هنا محدش يفتح بوئه

[MaTriX]

امبارح يا جماعة كنت حاسس بشوية ملل

قمت من المذاكره بدرى وروحت قولت اعمل حاجه دافيه اشربها واقعد قدام التلفزيون شوية كنوع من التغيير يعنى

ماهو الواحد دلوقتى عامل زى الى مربوط فى ساقيه

طبعا وعلشان حالة الملل الى عندى فكرت اشوف اى قناة فى التلفزيون مالقيتش احسن من مليودى تتحدى الملل

قولت اما اشوف كدا الملل هيروح الواد البارد ده بيضحك علينا ولا ايه

عملت مج كبتشينو سخن وقعدت لقيت فيلم السادات

بصراحه مش اول مرة اشوفه ولاكن انا مش من هواه التفاهات الى مالية القنوات الفضائية

قولت اهو حاجه تسلى الواحد وبرضو يعيد شحن ثقافته التاريخية شوية

قد ايه الفيلم بيحاول يظهر مدى عظمة الرئيس الراحل انور السادات

ولاكن لفت نظرى قوى لما كان مجتمع بطلبة الكليات وسال فى حد عنده استفسار ورد عليه واحد وقاله الفساد يا سيادة الرئيس

لما رد عليه الريس وقاله الديمقراطية لها انياب

وقاله عيب

فى حد فيكم يعرف ان فى قانون فى مصر صدر بعد ما الولد دا كلم الرئيس الراحل بالاسلوب دا اسمه قانون العيب؟

ايوة فى قانون اسمه العيب

بس القانون دا على فكرة موجود عند المصريين من ايام الفراعنة

عارفين ازاى

المصريين القدماء كانو بيقدسو الحاكم لدرجة انهم كانو بيعبدوه

ويظهر ان الجينات الوراثية عندنا فى مصر مش بيحصل فيها طفرات ابدا

ولو لا قدر الله حصلت طفرة وحد اعترض على الرئيس لا قدر الله يعنى

بمجرد انه ياخد اول قلم على قفاه هتلاقيه بيقول بالروح بالدم نفديك يا ريس

بس سالت نفسى سؤال بسيط جدا

هو الرئيس العظيم الراحل السادات كان اعظم من امير المؤمنين عمر بن الخطاب لما كان بيخطب فى المسلمين فى صلاة الجمعة وطلع واحد من الرعية وقاله لا سمع ولا طاعة لك يا عمير (تصغير عمر )

ولما ساله ليه قاله انت اخدت قماش اكتر من باقى الناس وفضل سيدنا عمر يشرحله ازاى ان القماش د بتاع ابنه وابنه تنازله عنه علشان الجلباب بتاعه كان قصير عليه


طبعا انا مش هحاسب رئيس مصر لا قدر الله ولا حاجه دا احنا كلنا نموت فدائا للرئيس

انما خلينا فى الواد البارد استنيته علشان يطلع فى الاعلان بتاع الفاصل وما طلعش

عارفين ليه ما طلعش

لان الحكومة المبجلة دخلت باعلان عن الضرائب

قال يعنى الحكومة شايفه المواطن قادر يشترى ازازة زيت لما بتطلب منه 20 فى المية من دخله

بزمتكم وفى ظل الارتفاع الشديد والرهيب فى الاسعار دا حد هيعبر الاعلانات بتاعت الضرائب دى

الناس الى ماشية تكلم نفسها من الغلاء

المواطن المصرى الى كان بيتقال عنه انه فكاهى وانه مبتسم على طول بقت الضحكة بتاعته من الذكريات

بقى شايل هموم على كتافه تهد جبال

مش قادر يعترض علشان عيب

هيعترض على ايه ولا ايه

هيعترض على غلاء الحديد ولا الارز ولا الزيت ولا السكر؟

هيعترض على كيلو الكوسة الى بقى ب 5 جنيه

ولا الكرنب الى بقيت الواحده تمنها 10 جنيه

ما يصحش طبعا الكلام دا عيب

هو الضغط الى على الواحد دا ممكن يوديه فين

على الكوبرى علشان ينتحر ولا على فين


عن نفسى لو الضغط دا ممكن يودينى قسم الشرطة فانا معتز جدا بجيناتى الفرعونية واطالب بالغاء الموضوع دا

بالروح بالدم نفديكى يا حكومة نظيف


بس اهم حاجه ما اخدش بالقلم


حد فيكم عاوز يضرب بالقلم ؟

[MaTriX]

طبعا انا مش هحاسب رئيس مصر لا قدر الله ولا حاجه دا احنا كلنا نموت فدائا للرئيس

الى عامل نفسه فيها بلطجي عليه ربنا ومنه لله

[Treka]

حد فيكم عاوز يضرب بالقلم ؟

لا يا عم الا الاقلام الواحد مش ناقص
بس تسلم يا ماتركس
الوحد والله زى ماقلت بقى مربوط فى ساقيه

[همسه حب]

انا راى من راى تريكه/ بس والله عندك حق في الاسلوب الغير لائق في العلانات زى الاعلان بتاع ميلودى اعلان تافه وقناه تفهه وشكرا كتير ليك على الموضوع ده

[MaTriX]

هو موضوع جميل جدا بس يا ريت اي همسه من غير غلط
وشكرا ليكي على المشاركه