تعالى أقولك ازاي تطلع روحك من جسمك تشتكيلها وتتكلم معاها؟؟

[لما النسيم]

اغلبيتنا مر بمشاكل تعبته نفسيا حسسته انه خلاص مش قادر يكمل حياتة وان الدنيا مملة وملهاش اي طعم ولا معنى منها مشاكل في الدراسه او مشاكل عاطفية سابت لنا شرخ كبير في قلوبنا وعلامات جرح مش عاوزة تتمسح مهما حاولنا بس ياترى هنقدر نكمل كده؟؟ كتير فكرنا نروح لدكتور نفساني وطبعا ده مفيهوش احراج كلنا متعلمين ومثقفين وعارفين ان ده مفيهوش حرج بس ممكن يكون مفيش دكتور نفساني قريب او مثلا بنقول لنفسنا لو روحنا للدكتور مشكلتنا هتكبر لأننا بكده بنوهم نفسنا ان احنا معقدين او تعبانين طب بقولكم ايه؟متيجوا كده نحاول نعالج نفسنا نفسيا بنفسنا حتى عشان نضمن ان اسرارنا مش هتطلع برة تيجوا تشوفوا معايا الدوا؟؟ جربوه مش هتخسروا حاجة وانا عن نفسي بجد جربته وحسيت انه مريح لأبعد حد يلا نشوف؟؟ عوزاكم الأول قبل متقروا كلنا نرجع بظهرنا لورا ارتاحوا ع الكرسي خدوا نفس عميييق.... ايوة كده..انسوا اي حاجة بتفكروا فيها لو مشغل اغنية اطفيها مش عاوزة اي صوت حواليكم نهائيا لو سمحتم عاوزة هدووووء تاااااام...صمت رهيييييب...لو ضروري هيبقى في صوت ياريت ميكونش في غير صوت تكات عقارب الساعة ...عاوزاكم الاول تقروا التمرين وتحفظوه علشان تعملوه وانتم مغمضين عينيكم وطافيين شاشات الكمبيوتر ...سكووووووت هنبدأ دلوقتي انتم مغمضين عينيكم ونايمين على ضهركم...روحكم او نفسكم اللي هي اقرب حاجة ليكم اهي هتغادر اجسادكم دلوقت ..ايوة اهي بتطلع ..ياريت نبعد صوابعنا شوية عن بعضها عشان نسمحلها بالخروج..ايوة كده..اهي خلاص خرجت اوعى تفتح عينيك ..اهي قامت وقفت على رجليها..ماشية..ماشية..راحت قعدت على الكرسي اللي جمبك بس مديالك ظهرها ..متخافش منها دي بتحبك اوي و أبرء مما تتخيل واهي قاعدة بتبص لك بابتسامة بريئة..خليك مغمض عينيك واتنفس بعمق..اطلب منها بس من غير ماتتكلم انها تديلك وشها..اهي بصتلك ..عينيك بقت في عينيها..شايف عينيها اد ايه بريئة؟؟ متستغربش ان هي دي نفسك اللي مش بتفارقك وصدقني ايوة دي نفس بريئة اوي اوي فوق متتصور انت بس اللي خليتها تغلط لحد مبقيت تكرهها وساعات تحتقرها ..دلوقت ادام البراءة دي كلها عاوزاك تنسى كل اللي فات..خد نفسك في حضنك..ايوة كده..قولها ان براءتها وحشتك اوي ..واوعدها انك مش هتغلط في حقها تاني..اعتذر لها عن انك وسختها بملذات الدنيا لو كانت حرام..شايف الاستيكة اللي هي ماسكاها في ايديها عاوزة تديهالك؟؟ ايوة الاستيكة دي خدها من ايديها خد كمان الورقة اللي في ايديها التانيه عارف هي كاتبالك فيها ايه؟؟ هي عملالك زي حصر لكل حاجة سببتلك الم نفسي وعوزاك تمسحها عشان ترتاح وتريحها معاك..يلا امسك ايدها وامسحوا الورقه دي مع بعض رجعووها بيضة ولا اقولك؟خد منها الكبريت اللي معاها واحرق الورقة دي اصلا ..واديها من عندك ورقة بيضة مفيهاش نقطة ولا حتى سطور..علشان من بكرة حياتك الجديدة هتبدأ بالصفحة دي..قبل مترجع روحك ل جسمك عيط لو عاوز..ايوة عيط..ولو كنت ولد مش عيب ان دموعك تنزل ..الدموع بتغسل الذنوب و القلوب صدقوني..خلاص؟ عاتبتوا بعض؟ وعدتها انك هتطهرها؟وعدتها انكم مش هتغلطوا تاني؟؟ طب يلا خليها ترجع مكانها عشان تبدء تنفذ وعدك اللي انت اديتهولها..يلا قوم اقف اديها ضهرك علشان تدخل تاني في جسمك..حاسس بموجة دافئة دلوقت دخلت جسمك كله؟؟ هي دي روحك الدافية الطاهرة البريئة اللي انت فتحت معاها صفحة بيضة جديدة رجعتلك يلا وريها انك اكبر من انك تخلف وعدك معاها وانك من دلوقتي بقيت حاجة تانيه وانسان جديد غير اللي هي كانت تعرفه قبل كده

[aeme3100]

شكرا ليك لما النسيم
فعلا كلنا محتجين نقف مع نفسنا ونترجاها تسامحنا

[♥بـونـبـونـايـه سـكـره♥]

تسلمى يا ايناس ياقمر ع التوبيك الكاااامد ده
تقبلى تحياتى ليكى ياقمر

[lawyer girl]

تسلم ايدك

موضوع حلو اوى

[بك أستجير فمن يجير سواك]

بجد مواضيعك بتخدنى لعالم تانى بحس فيه بالنقاء والروح الصافيه
تسلمى حبيبتى كلك خير لانك بتحاولى تساعدى الغير يوصل لى نفسه الا كله براءة
ويبعد عن التلوتات الا اتحطت عليه وربنا يسعدك ويبارك بعمرك ياقمراية
تقبلى تحياتى وتقديرى

[اميرة الجراح]

ثانكث موضوع رائع جدا

[suzy]

بجد لموضوع دة اتكتب عشاني شكرا وبجد لو قلت شكرا للصبح مش هاديلك حقكك شكرا جدا

[لما النسيم]

بجد ياجماعة انا بشكركم كلكم على ردكم و تعليقكم على الموضوع متتصوروش انا بفرح اد ايه لما بحس بوجودكم معايا وبتفاعلكم معايا انا غبت فترة عن المنتدى بجد وحشتوووني ويارب نبقى اصحاب اكتر واقرب