تعالوا نضحك شويه .............وفك التكشيره

**ahmedmharb** · 19 - 12 - 2009, 05:52 PM

سلام عليكم
النهاردة هرجع شوية للنكت
بس انا هقول كام نكتة كده مش كتير
بس انا عن نفسى عجبونى اوى
اتنين مساطيل راكبين عربية فخبطوا واحد وهما ماشيين ... فاللى سايق بيقول للى جنبة .. انزل شوف كده الراجل لا يكون مات ... فالتانى نزل ... قاله تعالى شوية شمال ... ايوة تمام ... شوية يمين بقى ... نص متر قدام ... ايوة ايوة ... متر ورا .... تمام ... بااااااااس
كده مات ..................!!
__________________________________________________ ____
اتنين ماشيين فى الصحرا هيموتو من الجوع ... فبص واحد فيهم لقى كنيسة من بعيد فقال لصاحبه تعالى نروح الكنيسة ناكل هناك ... ونغير اسامينا عشان يرضوا ياكلونا ... فالتانى قالوا ونغير اسامينا ليه بقى ... الناس دى بتكرم الضيف سواء مسلم او مسيحى ... انا مش هغير اسمى .. فصاحبه قاله ياعم براحتك بس انا هسمى نفسى جورج واقولهم انى مسيحى ... فقاله انا هروح وقاولهم انا اسمى محمد وبردو هيأكلونى ... دى ناس محترمة
المهم راحو الكنيسة فدخلوا ... وعرضوا عليهم الامر ... فجه واحد من الكنيسة قالهم طبعا احنا تحت امركم ... يا مرقس ... هات اكل لاخوك محمد ... احسن اكل عندك ......!!
وطبعا انت يا جورج صايم معانا النهاردة ...........!!
__________________________________________________ _____
واحد صعيدى اول مرة ينزل مصر ... فراح لكشك بتاع سجاير وقال اشترى علبة سداير من هناك ... فاللى واقف فى الكشك شاب روش كده ... فشاف الصعيدى وهو جاى عليه قال اما اشتغله شوية .. المهم جه الصعيدى
سلام عليكم يا هندزة
وعليكم السلام يا بلدينا
عاوز علبة سداير كيلو باترا
قاله ماشى
فالصعيدى اداله الفلوس فقاله الشاب اللى واقف فى الكشك
فين الرهن يا بلدينا
رهن ...... رهن ايه يابوى ... بجولك عاوز علبة سداير
قاله لازم رهن ... فى مصر بناخد رهن
قاله رهن ايه بس عاد .... وحياة ابوك يا ولدى انا ما فايج
قاله بردو هاخد رهن .... لازم رهن
قاله يعنى مش هتجيب سداير ياولدى
قاله لا ... هاخد رهن
قاله هشربها هنا
__________________________________________________ _____
اتنين مساطيل ماشيين فى الشارع فلقوا واحد نايم على الارض ... فواحد قال للتانى .. اله مش ده عم حسونة ... قاله اه هو ... قاله طيب ايه الى منيمة هنا ... تعالى نطلعه فوق ... قاله طيب ... شالو راحوا طالعين ... فواحد بيقول للتانى ... مش ده الباب .. قاله اه ... ودى قوضة عم حسونة ... قاله اه ... ودى السرير ... قاله اه ... طيب نيمه ويالا ننزل
المهم نزلوا لقوه برضوا نايم فى الشارع ... الله ... مش ده عم حسونة .... اه ... طيب ايه اللى منيمة هنا ... تعالى نطلعه فوق .... مش ده الباب ... اه ... ودى قوضة النوم ... اه ... وده السرير ... اه ... طيب نيمه ويالا ننزل
نزلوا لقوه بردو نايم تحت فواحد معدى عليهم بس فايق .... قالهم فى ايه مالكم ... قالوا تعالى يا عم شوف ايه اللى بيحصل ده ... قالهم ماشى
قالوله مش ده عم حسونة ... قالهم اه ... وده باب الشقة ... قالهم اه ... ودى قوضة النوم .... قالهم اه ... وده السرير .................!!
قالهم لأ ......... دى البلكونة
__________________________________________________ ____
تمانية صعايدة ماشيين ورا بعض كلهم وقعوا فى حفرة واحدة ..........!!
__________________________________________________ ____
الصعايدة عملوا مظاهرة عشان يمنعوا النكت اللى عليهم فى البلد فراحوا لعضو مجلش الشعب اللى فى دايرتهم وشروحوا الموقف قالهم اصلكم بصراحة بتعملوا حاجات تخلى الناس تضحك عليكم ... قالولو لع ... احنا عاوزين نثبت للناس كلها اننا بنفهم زيهم واكتر كمان ... قالهم طيب انا عندى حل ... هنعمل مسابقة ونجيب فيها ( ازكى ) واحد فيكم ونساله كام سوال لو جاوب عليهم هنصدر قرار بمنع النكت على الصعايدة فى البلد ..... قالو اموافقين
بس لينا طلب .... قالهم خير .... قالولو يبقى المكان بتاع المسابقة فى ستاذ القاهرة ويحضر 80 الف رادل صعيدى عشان يشدعنا .... قالهم موافق
وجت شاعه الحسم ... 80 الف صعيدى فى الاستاد ... كاميرات وصحافة وتليفيزيون لتغطية الحدث العظيم ده ... وجه اخينا ( ازكى ) واحد فى الصعيد كله ووقف قدام الراجل اللى هيساله ... جاهز يا بلدينا ... قاله جاهز يابوى
السوال الاول .... 2 فى 2 بكام ......؟؟؟
هرش الراجل فى دماغه شوية وقال ... 7
قاله غلط .. اجابة غلط
راحوا كل الصعايدة اللى فى الاستاد وفى صوت واحد ... ( اديله فرصة تانية اديله فرصة تانية )
قالهم يا جماعة ده مش عارف اتنين فى اتنين بكام
راحو كلهم تانى ( اديول فرصة تانية اديلو فرصة تانية )
قالهم حاضر عشان خاطركم والله بس
هسالك نفس السوال تانى ... 2 فى 2 بكام ....؟؟
هرش الصعديى تانى وقال .... 11
قاله غلط
الناس كلها تانى ( اديله فرصة تانية اديله فرصة تانية )
المهم الراجل اللى بيسال صعب عليه ياعينى الناس دى تروح فى داهية بسبب الغبى ده ... راح ميل على الراجل كده وقاله فى ودنه ( لما اسالك تانى قوللى 4 وانا هنجحك على طول ) قاله ماشى
راح الراجل قاله ها .... نفس السوال .... 2 فى 2 بكام .... قاله 4
راحت الناس كلها فى صوت واحد ( اديلة فرصة تانية اديله فرصة تانية )
__________________________________________________ _____