الحب حلال وللا حرااااااااااااااااام؟؟؟؟؟ ؟؟

[قطقوطة]

قبل ما نجاوب على السؤال ده لازم نعرف الأول إيه هو الحب؟ إيه مفهومه وبيحصل إزاي؟ وحاجات كتير أوي غير كده.....
وبعد كده لازم نعرف طيب لو حلال ليه الناس بتسأل السؤال ده؟ ولو حرام ليه الناس ما بيبطلوش يحبوا؟ ليه؟...........

الحب هو :-

الحب هو حالة نفسية يعيشها الإنسان نتيجة لتعلقه بشخص وإعجابه الشديد به بدون إرادة منه، وخلوا بالكم من حكاية "بدون إرادة" دي؛ لأن هو ده السر، يعني لازم الإنسان ده ما يكونش مقرر يحب، يعني ما ينزلش الواحد من بيته الصبح، وهو بيقول "أنا نويت أحب النهاردة"، ما يشوفش الولد بنت جميلة أو تشوف البنت ولد وسيم ويقولوا "أنا قررت أحب الشخص ده"، ده ما يبقاش حب ده يبقى إعجاب... يبقى أي حاجة تانية لكن حب لأ.



الحب حلاااااااااااال..... ولكن



الحب طبعاً حلال مين يقدر يقول حرام، الحب ده قيمة سامية في حياتنا من غيرها حاجات كتير ممكن تروح، الحب ده مشاعر جميلة ونعمة كبيرة زرعها ربنا فينا.

طيب لو حلال يبقى ليه السؤال؟...

الحقيقة إن السؤال ده بالرغم إنه بيتضمن كلمة حلال أو حرام ما لهوش دعوة خالص بالدين؛ لأن من المعروف إنّ الأوامر في الإسلام مرتبطة بما في استطاعة الإنسان، والحب زي ما قلنا شعور لا إراداي؛ حيث يقول سبحانه وتعالى: "لا يكلف الله نفساً إلا وسعها"، والدين ما بيقولكش "لا تحب"؛ ولكن بيقول لك لو حبيت فــ"لا للتجاوزات والسلوكيات" اللي بتخلي الإنسان ينجرف للحرام. الإسلام بيقول لك حب بس حب بشروط وبقواعد.

السؤال ده مرتبط بالمجتمع والثقافة السايدة في المجتمع، المجتمع عندنا بسبب بعض التصرفات اللي بيعملها اللي "مفترض إنهم بيحبوا" ربط بين الحب وسلسلة من الاتهامات بدء من كونه "قلة أدب"، مروراً بأنه "تضييع وقت" وانتهاء بكونه "حرام شرعاً". وطبعاً كلنا عارفين التصرفات والتجاوزات اللي بتحصل تحت مسمى الحب البداية من "مسك الإيدين وتمشية بسيطة"، والنهاية "ذكريات سيئة يتمنى الاتنين ينسوها". واللي ما يعرفوش اللي بيعملوا الحاجات دي إن الحاجات دي بعيدة كل البعد عن جوهر الحب. دي ساعات بتكون السبب الأساسي في الحب، فيه ناس معتقدة إن الحب حرام لأن ما فيش طريقة محترمة للتعبير عنه، وكمان ما فيش حدود للحب،
دول يعملوا إيه؟؟

حب صح

مين قال إن الحب ما لهوش ضوابط أو حدود، بالعكس ده له ضوابط وحدود جامدة جداً، وإحنا هنا بنتكلم عن الحب مش الصحوبية ولا أي علاقة تانية من أي نوع. يعني علشان نكون واضحين وما نلفش بالكلام وندور؛ لنفترض إن فيه واحد بيحب واحدة زميلته في الدراسة أو مكان العمل هيعمل إيه؟؟ هيروح يتعرف عليها، ويفضل لازق لها، ولو عجبها هيفضلوا رايحين جايين مع بعض، ومكالمات ورسايل على الموبايل، وإيميلات وورد ودباديب، وخروجات، و"بحبك"، و"بامووت فيكِ"، وحاجات زي دي.... نسأل سؤالنا في الحالة دي يبقى الحب حلال ولا حرام؟؟ حبهم في الحالة دي كعاطفة حلال لكن كل السلوكيات والتصرفات اللي نتجت عن الحب ده هي اللي حرااااااام. دي ببساطة الفكرة اللي عاوزة أوصلها لكم، لكن فيه شوية أسئلة..

س: طيب يعني اللي بيحب يعمل إيه؟

ج: اللي بيحب يروح يتقدم للي بيحبها؛ لأن الغاية من الحب الحلال هي الزواج، وده الفيصل في موضوع كون الحب حلال ولا حرام.

س: كده خبط لزق من غير ما يعرفها شوية ويعرف مشاعرها تجاهه؟

ج: لأ، مفروض لو واحد أعجب بواحدة يقعد يراقبها، وما أقصدش بالمراقبة ينط لها في كل حتة ويطاردها؛ لأ، يراقبها بمعنى يشوف تدينها، وتعاملها مع الناس، وتصرفها في المواقف المختلفة، وطباعها، وكلنا عارفين إن ده مش صعب في ظل مناخ الشغل والدراسة. عجبته كان بها يبعت لها مرسال –زميلة لهم مثلاً- ولو وافقت يدخل البيت من بابه، ولو ما وافقتش يبقى لا هو خسر ولا هي كمان.

س: طيب واللي ما عندهوش إمكانيات زواج وخلافه.. يروح يموت؟

ج: لأ طبعا يدخل البيت من بابه، ويشرح لأهل اللي بيحبها ظروفه كلها، وأكيد هما هيقدروا إنه دخل من الباب.

س: طيب لو رفضوا يبقى إيه الحل؟

ج: اللي بيقول كده ما بيحطش في دماغه ليه إنه برضه لو لف ودار، الأهل برضه هيرفضوه لضعف إمكانياته.

ييجي حد ويقول لي طيب ده بالنسبة للولد، طيب والبنت....

البنت زي الولد



دي مش أغنية "سعاد حسني" دي حقيقة أقرها الشرع والدين في الموضوع ده.

س: يعني البنت هي اللي هتخطب الولد؟

ج: لأ طبعاً هي برضه هتراقبه زي ما قلنا، ونفترض إنها شافت إنه إنسان كويس يبقى إيه العمل؟ تبعتله مرسال برضه.

س: يعني ع آخر الزمن البنت هتدلل على نفسها؟

ج: لأ، طبعاً مين اللي قال الكلام ده؟ هي هتختار حد ثقة ينقل للي بتحبه مشاعرها من غير ما يجرحها، ويجرح شعورها. وده اللي عملته السيدة "خديجة" -رضي الله عنها- مع سيدنا النبي -صلى الله عليه وسلم- واحنا أكيد مش أحسن منها. ممكن تقولوا ده كان سيدنا النبي، يعني مش أي حد. الرد سهل وبسيط، لما السيدة "خديجة" عملت كده كان سيدنا "محمد" -صلى الله عليه وسلم- لم يكن بعث بعد نبياً للأمة؛ يعني عملت كده علشان أخلاقه الكريمة؛ ده بالإضافة إلى إن القرآن بيؤكد في أكتر من مكان على إن سيدنا "محمد" بشر مثلنا "قل إنما أنا بشر مثلكم".

س: بس المجتمع هيبص لها إزاي؟

ج: مش دايماً نظرة المجتمع صح. يعني فيه حاجات كتيرة حلال، والمجتمع بيحرمها والعكس؛ فالأولى إنك تتمسك بالدين مش بالمجتمع.


في الآخر


علشان حبنا يبقى صح وربنا يرضى علينا، لازم نخلي غايتنا من الحب هي الجواز، ونبعد خالص عن أي تصرف غلط تحت اسم الحب، وبكده حبنا هيكون حلاااااااااااال.

انتو بقا ايه رايكو ف الكلام ده ؟ ياريت اشوف رايكو
التوبيك منقووووووووول بس عجبنى لان السؤال ده ف دماغ ناس كتير انا منهم ف حبيت اشوف رايكو..............
ياسمين

[bvcxz_mn42]

موضوع جميل ورائع منك يا ياسمين والحب فعلا حلال واحساسة جميل بالذات لو الاتنين بيتبادلوا نفس الشعور وطبعا هيخش من الباب ويكون اخرتة الزواج بس لو كان غرضة التسلية دة هيكون لعب عيال بس ياريت البنت اللي تبعت للولد مرسال ذي ما انتي بتقولي اصل انا معجب بواحدة موت وكلامها عسل معايا ومستني المرسال ....

[HDEEL]

الحب احساس حلو اوى وطبعا حلااااااااااااااااااااااا ااال ده احساس حلو اوى اما تحب حد ويكون من الطرفين هيكون محسوس اكتر وطبعا اخرته الزواج السعيد مشكوووووووووووووووووووووو وور

[قطقوطة]

موضوع جميل ورائع منك يا ياسمين والحب فعلا حلال واحساسة جميل بالذات لو الاتنين بيتبادلوا نفس الشعور وطبعا هيخش من الباب ويكون اخرتة الزواج بس لو كان غرضة التسلية دة هيكون لعب عيال بس ياريت البنت اللي تبعت للولد مرسال ذي ما انتي بتقولي اصل انا معجب بواحدة موت وكلامها عسل معايا ومستني المرسال ....

نورتنى ياجميل بس مادام معجب بواحدة كدة خد القرار واتفضل روح كلمها دى مهما كانت بنت بردو

[قطقوطة]

الحب احساس حلو اوى وطبعا حلااااااااااااااااااااااا ااال ده احساس حلو اوى اما تحب حد ويكون من الطرفين هيكون محسوس اكتر وطبعا اخرته الزواج السعيد مشكوووووووووووووووووووووو وور

مرسيه لمرورك ياقمراية ويارب دايما منورانى
ويارب كل ايامك سعادة وحب

[meteb]

جامد قوى الكلام دة ؟ موضوع فى غاية الروعه ؟ الحب حلال حلال حلال...

[bvcxz_mn42]

انا مش عارف كلامك متناقض لية يا ياسمين مش انتي قولتي اللي هي ممكن تبعت مرسال للولد بردة منا خايف اللي انا ابعت مرسال وانا اكون اصلا مش في دماغها

[قطقوطة]

جامد قوى الكلام دة ؟ موضوع فى غاية الروعه ؟ الحب حلال حلال حلال...

مرسيه ياجميل نورتنى ويارب دايما

[قطقوطة]

انا مش عارف كلامك متناقض لية يا ياسمين مش انتي قولتي اللي هي ممكن تبعت مرسال للولد بردة منا خايف اللي انا ابعت مرسال وانا اكون اصلا مش في دماغها

معاك ان البنت ممكن تبعت للولد بس دا لو هى معجبة بواحد ومش عارفة شعوره يعنى عشان ماتعلقش نفسها وفي الاخر يطلع مفيش حاجة بس طبعا تعمل كل التحريات الازمة عنه كأنها بتراقبه
لكن في حالتك انت اللى معجب بواحدة وانت اللى لازم تروح تكلمها وكمان انا مش قلتلك تستنى شوية
تتأكد من مشاعرك انت مستعجل ليه؟
وكمان مابتسمعش الكلام ليه؟
نورتنى ياقمر ويارب دايما كدة منورنى

[meteb]

الحب حلو وحلال وكل حاجة حلوة ................بس هو فيـــــــــــــــــــــــ ـــــــــن