انا بنت ريفية كلمات زجلية

[عصام الدين محمد]

انا بنت ريفية وكان قدري

اتجوز م البندر حضري

مستعجل دايما بصراحة

واموره كده مش بالراحة

بيلف ويدور ف كلامه

وده مش طبعي انا فلاحة

بالصدق ابيع انا واتسوق

مش بالكلام المتذوق

وقلبي صافي ولو يزعل

من كلمة واحده بيروق

منفعش وياك ياأفندي

مش هتلاقي راحتك عندي

رجعني يالا لدار والدي

زقزقة العصافير وحشاني

مش فيديو كليب وأغاني

والندا علي وشي الصبحية

أحسن من عطري وبرفاني

رجعني يالا لبيت أبويا

مشتاقة لصميده أخويا

ده واد برئ قلبه منور

ووشه سبحان من صور

طول عمره يشقي ويجاهد

مش ع المعاكسه بيدور

وحشاني كمان اختي هنيه

نسمه بلدنا الصبحيه

قلبها بالحب دايما عامر

وكلام ربنا عندها آمر

م البيت للغيط رايحة وجاية

مش فسحه مع عمروتامر

زهقت خلاص انا م البندر

حريمه ف الشارع تتغندر

ولما البيه يرجع بيته

يلاقيها في اوحش منظر

قولي لي ياختي احياه ابوكي

مش هو أولي من اللي شافوكي

رجعني لأبويا ياأفندي

مش هتلاقي راحتك عندي

أقبل اعيش انا مع ضرة

ومقبلش عنيك تزوغ بره

ولحد كده بقي كفايه

لازم احطلها نهايه

من خواطر عصام الدين محمد

[من ارض مصر]

والله كلام رائع

[عصام الدين محمد]

والله كلام رائع

أخي العزيز
اشكر لك مرورك الجميل وصادق من غير حلفان ونورت التوبيك
عصام الدين محمد