اخر مكالمه هاتفيه بين مبارك والبرادعي .؟؟؟؟؟؟؟؟؟؟؟؟؟؟؟

[هشام اللول1]

أنا البرادعي يا حسني ......!!!!!

ألو ...

سلام عليكم

وعليكم السلام .. مين بيتكلم

أنا البرادعي يا حسني .. ممكن نتكلم

لأ مش ممكن ...

ليه بس هوا فيه إيه

هوا فيه إيه .. انت مش عارف واللا إيه

عارف إيه ....!!!


عارف إيه .... !!!
مش عارف انك عاوز تترشح قدامي ...!!!
ودي فيها إيه ...!!!

ودي فيها إيه .. فيها كثيييييييييييير

انا مش شايف فيها حاجة

انا شايف فيها كثير

ممكن تقولي فيها إيه


فيها إنك نسيت نفسك .. وصدقت إنك ممكن تقعد ع الكرسي
فيها إنك فاكر إن نوبل بتاعتك ها تخليك زيي وأحسن مني
فيها إنك عايش ف الوهم ومش عارف إن أنا حسني

تسمح ليّا أقاطعك .. أنا مش شايف أي حاجة من الحاجات دي
أنا شايف إنها حرية رأي

هههههههههه حرية رأي .. انت هنا فين .... انت فاكر نفسك في سيدني
واللا تكونشي فاكر نفسك في نيوجيرسي
انت هنا في مصر ... لو مش عارفها ممكن أخلّي واحد يعرفهالك كويس ...
واحد كده من رجالة العادلي

انت بتهددني ...!!؟؟

انا ما بهددش .. انا بانفذ على طول .. من غير تهديد ولا تهويش
والّلا تكونشي فاكر نفسك موسوي بتاع إيران وإحنا في طهران
ههههههههههههههههه
لو كنت فاكر نفسك موسوي .. فأنا مش أحمدي نجاد يا برادعي
تعرف أيمن نور ونعمان جمعة .. روح إسألهم إيه اللي جرالهم

أنا عارف نفسي كويس

لمّا انت عارف نفسك كويس ما تخليك في حالك وتلعب على قدك
لازم يعني تترشح قدامي

دي حرية .. وكل واحد حر يعمل ما بداله ...
كل واحد حر في أفكاره وآرائه .... وحر كمان في جميع قراراته
اسمع انت هاتصدّعلي دماغي ع الفاضي أنا هاعمل معاك اتفاق ع الماشي


اتفاق إيه انا مش بتاع اتفاقات
اسمع بس وما تقاطعنيش

اتفضل قول .. بس تقول كلام موزون
وانا من امتى باقول كلام مش موزون .. مرة تانية باحذرك ما تغلطش

اتفضل قول

إيه رأيك في متين فدان في توشكى جنبيهم قصر كده إنما جنان

إيه ده ... انت بترشيني


اسمع بس و ما تعملّيش فيها محمود المليجي
طب إيه رأيك في خمسين فدان في سيناء وفندق صغير كده في الشرم
مرة تانية بتحاول ترشيني

انت باين عليك هاتغلّبني .. طب إيه رأيك تبقى سفيرنا في لندن

لأ طبعاً

لأ ليه

لأني انا عمري ما قبلت رشاوي


انت عاملّي فيها أدهم الشرقاوي ..
روّ ق كده وفكّر في الموضوع انت ما تعرفشي أنا ممكن أعمل فيك إيه

هاتعمل إيه ...
هوا أنا أصلاً عملت فيك حاجة عشان تعمل فيّا ...
وتعمل فيّا حاجة ليه ..!؟

كل ده وما عملتش حاجة .. مش كفاية الشوشرة اللي عملتهالي ...
وخليت الناس كلها تتكلم ... مين أحسن البرادعي واللا حسني ...!!!؟؟؟؟
ودي فيها إيه ...!!!


تاني بتقول ليّا دي فيها إيه

أيوة ... دي فيها إيه ..
واحد بيقول رأيه في بلده .. وعاوز يترشح في الانتخابات ..
هوا الكلام ده غير قانوني

انت هاتدخلني في موضوع قانوني ومش قانوني ..
يا برادعي ما انتش قدي هاجيبلك فتحي سرور .... الترزي بتاعي
وانت عارف إنه أي حاجة بيخليها قانوني أو مش قانوني – حسب مزاجي –
بس هوا مستني مني إشارة

ودي برده تبقى شطارة .. ..!!

ماشي يا عم ”الفير"
اسمع عشان أنا مشغول وورايا اجتماعات كثير ..
من الآخر انت عاوز إيه ...!!؟؟
عاوز فلوس ..
عاوز أراضي
عاوز منصب كويس
عاوز شهرة وإعلام وتبقى ستار
أي حاجة من دول قولّي عليها وأعملها لك طوالي

أنا مش عاوز حاجة من دول
أمّال عاوز إيه

عاوز مصر تبقى مصر

انت هاتجنني أمّال مصر دلوقتي إيه

مصر دلوقتي مش مصر ... مصر خلاص صارت قزم
قزم صغير وسط عمالقة
عمالقة في كل حاجة ...
في العلم والتكنولوجيا
في الاقتصاد والجيولوجيا
في الثقافة والفنون ... والأدب والعمارة
وفي الصناعة والزراعة والتجارة ... حتى السياحة ..
دول كثييييييير سبقتنا في كل أنواع الحضارة


بس احنا مازلنا عمالقة في الكورة ... انت نسيت واللا ع الماتشات ما بتتفرجش ..!!!!

وهيّا الكورة برده هاتحلّنا مشاكل الصحة وطوابير الخبز
واللا هاتحلّنا مشاكل التعليم وأزمات الأنابيب والفول والعدس
واللا هاتخلّي الدخل القومي كل سنة بيزيد ويزيد
واللا هاتحارب بيها الفساد اللي بقى في كل شبر فيكي يا مصر
واللا تكونشي هاتقضي بالكورة ع البطالة والأمية
الكورة دي لعبة لعبتها انت
أيوة لعبة لعبتها انت عشان تنسيّ الناس همومها ومشاكلها اللي كل يوم عن يوم عمّاله تزيد

وانت اللي هاتصلح كل دا كله

انا مش سوبر مان ولا طرزان
انا مجرد راجل باحب مصر وبأعرض وجهة نظري
يعني انا اللي ما بحبش مصر

ما حدش قال انك ما بتحبش مصر

أمّال ايه

كل واحد له قدرات وامكانيات وكمان له فكر ورأي ووجهة نظر
مش معنى إني بأعارضك إني عاوز ألف حبل المشنقة حوالين رقابتك
أنا بأعارضك لأني عندي آراء مش زي آرائك ووجهة نظري غير وجهة نظرك
عكسك انت اللي بيعارضك بتتهمه بمحاولة قلب نظام الحكم
وتوديه السجن وبترميه زي الكلب في زنزانة يادوب متر في متر
تنكر إن إنت رميت في السجن رجالة من خيرة رجالة مصر
ليه ما نتعاونشي كلنا مع بعض عشان خاطر مصر
ليه ما نكملشي بعض عشان خاطر مصر
ليه بتفكر في مصلحتك بس وبتنسى مصلحة البلد اللي اسمها مصر
ليه بتفكر في إولادك بس وبتنسى إولاد الشعب
لازم تسمح لكل واحد إنه يعبر عن وجهة نظره حتى لو كانت ضدك
انت مش مصر ...
وأنا مش مصر ...
انت مصري وأنا مصري .. ومصر أكبر مني ومنك
ياريت تسمع وجهة نظري
لازم تسيب الناس تعبر عن آرائها وأفكارها
الناس دي كلهم مصريين وبيحبوا مصر يمكن كمان أكثر مني ومنك
يا حسني غلط انك تتصور إن الناس كلها ضدك أو بتحاربك
الناس دي قلبها على مصر وعاوزة تشوفها أحسن بلد في الدنيا بحالها
نصيحة ياريت تسمعها مني وتطمن
أنا مش طمعان في فلوس وأراضي
أو حتى شهرة وكلام ع الفاضي
أنا حتى كمان مش طمعان في الكرسي
أنا عاوز ك تعرف إنّ مش كل اللي يعبر عن رأيه
أو كل اللي يقول رأي يخالف رأيك ... ده مش وطني
الناس دول وطنيين وبيعشقوا تراب مصر .. عشق حقيقي مش تمثيل
دي فرصتك ... اتنازل عن الكرسي
مش ليّا طبعاً .. أنا مش طمعان فيه من أصله
اتنازل عن الكرسي للشعب وخلّي البلد فيها ديمقراطية وحرية
ساعتها الشعب هايحطك في عينيه وهايفتكرك طول العمر
ويمكن كمان يعمل لك تمثال ويسميه تمثال الحرية
مش لأنك كنت رئيس الجمهورية
لأ دا لأنك ساعتها هاتكون أول واحد يفتح باب من أبواب الحرية بجد
في بلد اسمها "جمهورية مصر العربية"

خلصت كلامك يا برادعي

أيوه يا حسني

أقولك حاجة ولا تزعلش

اتفضل قول


كلامك كله ما يسواش عندي بربع جنيه مخروم فجل و خس
وفّر كلامك اللي انت دوشت دماغي بيه
وفّره عشان تقوله في محاضره في اوكسفورد واللا كامبريدج
انا واخد قراري من زمااااااااااااااان ...
أنا هافضل ع الكرسي لحد ما أموت وينتهي عمر ي
واطمن .. ابني هوا الي هايمسك من بعدي

عارف يا حسني ...
البلد دي مافيش منها فايدة طول ما انت ماسك الحكم ومكلبش ف الكرسي
المكالمة انتهت يا برادعي

المكالمة انتهت يا حسني ... بس معركة الحرية لسه عليها كثير بدري ............!!!!!


والف سلامه عليك يارئيسنا
وحمد علي سلامتك...................

[انا مش معاهم]

حلوة اوي فتحي سرور الترزي
تعبير في محله بس اضف معاه انه عامل زي السواق تقول له يمين يرمح شمال يروح
وبعدين ايه ده دانت جايب المكالمة بالظبط !!!!!!!!!!!
بس انا يعني شايف ان احنا كنا بننتقد العراق لما جابوا رئيس عاش حياته في امريكا ومسكوة الحكم
انا بمنتهى الصراحه ان الطريق صعب امام البرادعي وكمان مش هوده اللي يقود مص احنا محتاجين واحد زي جمال عبد الناصر حرررررررررررررررررررررررر ررررررر
ايه رأيك في مصطفى بكري جرئ

[~ man neO ~]

يمكن البرادعى بيدلى بالتغيير
لكن لم نجد منه شىء فعلياا وكفى بالشهاده التى لم يستطع ان يدلى بهاا للعراق
التى كانت ستغير الكثير
وكلنا عايزين التغير بس على ما اعتقد لسه مفيش حد نقول انه هيغير
لكن نصبر .. كل شىء خلق بقدر
فاحنا منتظرين قدرنا ايه باذن الله

[هشام اللول1]

حلوة اوي فتحي سرور الترزي
تعبير في محله بس اضف معاه انه عامل زي السواق تقول له يمين يرمح شمال يروح
وبعدين ايه ده دانت جايب المكالمة بالظبط !!!!!!!!!!!
بس انا يعني شايف ان احنا كنا بننتقد العراق لما جابوا رئيس عاش حياته في امريكا ومسكوة الحكم
انا بمنتهى الصراحه ان الطريق صعب امام البرادعي وكمان مش هوده اللي يقود مص احنا محتاجين واحد زي جمال عبد الناصر حرررررررررررررررررررررررر ررررررر
ايه رأيك في مصطفى بكري جرئ

شكرا لردك يابرنس
علي العموم هو كويس انه اتكلم علي السرور بس
لانه لو اتكلم علي بقيت الوزارء المكالمه مش هتخلص
ويضطر يشحن بـ10 جنيه تاني

بس في فرق بين مصر والعراق
العراق وقته كانت محتله

وعلي العموم برده احنا عاوزين تغييييير مش اكتر
وانا شاء الله ممكن الراجل ده يغيرنا للاحسن

ومصطفي بكري راجل محترم جدا ومن الناس اللي بتحارب الفساد
بس انه يمسك البلد تقريبا كبيره عليه شويه

وشكرا للردك الجميل يابرنس

[هشام اللول1]

يمكن البرادعى بيدلى بالتغيير
لكن لم نجد منه شىء فعلياا وكفى بالشهاده التى لم يستطع ان يدلى بهاا للعراق
التى كانت ستغير الكثير
وكلنا عايزين التغير بس على ما اعتقد لسه مفيش حد نقول انه هيغير
لكن نصبر .. كل شىء خلق بقدر
فاحنا منتظرين قدرنا ايه باذن الله

شكرا لردك عبد النبي
وكلامك صحيح احنا مش عاوزين غير التغيير
وياريت التغيير للاحسن باذن الله
واحنا صابرين بس اكتر من 30 سنه تقريبا يبقي كتيررررررررررر قوي
واللهم يرحمنا برحمته
شكرا لمرورك الكريم

[براكودا]

اولا انا اشكر على الموضوع الجميل ده
وتسمحلي اقول وجهه نظري
1 - البرادعي مش ملاك للدرجة دي ولا حسني وحش للدرجة دي
2- البرادعي حتى الان لم يعلن ترشيحة واعتقد انه رابطه بترشيح مبارك او عدم ترشحه
3- من الممكن انا نكون محتاجين تغيير ( مع تحفظى على التغيير في الوقت الصعب اللي الشرق الاوسط فيه الان ) ولكن هل
البرادعي الانسب لخلافة مبارك ؟ اعتقد انه يوجد من هو افضل منه
4-اخيرا انا فعلا معجب بموضوعك الجميل ده .

[هشام اللول1]

اولا انا اشكر على الموضوع الجميل ده
وتسمحلي اقول وجهه نظري
1 - البرادعي مش ملاك للدرجة دي ولا حسني وحش للدرجة دي
2- البرادعي حتى الان لم يعلن ترشيحة واعتقد انه رابطه بترشيح مبارك او عدم ترشحه
3- من الممكن انا نكون محتاجين تغيير ( مع تحفظى على التغيير في الوقت الصعب اللي الشرق الاوسط فيه الان ) ولكن هل
البرادعي الانسب لخلافة مبارك ؟ اعتقد انه يوجد من هو افضل منه
4-اخيرا انا فعلا معجب بموضوعك الجميل ده .

شكرا علي ردك يابرنس
هو البرادعي مش ملاك بس ممكن هو يقود حركه التغيير
ام حسني انا مش معاك انه مش وحش لا بجد عصره كله فسااااااااد
انا مش البرادعي او غيره انا مع الاصلح للبلد
وانا شاء الله ممكن خلال الفتره اللي جاي يظهر واحد
ويقدم برنامج انتخابي
ويراعي ضميره فينا

انت اللي مرورك الجميل ياجميل