ومابين الاحمر والاسود

[الشاعر هانى مهران]

ومابين الاحمر والاسود

وما بين الأحمر والأسود
قلب الغلبان .
والنسر اللابد على قوته
أصبح تعبان
بيحاوط حلمه وأفكاره
وبيرمي همومه على النسيان !!


وما بين الأحمر والأسود
كان حلمي زمان ..
أيام مدرستي
والنجمة الحمرا فـ كراستي
إني أبقي أديب
أو حتى أكون ...
وسط اصحابي
وأنا بلعب وياهم بالدوم
يتقال لعيب
مش عارف ليه ؟!
كل ما بكبر..
أحلامي تخيب ؟!!


كان ياما كان
كان عندي أحلام بالهبل
كان أصغر الأحلام ما بينهم
أعلى من قمة علم
كان ياما كان
كام حلم مات ….
من غير كفن ؟
كام حلم مات عافية ؟
كام حلم مات م الخوف
وجنب أصحابه إندفن ؟


كان ياما كان
كان في زمان إنسان غبي
كان فاكر إنه عشان بيستحمل عذاب
يبقى نبي !!
كان ياما كان
كان في زمان إنسان ذكي
باع المبادئ قال نعم
خلوه نبي !!!

[ايسل]

كلمات جميله وبسيطه وتعبر عن معظم الشباب مع اختلاف احلامهم سلمت يداك ايها الشاعر وننتظر المزيد

[الشاعر هانى مهران]

تسلمى يا ايسل وشكرا جدا على مرورك