يا ترى كتاباتك بتعبر عن شخصيك و لا لا؟!!!

[جلال عزت]

السلام عليكم ورحمة الله و بركاته

اعضاء مصراوى كافيه و مشرفين و كل اللى بيشاهدوا الموضوع برحب بيكم فى اول موضوع ليا هنا فى المنتدى و فى قسم الكافيه و النقاش...

هحاول اتكلم ببساطة و من غير كلام كبير، ناس كتير بتدخل و بتكتب هنا فى الكافيه مواضيع .. اللى منقول و اللى واخد فكرته من مكان و مغير فيه و اللى عبارة عن قضية اجتماعية او مشكلة عامة بنحاول نلاقى ليها حل و... و... و... افكار كتير قوى مالهاش حصر و طرق مختلفة فى الكتابة و التفكير و التنسيق.

طيب السؤال المهم: هل انت كعضو او مشرف او حتى ادارى بتكتب مواضيعك من دماغك او من الللى بتشوفه يوميا و بيحصل معاك؟ و لا انت بتنقل الافكار و تغير فيها بما يتناسب مع شخصيتك و طريقة عملك و روتينك؟ و لا بتجيب الموضوع من غير تغيير و تحطه و السلام؟!!!!

اللى بينقل موضوع نقله ليه؟ ايه اللى عجبك فيه؟ طيب مسالتش نفسك هو مكرر و لا لا؟ مبحثتش عنه فى القسم اللى هتحطه فيه؟!!!!

النقل يا جماعة شئ جميل جدا خصوصا ان كان نقل فكرة مميزة او حاجة تفيد الغير، يعنى مثلا نقاش عن مشكلة اخلاقية او اجتماعية مثلا موجودة وسطنا .. ده شئ جميل، بس الاجمل لما تكون انت بتنقل المشكلة دى و بتتكلم عنها و هى موجودة فى مجتمعك فعلا مش مجرد نقلت كذا موضوع و خلاص و منتظر ان الناس ترد عليك و تحييك .. طيب مين هيحييك و لا يناقشك و لا يشكرك حتى على موضوعك و هو مش مفهوم او مكرر او انك مش راعيت فيه الدقة ساعة النقل؟!!!!

و حتى فى بعض الاحيان بيكون الافكار من كتر ما اتكررت مبقاش فى حد بيناقش حتى و ان كان المضمون مختلف عن غيره لكن الفكرة واحدة، فده بيودى لعدم الاهتمام بالمواضيع و ممكن يكون تعبك راح على الفاضى.

فالافضل فى الحالة دى اننا نحاول نفكر و نبدع من عندنا فى اى فكرة جديدة و مفيدة و لو كانت حتى عبارة عن موقف حصل مع اى حد فينا و نفكر بصوت عالى بحيث ان كان الموقف بيسبب مشكلة او ظاهرة مش كويسة نحاول نلاقى ليها حل كلنا ان شاء الله.

برجو انكم تناقشوا معايا يا جماعة المضووع و اللى مختلف معايا فى الراى يتكلم و كل واحد يقول بينقل و لا بيكتب مواضيعه من افكاره هو و ايه وجهة نظره فى كده....

دمتم بود...

محمود....

[bvcxz_mn42]

موضوع جميل واكيد طبعا كلام الانسان وكتباتة بتعبر عن شخصيتة
تقبل مروري

[جلال عزت]

موضوع جميل واكيد طبعا كلام الانسان وكتباتة بتعبر عن شخصيتة
تقبل مروري

شكرا على مشاركتك بس فين نقاشك و رايك؟!!!

عموما حضرتك نورت موضوعى قبل اى حاجة و بشكرك على مشاركتك مرة تانية...

[botta]

بص يا محمود
عن نفسى موضوعاتى كلها بنات أفكارى .. حتى لو أخدت الفكرة من حاجة حوالينا : جملة أو سلوك بنعمله ، بس حاسة انى ماعرفش أنقل موضوع بحذافيره كده
و أعتقد ان ده سبب اعجاب اخواتى هنا فى المنتدى باللى بعمله و بكتبه
و بفرح أوى لما وأنا بكتب مش بلاقى له مواضيع مشابهة او ألاقيه تكرار
بس النقل أنا معاه لما يكون للافادة زى ما انت قلت أو لما يكون معلومة لازم تنقل كده أو صور مثلا .. يعنى هو كده كده ورانا
طولت عليك ؟؟ هامشى بقى كفاية رغى
و يا رب رأيى يعجبك

[جلال عزت]

بص يا محمود

عن نفسى موضوعاتى كلها بنات أفكارى .. حتى لو أخدت الفكرة من حاجة حوالينا : جملة أو سلوك بنعمله ، بس حاسة انى ماعرفش أنقل موضوع بحذافيره كده
و أعتقد ان ده سبب اعجاب اخواتى هنا فى المنتدى باللى بعمله و بكتبه
و بفرح أوى لما وأنا بكتب مش بلاقى له مواضيع مشابهة او ألاقيه تكرار
بس النقل أنا معاه لما يكون للافادة زى ما انت قلت أو لما يكون معلومة لازم تنقل كده أو صور مثلا .. يعنى هو كده كده ورانا
طولت عليك ؟؟ هامشى بقى كفاية رغى
و يا رب رأيى يعجبك

و ده طبعا واضح من كل المواضيع اللى دخلتهالك و اللى لسه بدخلها لحد دلوقتى، والله انتى و كام فرد من الاعضاء لفتوا انتباهى فعلا بموضاعكم و شغلكم .. اللى بالكم هو اللى بيخرج للنور كمواضيع و مفيش عندكم حركة هات من هنا و من هنا و ارمى بالاضافة لانكم بتعرضوا فعلا افكار كويسة جدا و فى نفس الوقت بسيطة و حاجات متخطرش على بالنا نفكر فيها ابدا .. لكن انتم بتعملوا منها مواضيع فى غاية الروعة فعلا.

كلامك مضبوط من ناحية النقل لاننا اكيد فى بعض الاحيان بنحتاجه، بس صدقنى والله يا botta ان النقل بالنسبة ليا انا على الاقل شئ صعب مادام فى مولضيع نقاشية لانى ان استعنت بيه بحس ان بلغى دماغى تماما و ممكن اتكاسل عن انى افكر او اناقش بعد كده فى اى موضوع انزله و تكون فكرته منقولة.

طبعا انت و لا طولتى و لا حاجة انا سعيد جدا بمساهمتك فى اول موضوع ليا و انا بعتذر عن الرغى الكتير يا فندم...

دمتى بود...

محمود...

[ام اسراء]

أولا أحيك يامحمود على أول موضوعات
اللى حتحس منه بمشكلتنا المزمنه فى الكافيه
وهى أن الموضوعات ذات الطابع النقاشى
زوارها معدودين وحتشوف دة بنفسك
ثانيابالنسبه لى فموضوعاتى بين بين
ولكنى لاأنقل الا ماأراه مفيد لى ولباقى الأعضاء
وخصوصا الموضوعات الأسلاميه
واتمنى من الله أنى أكون أفدت بشىءأوأضفت شىء
يحسب لى عند الله

فى أنتظار جديدك
دمت بخير وسعادة فى طاعة الرحمن

[قطقوطة]

اولا نورت الكافية وان شاء الله تنبسط معانا ونشوف مواضيعك المتميزة
ثانيا بالنسبة ليا انا معظم موضوعاتى بتبقي اكيد بتعبر عن افكارى وكمان في كام عضو فعلا في الكافيه مواضيعهم متميزة وبتعبر عن حياتنا واللى بنعيشه وبنشوفه كل يوم في حياتنا
اما المواضيع المنقولة فاكيد بيكون فيها فكرة عجبتنى ومفيدة فبنقلها يستفيد منها بقية الاعضاء
ونورت الكافية مرة تانية ومنتظرين مواضيعك
تقبل مرورى
ياسمين

[جلال عزت]

أولا أحيك يامحمود على أول موضوعات

اللى حتحس منه بمشكلتنا المزمنه فى الكافيه
وهى أن الموضوعات ذات الطابع النقاشى
زوارها معدودين وحتشوف دة بنفسك
ثانيابالنسبه لى فموضوعاتى بين بين
ولكنى لاأنقل الا ماأراه مفيد لى ولباقى الأعضاء
وخصوصا الموضوعات الأسلاميه
واتمنى من الله أنى أكون أفدت بشىءأوأضفت شىء
يحسب لى عند الله

فى أنتظار جديدك
دمت بخير وسعادة فى طاعة الرحمن

اهلا و سهلا يا ام اسراء نورتى موضوعى والله بجد...

انا تقريبت لاحظت نفس النقطة اللى حضرتك بتقولى عليها دى فعلا .. بس برضه لاحظت ان الكافيه عموما فيه نشاط كويس و الناس عاوزة تشارك و ده مش وحش بالعكس ده بيساعد على ان الاعضاء مع الوقت تتابع بشكل افضل المواضيع النقاشية و يشوفوا غيرهم بيتكلم ازاى و يناقشوا ازاى و يبدأ كل واحد فيهم يفكر و يرد رد نقاشى برضه .. و دى تعتبر اول قطرة فى الغيث لانه مع الوقت هنلاقيهم بيكتبوا مواضيع من افكارهم و من شغلهم هما و من اللى بيشوفه حواليهم زى ما بقية الاعضاء بتعمل.

و بالنسبة لنقل الموضوعات الاسلامية فده شئ كويس و خصوصوا ان الدين مبيتغيرش ده ثابت، اللى بيتغير بس طريقة عرض الموضوع مش اكتر و يا ريت فعلا كل الناس تعمل زى حضرتك كده و تنقل المواضيع اللى تفيدها هى و غيرها مش مجرد انى بنقل موضوع و بحسب مشاركات لنفسى و خلاص علشان يتقال انى عضو فعال.

طبعا وجودك لوحده اضاف ليا شرف كبير فى المضووع و مناقشتك اضافت نقاط مهمة جدا .. نورتينى بجد و انتظرى الجيدد بإذن الله.

دمتى بود...

محمود...

[جلال عزت]

اولا نورت الكافية وان شاء الله تنبسط معانا ونشوف مواضيعك المتميزة
ثانيا بالنسبة ليا انا معظم موضوعاتى بتبقي اكيد بتعبر عن افكارى وكمان في كام عضو فعلا في الكافيه مواضيعهم متميزة وبتعبر عن حياتنا واللى بنعيشه وبنشوفه كل يوم في حياتنا
اما المواضيع المنقولة فاكيد بيكون فيها فكرة عجبتنى ومفيدة فبنقلها يستفيد منها بقية الاعضاء
ونورت الكافية مرة تانية ومنتظرين مواضيعك
تقبل مرورى
ياسمين

اهلا وسهلا بيكى يا ياسمين فى موضوعى .. نورتى...

كويس جدا ان موضوعاتك بتعبر عن افكارك، لان ده معناه انك بتحاولى و بتفكرى علشان يكون ليكى بصمة محددة و مختلفة عن الاخرين يقدر بيها الاعضاء يميزوكى و يعرفوا بيها شغلك .. بالاضافة لكده انك بتعمدى فكرة النقل عند الحاجة لما تلاقى ان موضوع عجبك او ممكن يفيد الاعضاء زى ما البقية قالوا برضه؛ و ممكن برضه انك تنقلى فكرة موضوع و تغيرى طريقة عرضها و تعملى منها موضوع جديد خالص و يبقى برضه من اجتهادك و ده برضه كويس ليكى لانه بيعرف اللى بيدخل الموضوع انك فاهمة بتتكلمى عن ايه بالاضافة لانه حس بطابع جديد للفكرة.

مرورك فى مضووعى اسعدنى جدا .. شكرا ليكى على الاضافة و الترحيب و انتظرى الجديد بإذن الله.

دمتى بود...

محمود...

[طلة القمر]

تحية لك لطرحك للموضوع
بارك الله فيك محمود
سألت سؤال وهو مهم لينا كلنا
ياترى كتاباتنا بتعبر عن شخصيتنا
ولا
عن نفسى نعم
لما بفتح صفحتى بلاحظ انه من اسماء المواضيع
الىطريقة طرحها
الى اختيارى للتوقيع والصوره الرمزيه
حتى الردود
هو انا
مش مشكله لو نقلنا فكره او خبر
ثم اجتهدنا فيه ونزوده بمعلومات اضافيه
حتى تعم الفايده
لكن انا ضد نزول مواضيع كتيره فى نفس اللحظه لنفس الاسم
وبحزن لما ادخل موضوع ذو اسم مبهر
ثم الاقيه فاضى من الداخل واتركه واطلع
وانشاء الله الكل يفيد ويستفيد
اختك طله