يوميات طلعت وسعاد (الحلقه الثالثه )

[XxX7o00odAXxX]

الحلقة الاولى
"البداية"

فى يوم من ايام ربنا دخلت سعاد تصحى جوزها من النوم
سعاد:طلعت ..... قوم يا طلعت انت اتأخرت ع الشغل
طلعت: اتأخر ليه؟.... هى الساعة كام؟
سعاد:الساعة سبعة ونص
طلعت: نعم يا ختى سبعة ونص ..ازاى يا ست تسيبينى نايم لحد دلوقتى؟
سعاد:وانا ملى يا خويا لما انت عندك شغل الصبح بدرى ايه اللى خلاك تسهر امبارح ع القهوة ؟
طلعت: وانتى مالك؟ اجرى اعملى الفطار علشان الحق الشغل

خرج طلعت من الحمام وقعد على الطبلية ومراته سابت الاكل ومشيت
طلعت: ايه ده يا سعاد؟ انتى مش هتاكلى معايا وللا ايه؟
سعاد:لا انا فطرت مع العيال من بدرى
طلعت:هم العيال فطرو كمان .... ليه؟....هم مستعجلين كده ليه؟
سعاد:ما انت ليك حق تسأل عليهم ... اصل انت عامل البيت لوكانده تيجى تاكل وتنام وبس
طلعت: جرى ايه يا ولية يعنى انا بلعب طول النهار؟...مش بشتغل علشان اجيب لكم فلوس
سعاد: فلوس؟ ..فلوس ايه يا بو فلوس ده اللى انت بتكسبه طول اليوم بتصرفه فى نص ساعة على القهوة
طلعت:الله يخرب بيتك نكدتى عليا ع الصبح...طب والله ما انا فاطر
دخل طلعت الاوضه لبس الهدوم وخرج
طلعت: امال فين العيال ؟...انا مش شايف حد فيهم
سعاد: هه مش قلت لك انت عامل البيت لوكاندة
طلعت: ردى عليا فين العيال؟
سعاد: لبنى راحت الشغل من بدري و....
طلعت: نعم؟ راحت الشغل؟ هى مش هتتهد بقى؟
سعاد:يعنى هى بتشيل طوب؟ ما هى فى محل كوافير قد الدنيا واهى بتجيب 200جنيه فى الشهر يسندونا... وللا ايه يا طلعت؟
طلعت: ماشى يا ستى ...طب فين البت سهير؟
سعاد: سهير راحت عند نفيسة صاحبتها ... عقبال عندك اصل نفيسة هتتجوز النهارده
طلعت: طيب يا ختى ... ده انتى عندك 3 بنات شوفى هتجوزيهم ازاى؟
سعاد: اطلع انت بس منها وانا هجوزهم بمعرفتى
طلعت: طب وفين البت هبة؟
سعاد: هبة راحت الدرس من الصبح وخدت 30 جنيه للمدرس
طلعت: فلوس تانى؟ هى البت دى مش هتزهق من العلام بقى يللا خليها تاخد الدبلوم زى اخواتها وتقعد
سعاد: لا البت زكية وماشية زى الحلاوة فى المدرسة دى هتدخل ثانوى وتكمل فى الجامعة
طلعت: نعم ؟ ... جامعة ايه يا ولية؟ شوفى بقى مين هيصرف عليعا بعد كدة؟
سعاد: قال يعنى كنت بتصرف قبل كدة؟ ... ده لولا بنتك بتشتغل كان زمانا بنشحت ياراجل ده انت بتصرف من ناحية وابنك من الناحية التانية
طلعت: اه صحيح فكرتينى ... هو فين اشرف؟
سعاد:طالع بخته مايل زى ابوة راجع وش الفجر مع شلة الفاسدين اللى ماشى معاها ...ودخل نام
طلعت: هو يطول يطلع زى ابوه ... وبعدين انتى اللى غلطانة دى اخرة دلعك فيه
سعاد: الله مش ابنى؟...لازم ادلع فيه واهنيه
طلعت: يعنى عاجبك اخواته البنات بيشتغلو ويصرفو عليه ؟ بالذمة ده راجل؟ ده شاطر بس يعاكس البنات ويشرب سجاير ويتكلم فى الموبايل
سعاد:سيبه يعيش شبابه .... وبعدين يصرف زى ما هو عايز ده لو طلب لبن العصفور اجيبه له
طلعت: بمناسبة المصاريف... هاتى 10 جنيه اصل انا معييش فلوس
سعاد: نعم؟ .. عايز ايه يا ....تيييييت .......المهم طلعت ما خدش الفلوس وراح الشغل
وبعد الضهر روح البيت ودخل من الباب فرحان
طلعت: يا سعاد .... يا سعاد
سعاد: مالك يا راجل متسربع كدة ليه؟
طلعت: سهير فين؟
سعاد: العيال الاربعة جوة مستنيين الغدا
طلعت: طيب كويس اوى ... انا عندى خبر حلو قوى


لو عايزين تعرفو ايه الخبر الحلو اللى طلعت عارفه
شوفو الحلقة الجاية من مسلسل
يوميات طلعت وسعاد

[love more]

طيب الحلقه التانيه هتنزل امتي انا متشوقه اعرف الخبر بجد وميرسي يا قمر

[♥بـونـبـونـايـه سـكـره♥]

هههههههههههههههههه اى المسلسل العثل ده يجنن حوده امتى بقى الحلقه التانيه بكد تسلم ايدك تقبل مرورى

[XxX7o00odAXxX]

طيب الحلقه التانيه هتنزل امتي انا متشوقه اعرف الخبر بجد وميرسي يا قمر

ميرسى ليكى انتى يا قمر
نورتى التوبيك وحالا هنزل الحلقه التانيه

[XxX7o00odAXxX]

هههههههههههههههههه اى المسلسل العثل ده يجنن حوده امتى بقى الحلقه التانيه بكد تسلم ايدك تقبل مرورى

ميرسى يا سولى ويارب دايما منوره كده
وحالا هتنزل الحقه التانيه

[XxX7o00odAXxX]

الحلقة التانية من طلعت وسعاد
(المفاجأه)




بعد الضهر روح طلعت البيت ودخل من الباب فرحان
طلعت: يا سعاد .... يا سعاد
سعاد: مالك يا راجل متسربع كدة ليه؟
طلعت: سهير فين؟
سعاد: العيال كلهم جوة مستنيين الغدا
طلعت: طيب كويس اوى ... انا عندى خبر حلو
سعاد : خبر ايه فرحنى؟
(العيال ف الاوضه سامعين الحوار)
هبه؛ابوكى جه بره اهه وبيسال عليكى لايكون جايبلك عريس يابت
سهير؛عريس مين قال هو قال كده بجد؟
والله بيقول جايب خبر حلو تعالى نشوف
هبه؛خبر حلو ايه يابابا ماتقولش عريس لسهير
طلعت ؛عريس عريس ايه احسن مليون مره م العريس
سعاد؛ احسن م العريس ماتخلصنا يا راجل وقول خبر ايه الى عامل لنا عليه ظيطه من ساعتها
العيال كلهم ف نفس واحد؛ قول يابابا بقا يوووووووووووه
طلعت:فاكرين خالتى حسنات ؟
سعاد: اه مالها قطعت وقطع سيرتها دى ست جلده
لبنى؛ مالها يابابا ايه عامله لنا خناقه تانى ولا ايه؟
اشرف ؛يالهوى ايه الى فكرك بيها ودى هايجى من وراها خير
سهير؛ يووووووووووه اسكتوا بقا خلينا نعرف مالها قول يابابا ف ايه؟
سعاد؛ اه ياختى ماانتى الوحيده الى بتحبك مانعرفش ليه
طلعت ؛ اسمعوا جالى واحد النهارده ف الشعل بيقول انها ماتت وكتبت كل ثروتها باسم سهير بنتنا
سعاد : الحمد لله قصدى يا لهوى
سهير؛مش معقول
هبه؛يانهار ابيض بتتكلم بجد يابابا
لبنى؛ لا طبعا مش جد دى عمرها ماتعمل كده دى ست طول عمرها قرشانه
اشرف ؛لااااااااااااا كده يبقى ف كلام تانى ست سهير هاتزوديلى المصروف ياختى اه الفلوس الى امك بتعطيهالى مش بتكفينى
سهير ؛ استنوا بس مانتاكد انتو ايه؟
طلعت: تفتكرى يا سعاد عندها كام الف كده؟
سعاد: كام الف دى ست مدكنه قد كده ياخويا تلاقيهم الوف مالفه
طلعت : يعنى ممكن يكونو كده مليون جنيه؟
سعاد : ليه لا.... والله وهانتنغنغ ف العز ياطلعت
طلعت: يعنى لازم بقى نتنقل فى حتة تانية نضيفة
سعاد :عندك حق يا خويا صح
طلعت: خلاص احنا نتنقل من الدور الارضى ده ونأجر الاوضة اللى على السطح
سعاد: والله؟... بقى احنا يا راجل هانورث نقوم ناجر اوضه ع السطح جرا ايه ياراجل انت غاوى فقر بقا لما ربنا يورزقنا بنعمه نقوم نروح ع السطوح بدل ماتاخدلنا شقه ف حته نظيفه بدل الحاره الهباب الى احنا فيها دى
طلعت؛ انتى اتهبلتى ياسعاد انتى عايزانا نقب مره واحده عايزه الناس تحسدنا
العيال كلهم وصوتهم جايب اخر الحاره؛ تحسدناااااااااااااااااا بابا حرام عليك انت غاوى فقر ولا ايه؟
طلعت: خلاص ناخد الشقة اللى فوقينا
سعاد: يالهووووووووووووووى هاتفرسنى يا راجل احنا هانسيب الحته دى خالص
دى الست فتحيه بتقول ان ف شقق حلوه اوى
هبه؛ ايه الى انتوا بتقولوه ده اوضه ايه وفتحيه مين انتو ماسمعتوش عن المعادى ولا المهندسين الحتت النضيفه دى
سهير؛اه ياهبه ياسلااااااااااااااااام ايوه كده عايزين ننضف بقا
طلعت؛ استنوا احنا مش عارفين هى كاتبه ايه لسهير ولا عندها كام
سعاد؛ والنبى تلاقى عندها مالاين انا الى عارفاها
هبه؛ايه ده احنا لسه هانستنى لااااااااااااا انا خلاص هارتب نفسى بقا ع العيشه الجديده هاشترى هدوم كتير وحاجات ياما الله اخيرا هانعيش بقا
لبنى؛ عندك حق ياهبه سيبك منهم دول غاوين فقر لسه هايحسبوا هانزل انا وانتى نشترى حاجات ونلف ف المحلات الى العيال اصحابك كانوا بيزلونا بيها
اشرف؛لا ياحليله انتى وهى الثروه كبيره صغيره انا خلاص رستأت نفسى هاخد فلوس ياعنى هاخد فلوس
سعاد؛والله واتفتحتلنا طاقه القدر ياعيال والله انا طول عمرى بقول البت سهير دى نعمه وربنا مبارك فيها
سهير ؛ انا بقا مش هاممنى حاجه غير انى هابطل الشغل وربنا يسهلهالى بقا
سعاد؛ يارب ياحبيبتى يسهلهالك ويورزقك بابن الحلال
طلعت ؛ جرى ايه ياعيال استنوا لما نتاكد من الخبر انتو ماصدقتوا
العيال وامهم بصوت وقع البيت؛طبعاااااااااااااااا ااااااا ماتسبنا نحلم حتى يا راجل
(صوت حد بيخبط ع الباب لما هايكسروا ايه الست فتحيه جارتهم سمعت الحوار وجايه تحلم هى كمان هههههههه هانشوف)
سعاد؛وطوا صوتكوا تلاقى حد من الجيران اوعوا تجيبوا سيره لحد دارى على شمعتك تقيد اه
طلعت؛استنوا هافتح مين مين الى بيخبط الله
(طلعت فتح الباب ياترى لاقى مين )

مستني اعرف رايكوا بس بسرعه عشان انزل الحلقه الجديده

[بسمه الدنيا]

تسلم ايدك على اليوميا ت الجامده دى
انا ممكن اتوقع مين اللى بيخبط
اللى بيخبط خاله طلعت حسنات
يارب يبقى توقعى صح
مستنين الحلقه الجايه

[hanyfouad]

شكراا على اليوميات

[love more]

كده يا حودا كل مرة تشوقني لحد لما اعرف الحلقة جديده بس بجد تسلم ايديك يا قمر وميرسي بجد

[XxX7o00odAXxX]

تسلم ايدك على اليوميا ت الجامده دى
انا ممكن اتوقع مين اللى بيخبط
اللى بيخبط خاله طلعت حسنات
يارب يبقى توقعى صح
مستنين الحلقه الجايه

ميرسى يا بسمه نورتى التوبيك
وحاللا هنزل الحلقه الجديده واسف ع التاخير