افندينا ابن المحله

[ك/علاء النسر]

السلام عليكم ورحمه الله وبركاته


انا عايز احكيلكم عن واحد محلاوى اصيل جدا



احتمال كبير يكون اى حد من المحلة يعرفه
انسان بسيط
متواضع جدا
طيب جدا
بيحب الناس جدا
بيحب بلده جدا
بيحب شغله جدا جدا
ولكن فى حب كمان زايد عنده جدا جدا جدا
لما اقولكم اسمه هاتعرفوا
افندينا المنعنع
ده سواق تاكسى عاشق للنعناع الناس اطلقوا عليه المنعنع وهو مسمى نفسه افندينا حبا فى حياته وهو حاسس انو سيد نفسه لان التاكسى بتاعه مش شغال عليه وراجل صاحب مزاج قوى قوى
لو صادف وركبت معاه تحس انك دخلت مزرعه نعناع
حاطط النعناع على التابلو بكميات كبيره وعلى التابلوه الخلفى وعامل فتحه فى السقف معلق فيها النعناع وعامل نظام تهويه يمرر الهوا على النعناع فيغمرك باحساس منعش جدا بالاضافه انو مش بينسى يحط عنقود فل ووردتين بلدى عشان كوكتيل الروائح يكتمل
المهم فى موضوعى ده مش ان الراجل ده عاشق للنعناع بجنون .......... ولكن انا ليا قصه معاه خلينى احكيهالكم
فى يوم كنت متعكنن جدا جدا وعفاريت الجن الاسود بتتنطط قدام عنيا وحاسس انى من جوايا مظلم تماما وافكارى كلها مافيهاش ولا فكره بيضا
نزلت الشارع كان الوقت متاخر
وققت تاكسى
قولتلو ممكن تودينى الــــ قاطعنى وقالى اوديك القمر اركب الاول
فتحت الباب وركبت وانا مكشر بدون تعليق على اسلوبه الظريف فى محاوله اضحاكى
وخلال منا سارح وبفكر فى مشكلتى اللى كانت مسوده الدنيا فوشى فوجئت انو ماشى بقالو 10 دقايق تقريبا بدون ما يسالنى رايح فين
ماشى وخلاص زى اللى بيفسحنى
وماشى بسرعه متوسطه عشان يسيبنى سرحان زى مانا
فجأه واحد وقفه فى الشارع
وقرب عالشباك وقالو
افندينااااااااااااااااااا اا ازيك كل عام وانت طيب
قالو السواق : حبيبى ازيك وفتح الباب ونزل يسلم عليه باسه وحضنه ومفيش غير الحضن والبوسه وقامو منفصلين ده مشى وده ركب تانى وطلع وكأن شيئا لم يكن
انا قولت اكيد يعرفو بعض كويس
المهم مشينا قولتلو مش تسالنى رايح فين
قالى مش هاتفرق المهم انى معاك مكان ماتحب
قولتلو ودينى الشون
قالى من عنيا بس ما تبقاش زعلان
قولتلو لا انا كويس (مازلت مكشر)
مع الطريق من عند نادى البلديه لغايه الشون النعناع غير لى حالتى النفسيه شويه حسيت انى هديت الى حد ما
ومع كل 20 متر لازم كان واحد يشاور لافندينا المنعنع بالسلام والتحيه وافندينا المنعنع يردها بحراره وبابتسامه عريضه
فضل افندينا يلف من طرق مطوله عشان يطول المشوار
فى البدايه اعتقدت انو بيعمل كده عشان يقولى الاجره 2ونص او تلاته ده المشوار كبير وكلام السواقين ده
بس اكتشفت انو بيقولى انا بلف عشان اقعد معاك فتره اطول
لان التاكسى ده محدش يركبه زعلان وينزل منه زعلان
وقعد يحاول يشد منى الكلام وانا مكشر بس حالتى بدأت تتحسن
وكنت مزهول من كميه الناس اللى تعرفه فى الشارع وبيسلموا عليه والسلام بحب فعلا مش بسخريه ولا بنفاق
وبالنسبالو هو كان بجد اشبه بالرئيس مبارك لما بيكون رايح زياره لبلد وايده طول الوقت بره شباك العربيه بتعمل باى باى للجماهير
يا ربنا كل دى ناس تعرفه ........ده مجرد سواق تاكسى
وبكميات النعناع اللى بيجيبها يوميا شكيت انو مختل عقليا
بس ليه كل المعجبين دول ههههه ده انا حسيت انى راكب مع عمرو دياب
وقت عن الشون بديله اتنين جنيه ما مدش ايده ياخدهم
فتحلى الصندوق قالى ارمى بياضك هنا
وابتسامته واسلوبه المرح ما اتقطعوش لحظه
والسعاده الغريبه اللى على وشه كانه لما قابلنى كان فرحان بيا ومرحب بيا جدا ومدينى اهتمام وحب ومحسسنى ان الدنيا حلوه
نزل سلم عليا بالايد واستغربت فعلا من التصرف ده
وقالى ربنا يوفقك ومشى
فلحظه ما واحد معدى جنبى قال افندينااااااااااااااا مساء الفل
افندينا طبعا رد التحيه بصوره اكبر للشخص ده
ومشى افندينا وانا ماشى وقدامى الشخص اللى كان بيسلم على افندينا
قولتلو بقولك ايه الراجل ده تعرفه
قالى اه ده افندينا المنعنع رمز الطيبه فى المحله عشرى جدا طيب جدا محبوب جدا بيحب الناس اكتر من حب النعناع
والناس تحبه وانت مادمت ركبت معاه مره هو خلاص عرفك وتقدر فى اى وقت توقفه فقط عشان تسلم عليه حتى لو معاه زباين حتى لو هاتعطل المرور
حسيت قد ايه الراجل ده محبوب وصدقونى والله العظيم انا لغايه النهارده لو قابلته لازم اسلم عليه وبيسلم عليا بحراره لا توصف مع انو ما يعرفش حتى اسمى
يا سلام لو كلنا كده كنا نبقى بلد يحكى عنها العالم ويضربوا بيها المثل فى الحب
لو عايزين تشوفو هانبقى ازاى لو حبينا بعض زى الراجل ده
اتفرجوا على فيلم ادام ساندلر بعنوان mr deeds
شكرا وعلى فكره انا بحب كل عضو فى المنتدى ده زى حب افندينا المنعنع للناس
......................