ادخلى ووالله ما هتندمى

[horelganaa]

السلام عليكم ورحمه الله وبركاته

دى نصيحه منى لكل ام عندها بنت فى فترة المراهقه(ازاى تحافظى على بنتك)

ليه دايما كل ام عندها بنت فى فترة المراهقه بتحس انها عندها قنبله موقوته ولو شالت عينيها من عليها القنبله دى هتنفجر
ليه ما تتعاملش الام ان دى فترة عاديه فى حياه البنت ايوة صعبه لكن مش بالخطورة دى وخصوصا لو الام فاهمه كويس
وبتتعامل مع الامور بعقل.
مثلا:نفرض ان بنتك غلطت .يبقى خلاص الدنيا اتهدت .لا ,استنى لما الغضب يروح من عندك واقعدى معاها ,حاولى تفهمى منها
هى ليه عملت كده.
مش يمكن بنتك شافت حد وعايزة تقلده,يبقى واجب عليك هنا تنصحيها بالعقل(مثلا,قوليلها يا بنتى ربنا خلق البنت مصانه فمش لازم البنت تفرط فى النعمه دى.لحد ما يجى اللى يستحقها الحب مش حرام بس لما يكون صح لامك ولاهلك ولزوجك اللى ربنا هيرزقك بيه انشاء الله)
مش اول ما تعرفى ان بنتك حبت تروحى جرى تديها العلقه التمام لا وايه كل 5 دقايق تقوليلها هقول لابوكى.
انت كده مش بتحافظى عليها بل بالعكس انت بتضيعيها.ليه كل ام مش صاحبه بنتها ليه بتسيبوا الفراغ ده جواها.لحد ما يجوا اصحاب السوء ويملوه(وهما دلوقت اكتر من الهم على القلب).
تانى حاجه : بلاش تعايرى بنتك بغلطها دايما حسسيها انك سامحتيها لانك واثقه فيها وواثقه انها مش هتغلط تانى(ده طبعا مع المراقبه من غير ما بنتك تحس بكده)ووالله عمر ما بنتك هتعمل الغلط ده تانى
الاهم بقى والاخطر.,ان فى امهاتمحسسين بناتهم انهم بيمشوا وراهم مخبرين يعنى البنت قبل ما تطلع من البيت مامتها تناديها وتقولها"خدى بالك كل حاجه بتعمليها بتوصلنى فأحسنلك ما تغلطيش الا انت عارفه ابوك يموتك ده ما عندوش نقاش"
طب بالذمه ده اسمه كلام. ليه ما تسبيش بنتك هى لوحدها تيجى تحكيلك على كل اللى بيحصلها بره.والله هى هتعمل كده بمجرد ما تحس ان فى ثقه متبادله
وياسلام بقى لو انت ما شيه بالصدفه وشوفتى واحد بيعاكس بنتك ,يبقى يومها مش معدى اول ماتروحى تديها الطريحه التمام (انت اللى كنت ماشيه بتتماعيى عشان كده عاكسك بصى لنفسك وللبسك يا ماما ,ده احنا ماكناش بنات)طب ماهى خارجه من ادامك فى البيت ليه مش تشوفى لبسها الاول لو لقيتيى ملفت تكلميها براحه"ياحبيبتى بلاش اللبس ده لانه ملفت والاسلام ما امرناش بكده"والله البنت لوحدها هتجرى وتغيره
وتخاف على نفسها.
دى شويه حاجات بنصح بيها كل ام عايزة تحافظ على بنتها .يعنى انتوا جربتوا كل حاجه مش هتخسروا حاجه لو جربتوا الطريقه دى .
خليكى صاحبه بنتك
ابعديها عن الحاجه الوحشه بالعقل,فكريها بربنا.وهى هتتصرف صح.
متهيئلى كلكوا عديتوا بالفترة دى (وصلى بنتك للامان بحبك ليها .مش بالخرزانه.وانسوا بقى حكايه اكسر للبنت ضلع دى)
ويارب يعجبكوااااا.

[botta]

يا واد يا عاقل
بجد يا حور موضوع جميل و نصيحة يا رب الأمهات يعملوا بيها
ربنا يكرمك

[بنوتــــــ كـــيــــوت ــــــة]

الامهات مختلفين فيه امهات سايبين بناتهم خالص وامهات مشدده على بناتها خالص وفيه النص نص وانت عندك حق ومع ذلك مشكوره