جمهورية سفنكس

[SCREEM]

الحمد لله ....حقيقي يا اخوانا العلم نور...الواحد قاعد وبيكتب وبيعبر عن رايه بدون اية ضغوط انا مش مصدق نفسي.... ربنا يستر...

ايه بقى حكاية (جمهورية سفنكس) .......... الأول لازم نبقى عارفين ان سفنكس ده يعني ابوالهول وهو رمز السكوت والصمت .

جمهورية سفنكس يا رجاله هي جمهوريه عربيه ديمقراطيه تقع في: شمال قارة افريقيا. ويحدها : من جميع الجهات بحر الظلمات .... يا لطيف اللطف يارب.... العلم: حتة قماشه سودا عليها رمز الشعب ( تمثال ابو الهول)

عدد السكان العدد ف الليمون ) متعدش بالعبيط .الحرفه والصناعه الأساسيه:الصمت والسكوت وعدم التدخل في شئونهم هما مش ف شئون حد تاني يعني شعب بيحب الهجص او بمعنى اخر الهتش. وعشان نقول الحق مؤخرا في قله مش عارف منحرفه ولا عاديه ابتدت تتكلم وتتمرد على جنسيتها السفنكسيه وهو ما تناقلته جميع وسائل الاعلام في الأونه الأخيره.

يختص ويتميز المواطن السفنكسي بعدة خصائص اهمها :-

ــ لايمكن ان يعبر باي صوره من الصور عن رايه الا وهو على سريره اقتناعا بمبدأ دع الملك للمالك .

ــ دائما مستحضر لتاريخه العظيم في البطوله وان الدنيا فعل مش كلام ودلوقتي بقى لا في فعل ولا كلام.

ــ الحياة الخاصه هي أصل الحياة اما الحياة العامه فهو مصطلح هلامي غير مفهوم المعنى عند السفنكسيين.

ــ يتفق على انه من رأى منهم منكرا فليغيره بقلبه وهذا اقوى الأيمان واساسا مفيش خيارات تانيه .

ــ جميع افراد الشعب السفنكسي يحملو لقب واحد وهو (ابوالهول ) والكلام ده في العقل الباطن مش في العلن .

هذه هي اهم خصائص وصفات شعب السفنكسيين.وبنظرة عابره سريعه على التاريخ الحديث نجد ان لهذا الشعب اصل فقد ظهرت بشايرواوائل هذا الشعب حسب اقوال مؤرخين التاريخ الحديث في خمسينات القرن الماضي وكان يطلق عليهم في هذا الحين .... الشعب المصري.... وفي هذا الوقت كان السفنكسيين قله والكثره كانت للمصريين

ويذكر التاريخ اشياء عجيبه عن الشعب المصري الذي هو اصل الشعب السفنكسي فيقول التاريخ على الرغم من ان هذا الشعب كان محتلا الا انه كان دائما شعبا ثائرا يتطلع ويحاول ان يكون افضل ... وقال ايه كان بيسقط حكومه ويجيب حكومه تانيه وبينتخب ويقول رأيه ويدلي بصوته في كل حاجه.... يا سبحان الله...... طب ايه اللي حصل .... ياجماعه في ايه... فين المصريين دول بتوع زمان ...... الواضح بقى ان التاريخ لم يسجل او يدون وقائع حقيقية تم فيها استبدال الشعب المصري بالشعب السفنكسي .... انا مش فاهم التاريخ ده تبع مين...... بس اللي نسيه التاريخ ان في مصريين لسه عايشيين من هذه الحقبه شاهدت و شهدت على عمليات التحويل وما تبعها من فظائع واهوال وحقائق واشاعات ايضا وهؤلاء المصريين وان كانو قله رفضو ان يكونو سفنكسيين وعاشو كمصريين وخلفو عيال وربوهم كمصريين بس يعني هما قله ... بس قلة العدد دي هيه اللي تخلي في امل ..... والحمد لله على كل حال

[طيف الامل]

انت تقصد عالم الاموات

[SCREEM]

هههههههههههه انت ايه حكايتك ايه معايا ده تاني موضوع متفهموش ليا انت محتاجلك مترجم لاياسيدي مقصدش عالم الاموات افهمها انت بقي

[طيف الامل]

والله فهمك بس انا اقصد ان المواصفات الى انتى بتقولها تنطبق على عالم الاموات وانا معاك على الخط انت تقول واحنا نترجم

[SCREEM]

اهم حاجه انك تترجم لحسن انا حاسس اني فاضلي موضوع كمان زي ده وهتلاقيني مشرف ف قسم ابو زعبل

[المبدع]

مشكوووور جدا على موضوعك
وانا يمكن اكون فهمت قصدك
على العموم تسلم على موضوعك المتميز
تقبل تحياااااااتى وتقديرى ليك

[SCREEM]

الف الف شكر ع مرورك منور مواضيعي دايما وكويس انك فهمت انا اقصد ايه

[صمت العيون]

مصر دايما قويه وشعبها مفيش احن منه ومفيش اشجع منه
الميزة ان كل صفات المصريين زمان كانت موجوده وظاهره للجميع والسبب ف كدا ان الدعامه نفسها كانت سليمة .. كدا هندخل ف السياسه
انما دلوقتى مصر بحس ان فيها دولتين منفصلتين تماما عن بعض طبقه عليا اوى وطبقه سفلى اوى اوى ومفيش وسط ودا مش هيتحل الا اذا الدعامه الفاسده اللى موجوده حاليا اتشالت خالص .. فاهمنى طبعا

موضوع جميل ياسكريم
تسلم ايدك
محبتى

[SCREEM]

مصر دايما قويه وشعبها مفيش احن منه ومفيش اشجع منه
الميزة ان كل صفات المصريين زمان كانت موجوده وظاهره للجميع والسبب ف كدا ان الدعامه نفسها كانت سليمة .. كدا هندخل ف السياسه
انما دلوقتى مصر بحس ان فيها دولتين منفصلتين تماما عن بعض طبقه عليا اوى وطبقه سفلى اوى اوى ومفيش وسط ودا مش هيتحل الا اذا الدعامه الفاسده اللى موجوده حاليا اتشالت خالص .. فاهمنى طبعا

موضوع جميل ياسكريم
تسلم ايدك
محبتى

الف شكر ع مروك طبعا ياصمت العيون ومفتكرش ان الدعامه الي بتتكلمي عليها اتشالت للاسف هيا لسه موجوده لحد دلوقتي وهتفضل موجوده او عالاقل هيفضل منها اجزاء في المجتمع وده الطبيعي انما ايه الي جاي ده ربنا وحده الي يعلمه وربنا يعدي اليومين الي جايين دول علي خير الف شكر لمرورك منوراني ومنوره المنتدي