سلامة مرارتك !!

[عفريت أفندى]

سلامة مرارتك !!

للزجال الشعبي الكبير أحمد نجم

سلامة مرارتك *** يا فاقع مرارة مراة الفقير
فلا جوزها جايب *** ولا الفقر تايب
ولا حتي سايب ***مَيَّة في قُلة
ولا كوز في زير *** سلامة مرارتك

*** ***

سلامة مرارتك *** مرارة العُـزاز
وإيه يعني إحنا *** ما نِوْلع بجاز
إنتَ الحقيقة *** وإحنا المجاز
تفضلْ وييجي *** بدالنا البديل
شوية خباثة *** وعوامل وراثة
نصبح بهايم *** ونصبح بديل
فتقدر ساعتها *** تنام مَلو عينك

ويعلى الشخير *** سلامة مرارتك
*** ***

سلامة مرارتك
سلامة المرارة *** يا واقع علينا بسعر الخسارة
فلا فيه صناعة *** ولا فيه تجارة
ولا فيه مدير
ولا فيه إدارة *** ولا فيه وزارة تسيب الوزير
سلامة مرارتك

*** ***

سلامة مرارتك
فداها المواطن *** أبو قلب راطن كلام الهموم
فلا نفس راضية *** ولا جتة فاضية
بلاوي وسموم *** ولا علاج مداوي
مفيش غير حكاوي *** بتاخد بإيدنا لآخر المصير
سلامة مرارتك
***
سلامة مرارتك
وألفين سلامة *** يا سايب في كل المنازل علامة
مجاعة ... أنين ... كآبة ... ندامة
جهل وبطالة وعوالة وعيا
وفنون رخيصة وقِلِّة حيا
وهموم بتكتر *** وهموم تزيد
إنت في زيادة همومنا خبير
سلامة مرارتك

*** ***

سلامة مرارتك يا ابو القد فارع
يا مالي عنينا بزبالة الشوارع
أمال بندفع ضرايب لمين
شمالك بتاخد *** وواخدة اليمين
شكلك بتحلف علينا اليمين
ما تجعل في جيبنا قليل أو كتير
سلامة مرارتك

*** ***

سلامة مرارتك
دي واخدة الحصانة
بنشقى وتاكل علينا شقانا
لا خلِّيت أمامنا ولا فيه ورانا
ضرايب *** عوايد *** فاتورة *** رسوم
ننام بالفاتورة *** وبيها نقوم
على البصَّة ندفع فاتورة لعِنينا
ولو نعمى ندفع فاتورة ضرير
سلامة مرارتك

*** ***

سلامة مرارتك يا صاحب الهمم
بخطبة بنطلع لأعلى قمم
وننزل على جدورنا بين الرمم
على الوهم ياما وياما بنينا
أوامر تجيبنا *** أوامر تجينا
على خطوة واحدة في محلك نسير
سلامة مرارتك

*** ***

سلامة مرارتك *** إحنا فداها
تفرقع مرارتك *** نفرقع وراها
حالنا بدونك عمره ما ماشي
إحنا بدونك شوية مواشي
من غير راعيها *** ومن غير كبير
سلامة مرارتك

[ابن البحر]

ههههههههههههههههههههههههه هههههههه

بجد قصيده جامده اوي والله ايه الجمال ده

ههههههههههههههههههههههههه ههههه

[ايسل]

سلامتك انت كمان ياوليد حضر نفسك تجتمع مع احمد فؤاد نجم اخيرا هتشوفه وجها لوجه فى نفس الزنزانه يابختك ياعم هتشوفه سلملى عليه وقوله يسلم قلبه اللى حس وايده اللى كتبت الكلمات دى
والعيش والحلاوه جينلكم فى السكه شكرا يا حكيم

[عفريت أفندى]

ههههههههههههههههههههههههه هههههههه

بجد قصيده جامده اوي والله ايه الجمال ده

ههههههههههههههههههههههههه ههههه

تسلم يا ريس ع المرور و المشاركه

اضحك انت بس و احنا نروح ف داهيه عشان خاطرك

أى خودعه يا عم

[عفريت أفندى]

سلامتك انت كمان ياوليد حضر نفسك تجتمع مع احمد فؤاد نجم اخيرا هتشوفه وجها لوجه فى نفس الزنزانه يابختك ياعم هتشوفه سلملى عليه وقوله يسلم قلبه اللى حس وايده اللى كتبت الكلمات دى

والعيش والحلاوه جينلكم فى السكه شكرا يا حكيم

لالالالالالالالالا يا ايسل

أبويا قال لى مش تسلم على حد و لا تقول لحد حاجه

لازم تيجى انتى بذات نفسك تسلمى على نجم و تبلغيه اللى نفسك فيه

أومال إيه ؟

مش انتى بتعرفى تتكلمى زى العبد لله اللى هو انا ؟

و إن كان ع العيش و الحلاوه و لا يكون عندك فكره

فى غيرك كتير أوى هيقدروا يوصلوه اصل إحنا بلد الجدعنه و الحمشنه

عن إذنك بئه يا ايسل هامشى أنا

[براكودا]

هو احمد فؤاد نجم ده مش قال قبل كده كلام كتير اصعب من ده
وكمان شتائم والفاظ خارجة تخدش الحياء للمشاهد
زي المكالمة اللي كانت على قناة الجزيرة
ورغم كدة لا شفناه اعتقل ولا اتحبس
احنا مش في عصر الاعتقالات ، احنا في عصر ( عبر مين قدك )
مع تحياتي لك
وشكرا على مجهودك الجميل

[طيف الامل]

حبيب قلبى رحنا ورا الشمش خلاص
تسلم باشا

[عفريت أفندى]

هو احمد فؤاد نجم ده مش قال قبل كده كلام كتير اصعب من ده
وكمان شتائم والفاظ خارجة تخدش الحياء للمشاهد
زي المكالمة اللي كانت على قناة الجزيرة
ورغم كدة لا شفناه اعتقل ولا اتحبس
احنا مش في عصر الاعتقالات ، احنا في عصر ( عبر مين قدك )
مع تحياتي لك
وشكرا على مجهودك الجميل

يا عمونا احنا ف عصر عبر و شوف مين هيعبرك

و جايز عبر و إخبط دماغك ف الحيط

تسلم ع المرور و المشاركه

نورت يا حج

[عفريت أفندى]

حبيب قلبى رحنا ورا الشمش خلاص
تسلم باشا

ايه ده يا عمونا؟

معنى كلامك إن إحنا لسه موجودين

كويس إنك طمنتنى إن لسه فينا الروح

يعنى فى أمل يا طيف الأمل ؟

جاااااااااااااااااااااايز



تسلم يا حجوج على مرورك

نورت يا باااااشا

[أبوزيد بيومي]

السادة مشرفي المنتدى

قصيدة سلامة مرارتك ليست لأحمد فؤاد نجم وإنما هي قصيدتي والتي قمت بنشرها على عدد من المواقع منها أبناء طيبة ودنيا الوطن وأزهار البدر ولكن من الواضح أن هناك من نسبها عن عمد لأحمد فؤاد نجم . ذلك لأني حرصت هذه المرة على كتابة اسمي تحت عنوان القصيدة ، ولم أكتف بالاسم الذي يسجله الموقع جانبا _فإذا قام البعض بنقل للقصيدة يكون الاسم جزءا من النص المنقول ، حتى لا يتكرر الخطأ الذي حدث من قبل مع قصيدتي ( طاطي راسك ) والتي نسبت إلى أحمد فؤاد نجم أيضا ، والتي أنكر الشاعر نفسه نسبتها إليه في أحد أعداد جريدة أخبار الأدب المصرية .... أرجو تصويب الخطأ حفاظا على حقوق الملكية الفكرية .

دكتورأبو زيد بيومي _ عضو اتحاد كتاب مصر