخر بياع في محل او شيف في مطعم
ياريت ياجماعة لو في تفاعل اكتر

[قطقوطة]

ايه ياجماعة نقفل الموضوع دا ونفتح موضوع جديد؟؟؟؟؟؟؟؟

[قطقوطة]

ومع تانى موضوع ايه رأيكم دلوقت في اللى بيحصل في الجامعات والمدارس واى مكان بيجتمع فيه الولاد والبنات؟
من طريق كلام واسلوب معاملة وكمان التطورات الغريبة اللى بتتم
والبنت من دول تقولك دا صاحبى وعادى جدا كلمة صاحبى او انتيمى بمنتهى السهولة كدة
وكمان الموضوع لما يوصل لدرجة الحب وطبعا بيكون اكيد مزيف لو وصل لحد الجواز العرفى؟
تفتكرو الغلط فين؟ وياترى دا صح؟
مستنية ردودكم ياشباب وبنات المنتدى