النسر ................... والفراخ

**Young DeviL** · 8 - 3 - 2008, 05:07 AM

انا هقولكم حكايه سمعتها يمكن مقدرش اقولها باللغه العربيه او بالطريقه المناسبه انما انا هقولها وخلاص وامري لله بقي

كان في مره واحد اتخنق من عيشه المدينه وخنقتها والتلوث الي فيها وقال انا اقدر اسافر عند صاحبي اللي في الارياف صديقه دا كان عايش في بيت في الريف وسط الخضره وكمان كان عنده جنينه قدام بيته بيربي فيها فراخ المهم هو راح عنده اول ما دخل الجنينه لقي حاجه سودا في وسط الفراخ قرب اكتر والحاجه دي قدامه تكبر فضل يقرب ...................يقرب....................
لحد ما لقي انه نسر

راح جري علي صاحبه بيقوله الحق في نسر وسط الفراخ وصاحبه يقوله متخافش وهو يقوله دا نسر ازاي مخافش هياكلهم وهو برده يقوله اهدي متخافش وهو بيقوله طب تعالي اوريك راح صاحبه مشي معاه وقاله شايف دا نسر وهو قاله متخافش تعالي وانا احكيلك حكايته............

صاحبه قاله انا في يوم وانا ماشي في وسط الجبال لقيت بيضه البيضه دي قلت حرام اسيبها لوحدها قمت جايبها وحطيتها وسط بيض الفراخ يمكن تفقس وفعلا البيضه فقست وطلعت النسر دا واتربي في وسط الفراخ وهو فاكر نفسه فرخه ولا يعرف يطيرولا يبص للسما ويحلم بده والاكتر واكتر انه بيخاف من الفراخ الضعيفه ويقعد علي جنب من خوفه منهم

راح صاحبنا زعق فيه قاله حرام عليك بقي تخلي النسر بهجه السما يتحرم من الطيران ومتحاولش تعلمه الطيران وسايبه مقيد الحريه وسط الفراخ والاكتر من كدا انه بقي جبان زيهم وبياكل اكلهم وكل دا فاكر نفسه فرخه حرام عليك انتا معندكش رحمه طب خلاص انا عايز النسر دا بيعهولي عايز كام رد عليه وقاله خده واعتبره هديه

وفعلا خده صاحبنا دا وهو راجع معاه وساب شباك العربيه مفتوح يمكن النسر يحن ويطير بس مطارش برده وبقي قاعد خايف زي الفراخ وحتي خايف يقوم يقف وبقي كل يوم صاحبنا ياخده يرميه في الهواء شويه يمكن يفهم انه نسر ويحاول يطير بس برده كان دايما بيقع علي الارض جرب معاه مره واتنين وتلاته واربعه وخمسه وسته وبرده النسر فاكر نفسه فرخه وهو يقوله انتا ايه مبتفهمش الفراخ مش هتقبلك وسطهم عشان انتا اقوي منهم والنسور برده مش هتقبلك كدا عشان انتا اضعف منهم افرد جناحك وقولهم انا القوي بس برده من غير اي نتيجه ولا حتي النسر حاول يطير

جه في يوم صاحبنا بعد ما زهق من النسر قاله انا هديك اخر فرصه ليك ياما تعيش بكرامه وتطير وسط النسور ياما تموت وانتا جبان ورماه من فوق جبل عالي جدا النسر كان فاكر ان كلها ثواني ويقع علي الارض زي كل مره لكن فضل يصبر عشان يقع ولقي انه موقعش بص تحته لقي الارض بعيده جدا عنه خاف النسر وحاول ينقذ نفسه باي طريقه قعد يفرد جناحه مره مره علي مره شالته الرياح ولقي ان سرعته بتقل بس برده نازل ناحيه الارض رفرف بجناحاته وفعلا النسر طار لفوق وسط السما بتشيله السحب وقعد يرفرف بجناحاته واتعلم انه نسر بيطير ملك في السما

وكدا اكون خلصت حكايه النسر ..................... والفراخ

الحكايه دي ممكن تكونو فهمتو انا عايزه اقول ايه منها النسر مطارش عشان صاحبه ويقوله ايه دا انا طلعت نسر بطير انما عشان هو حس بالخوف وكمان كان بيخاف من مخلوقات اقل منه بكتير ليه دايما نتصرف لما نحس بالخوف وليه نرضي نعيش مع الاقل مننا مع اننا احنا الي نقدر نحكمهم ونقولهم احنا ملوك عليكم النسر دا هو كل واحد فينا هو انا وانت وانتي احنا نقدر نفرد جناحنا ونطير ونقول احنا نسور احنا ملوك الطيور كلها ياريت تكونو فهمتو انا اقصد ايه ونغير نفسنا واكيد هنلاقي كل الي بيحبونا بيعملو زينا ياريت فعلا..............